Study
- Anukramaṇī
- Source
5 agastyo maitrāvaruṇiḥ | indraḥ| triṣṭup|
ā ca̍rṣaṇi̱prā vṛ̍ṣa̱bho janā̍nā̱ṃ rājā̍ kṛṣṭī̱nāṃ pu̍ruhū̱ta indra̍: |
stu̱taḥ śra̍va̱syannava̱sopa̍ ma̱drigyu̱ktvā harī̱ vṛṣa̱ṇā yā̍hya̱rvāṅ
||1||आ च॑र्षणि॒प्रा वृ॑ष॒भो जना॑नां॒ राजा॑ कृष्टी॒नां पु॑रुहू॒त इन्द्र॑: ।
स्तु॒तः श्र॑व॒स्यन्नव॒सोप॑ म॒द्रिग्यु॒क्त्वा हरी॒ वृष॒णा या॑ह्य॒र्वाङ्
ye te̱ vṛṣa̍ṇo vṛṣa̱bhāsa̍ indra brahma̱yujo̱ vṛṣa̍rathāso̱ atyā̍: |
tām̐ ā ti̍ṣṭha̱ tebhi̱rā yā̍hya̱rvāṅ havā̍mahe tvā su̱ta i̍ndra̱ some̍
||2||ये ते॒ वृष॑णो वृष॒भास॑ इन्द्र ब्रह्म॒युजो॒ वृष॑रथासो॒ अत्या॑: ।
ताँ आ ति॑ष्ठ॒ तेभि॒रा या॑ह्य॒र्वाङ् हवा॑महे त्वा सु॒त इ॑न्द्र॒ सोमे॑
ā ti̍ṣṭha̱ ratha̱ṃ vṛṣa̍ṇa̱ṃ vṛṣā̍ te su̱taḥ soma̱: pari̍ṣiktā̱ madhū̍ni |
yu̱ktvā vṛṣa̍bhyāṃ vṛṣabha kṣitī̱nāṃ hari̍bhyāṃ yāhi pra̱vatopa̍ ma̱drik
||3||आ ति॑ष्ठ॒ रथं॒ वृष॑णं॒ वृषा॑ ते सु॒तः सोम॒: परि॑षिक्ता॒ मधू॑नि ।
यु॒क्त्वा वृष॑भ्यां वृषभ क्षिती॒नां हरि॑भ्यां याहि प्र॒वतोप॑ म॒द्रिक्
a̱yaṃ ya̱jño de̍va̱yā a̱yaṃ mi̱yedha̍ i̱mā brahmā̍ṇya̱yami̍ndra̱ soma̍: |
stī̱rṇaṃ ba̱rhirā tu śa̍kra̱ pra yā̍hi̱ pibā̍ ni̱ṣadya̱ vi mu̍cā̱ harī̍ i̱ha
||4||अ॒यं य॒ज्ञो दे॑व॒या अ॒यं मि॒येध॑ इ॒मा ब्रह्मा॑ण्य॒यमि॑न्द्र॒ सोम॑: ।
स्ती॒र्णं ब॒र्हिरा तु श॑क्र॒ प्र या॑हि॒ पिबा॑ नि॒षद्य॒ वि मु॑चा॒ हरी॑ इ॒ह
o suṣṭu̍ta indra yāhya̱rvāṅupa̱ brahmā̍ṇi mā̱nyasya̍ kā̱roḥ |
vi̱dyāma̱ vasto̱rava̍sā gṛ̱ṇanto̍ vi̱dyāme̱ṣaṃ vṛ̱jana̍ṃ jī̱radā̍num
||5||ओ सुष्टु॑त इन्द्र याह्य॒र्वाङुप॒ ब्रह्मा॑णि मा॒न्यस्य॑ का॒रोः ।
वि॒द्याम॒ वस्तो॒रव॑सा गृ॒णन्तो॑ वि॒द्यामे॒षं वृ॒जनं॑ जी॒रदा॑नुम्