Sūktam 9 — indrehi (10 mantras) — Śākala Saṃhitā (Ṛgveda)

Study

indrehi̱ matsyandha̍so̱ viśve̍bhiḥ soma̱parva̍bhiḥ| ma̱hām̐ a̍bhi̱ṣṭiroja̍sā

||1||

इन्द्रेहि॒ मत्स्यन्ध॑सो॒ विश्वे॑भिः सोम॒पर्व॑भिः। म॒हाँ अ॑भि॒ष्टिरोज॑सा

eme̍naṃ sṛjatā su̱te ma̱ndimindrā̍ya ma̱ndine̍| cakri̱ṃ viśvā̍ni̱ cakra̍ye

||2||

एमे॑नं सृजता सु॒ते म॒न्दिमिन्द्रा॑य म॒न्दिने॑। चक्रिं॒ विश्वा॑नि॒ चक्र॑ये

matsvā̍ suśipra ma̱ndibhi̱: stome̍bhirviśvacarṣaṇe| sacai̱ṣu sava̍ne̱ṣvā

||3||

मत्स्वा॑ सुशिप्र म॒न्दिभि॒: स्तोमे॑भिर्विश्वचर्षणे। सचै॒षु सव॑ने॒ष्वा

asṛ̍gramindra te̱ gira̱: prati̱ tvāmuda̍hāsata| ajo̍ṣā vṛṣa̱bhaṃ pati̍m

||4||

असृ॑ग्रमिन्द्र ते॒ गिर॒: प्रति॒ त्वामुद॑हासत। अजो॑षा वृष॒भं पति॑म्

saṃ co̍daya ci̱trama̱rvāg rādha̍ indra̱ vare̍ṇyam| asa̱dit te̍ vi̱bhu pra̱bhu

||5||

सं चो॑दय चि॒त्रम॒र्वाग् राध॑ इन्द्र॒ वरे॑ण्यम्। अस॒दित् ते॑ वि॒भु प्र॒भु

a̱smāntsu tatra̍ coda̱yendra̍ rā̱ye rabha̍svataḥ| tuvi̍dyumna̱ yaśa̍svataḥ

||6||

अ॒स्मान्त्सु तत्र॑ चोद॒येन्द्र॑ रा॒ये रभ॑स्वतः। तुवि॑द्युम्न॒ यश॑स्वतः

saṃ goma̍dindra̱ vāja̍vada̱sme pṛ̱thu śravo̍ bṛ̱hat| vi̱śvāyu̍rdhe̱hyakṣi̍tam

||7||

सं गोम॑दिन्द्र॒ वाज॑वद॒स्मे पृ॒थु श्रवो॑ बृ॒हत्। वि॒श्वायु॑र्धे॒ह्यक्षि॑तम्

a̱sme dhe̍hi̱ śravo̍ bṛ̱had dyu̱mnaṃ sa̍hasra̱sāta̍mam| indra̱ tā ra̱thinī̱riṣa̍:

||8||

अ॒स्मे धे॑हि॒ श्रवो॑ बृ॒हद् द्यु॒म्नं स॑हस्र॒सात॑मम्। इन्द्र॒ ता र॒थिनी॒रिष॑:

vaso̱rindra̱ṃ vasu̍patiṃ gī̱rbhirgṛ̱ṇanta̍ ṛ̱gmiya̍m| homa̱ gantā̍ramū̱taye̍

||9||

वसो॒रिन्द्रं॒ वसु॑पतिं गी॒र्भिर्गृ॒णन्त॑ ऋ॒ग्मिय॑म्। होम॒ गन्ता॑रमू॒तये॑

su̱te su̍te̱ nyo̍kase bṛ̱had bṛ̍ha̱ta eda̱riḥ| indrā̍ya śū̱ṣama̍rcati

||10||

सु॒ते सु॑ते॒ न्यो॑कसे बृ॒हद् बृ॑ह॒त एद॒रिः। इन्द्रा॑य शू॒षम॑र्चति