Study
- Anukramaṇī
- Source
15 savya āṅgirasaḥ| indraḥ| jagatī, 14-15 triṣṭup|
a̱bhi tyaṃ me̱ṣaṃ pu̍ruhū̱tamṛ̱gmiya̱mindra̍ṃ gī̱rbhirma̍datā̱ vasvo̍ arṇa̱vam |
yasya̱ dyāvo̱ na vi̱cara̍nti̱ mānu̍ṣā bhu̱je maṃhi̍ṣṭhama̱bhi vipra̍marcata
||1||अ॒भि त्यं मे॒षं पु॑रुहू॒तमृ॒ग्मिय॒मिन्द्रं॑ गी॒र्भिर्म॑दता॒ वस्वो॑ अर्ण॒वम् ।
यस्य॒ द्यावो॒ न वि॒चर॑न्ति॒ मानु॑षा भु॒जे मंहि॑ष्ठम॒भि विप्र॑मर्चत
a̱bhīma̍vanvantsvabhi̱ṣṭimū̱tayo̍ 'ntarikṣa̱prāṃ tavi̍ṣībhi̱rāvṛ̍tam |
indra̱ṃ dakṣā̍sa ṛ̱bhavo̍ mada̱cyuta̍ṃ śa̱takra̍tu̱ṃ java̍nī sū̱nṛtāru̍hat
||2||अ॒भीम॑वन्वन्त्स्वभि॒ष्टिमू॒तयो॑ ऽन्तरिक्ष॒प्रां तवि॑षीभि॒रावृ॑तम् ।
इन्द्रं॒ दक्षा॑स ऋ॒भवो॑ मद॒च्युतं॑ श॒तक्र॑तुं॒ जव॑नी सू॒नृतारु॑हत्
tvaṃ go̱tramaṅgi̍robhyo'vṛṇo̱rapo̱tātra̍ye śa̱tadu̍reṣu gātu̱vit |
sa̱sena̍ cid vima̱dāyā̍vaho̱ vasvā̱jāvadri̍ṃ vāvasā̱nasya̍ na̱rtaya̍n
||3||त्वं गो॒त्रमङ्गि॑रोभ्योऽवृणो॒रपो॒तात्र॑ये श॒तदु॑रेषु गातु॒वित् ।
स॒सेन॑ चिद् विम॒दाया॑वहो॒ वस्वा॒जावद्रिं॑ वावसा॒नस्य॑ न॒र्तय॑न्
tvama̱pāma̍pi̱dhānā̍vṛṇo̱rapādhā̍raya̱: parva̍te̱ dānu̍ma̱dvasu̍ |
vṛ̱traṃ yadi̍ndra̱ śava̱sāva̍dhī̱rahi̱mādit sūrya̍ṃ di̱vyāro̍hayo dṛ̱śe
||4||त्वम॒पाम॑पि॒धाना॑वृणो॒रपाधा॑रय॒: पर्व॑ते॒ दानु॑म॒द्वसु॑ ।
वृ॒त्रं यदि॑न्द्र॒ शव॒साव॑धी॒रहि॒मादित् सूर्यं॑ दि॒व्यारो॑हयो दृ॒शे
tvaṃ mā̱yābhi̱rapa̍ mā̱yino̍'dhamaḥ sva̱dhābhi̱rye adhi̱ śuptā̱vaju̍hvata |
tvaṃ pipro̍rnṛmaṇa̱: prāru̍ja̱: pura̱: pra ṛ̱jiśvā̍naṃ dasyu̱hatye̍ṣvāvitha
||5||त्वं मा॒याभि॒रप॑ मा॒यिनो॑ऽधमः स्व॒धाभि॒र्ये अधि॒ शुप्ता॒वजु॑ह्वत ।
त्वं पिप्रो॑र्नृमण॒: प्रारु॑ज॒: पुर॒: प्र ऋ॒जिश्वा॑नं दस्यु॒हत्ये॑ष्वाविथ
tvaṃ kutsa̍ṃ śuṣṇa̱hatye̍ṣvāvi̱thāra̍ndhayo'tithi̱gvāya̱ śamba̍ram |
ma̱hānta̍ṃ cidarbu̱daṃ ni kra̍mīḥ pa̱dā sa̱nāde̱va da̍syu̱hatyā̍ya jajñiṣe
||6||त्वं कुत्सं॑ शुष्ण॒हत्ये॑ष्वावि॒थार॑न्धयोऽतिथि॒ग्वाय॒ शम्ब॑रम् ।
म॒हान्तं॑ चिदर्बु॒दं नि क्र॑मीः प॒दा स॒नादे॒व द॑स्यु॒हत्या॑य जज्ञिषे
tve viśvā̱ tavi̍ṣī sa̱dhrya̍gghi̱tā tava̱ rādha̍: somapī̱thāya̍ harṣate |
tava̱ vajra̍ścikite bā̱hvorhi̱to vṛ̱ścā śatro̱rava̱ viśvā̍ni̱ vṛṣṇyā̍
||7||त्वे विश्वा॒ तवि॑षी स॒ध्र्य॑ग्घि॒ता तव॒ राध॑: सोमपी॒थाय॑ हर्षते ।
तव॒ वज्र॑श्चिकिते बा॒ह्वोर्हि॒तो वृ॒श्चा शत्रो॒रव॒ विश्वा॑नि॒ वृष्ण्या॑
vi jā̍nī̱hyāryā̱nye ca̱ dasya̍vo ba̱rhiṣma̍te randhayā̱ śāsa̍davra̱tān |
śākī̍ bhava̱ yaja̍mānasya codi̱tā viśvet tā te̍ sadha̱māde̍ṣu cākana
||8||वि जा॑नी॒ह्यार्या॒न्ये च॒ दस्य॑वो ब॒र्हिष्म॑ते रन्धया॒ शास॑दव्र॒तान् ।
शाकी॑ भव॒ यज॑मानस्य चोदि॒ता विश्वेत् ता ते॑ सध॒मादे॑षु चाकन
anu̍vratāya ra̱ndhaya̱nnapa̍vratānā̱bhūbhi̱rindra̍: śna̱thaya̱nnanā̍bhuvaḥ |
vṛ̱ddhasya̍ ci̱d vardha̍to̱ dyāmina̍kṣata̱: stavā̍no va̱mro vi ja̍ghāna sa̱ṃdiha̍:
||9||अनु॑व्रताय र॒न्धय॒न्नप॑व्रताना॒भूभि॒रिन्द्र॑: श्न॒थय॒न्नना॑भुवः ।
वृ॒द्धस्य॑ चि॒द् वर्ध॑तो॒ द्यामिन॑क्षत॒: स्तवा॑नो व॒म्रो वि ज॑घान सं॒दिह॑:
takṣa̱d yatta̍ u̱śanā̱ saha̍sā̱ saho̱ vi roda̍sī ma̱jmanā̍ bādhate̱ śava̍: |
ā tvā̱ vāta̍sya nṛmaṇo mano̱yuja̱ ā pūrya̍māṇamavahanna̱bhi śrava̍:
||10||तक्ष॒द् यत्त॑ उ॒शना॒ सह॑सा॒ सहो॒ वि रोद॑सी म॒ज्मना॑ बाधते॒ शव॑: ।
आ त्वा॒ वात॑स्य नृमणो मनो॒युज॒ आ पूर्य॑माणमवहन्न॒भि श्रव॑:
mandi̍ṣṭa̱ yadu̱śane̍ kā̱vye sacā̱m̐ indro̍ va̱ṅkū va̍ṅku̱tarādhi̍ tiṣṭhati |
u̱gro ya̱yiṃ nira̱paḥ srota̍sāsṛja̱dvi śuṣṇa̍sya dṛṃhi̱tā ai̍raya̱tpura̍:
||11||मन्दि॑ष्ट॒ यदु॒शने॑ का॒व्ये सचाँ॒ इन्द्रो॑ व॒ङ्कू व॑ङ्कु॒तराधि॑ तिष्ठति ।
उ॒ग्रो य॒यिं निर॒पः स्रोत॑सासृज॒द्वि शुष्ण॑स्य दृंहि॒ता ऐ॑रय॒त्पुर॑:
ā smā̱ ratha̍ṃ vṛṣa̱pāṇe̍ṣu tiṣṭhasi śāryā̱tasya̱ prabhṛ̍tā̱ yeṣu̱ manda̍se |
indra̱ yathā̍ su̱taso̍meṣu cā̱kano̍'na̱rvāṇa̱ṃ śloka̱mā ro̍hase di̱vi
||12||आ स्मा॒ रथं॑ वृष॒पाणे॑षु तिष्ठसि शार्या॒तस्य॒ प्रभृ॑ता॒ येषु॒ मन्द॑से ।
इन्द्र॒ यथा॑ सु॒तसो॑मेषु चा॒कनो॑ऽन॒र्वाणं॒ श्लोक॒मा रो॑हसे दि॒वि
ada̍dā̱ arbhā̍ṃ maha̱te va̍ca̱syave̍ ka̱kṣīva̍te vṛca̱yāmi̍ndra sunva̱te |
menā̍bhavo vṛṣaṇa̱śvasya̍ sukrato̱ viśvet tā te̱ sava̍neṣu pra̱vācyā̍
||13||अद॑दा॒ अर्भां॑ मह॒ते व॑च॒स्यवे॑ क॒क्षीव॑ते वृच॒यामि॑न्द्र सुन्व॒ते ।
मेना॑भवो वृषण॒श्वस्य॑ सुक्रतो॒ विश्वेत् ता ते॒ सव॑नेषु प्र॒वाच्या॑
indro̍ aśrāyi su̱dhyo̍ nire̱ke pa̱jreṣu̱ stomo̱ duryo̱ na yūpa̍: |
a̱śva̱yurga̱vyū ra̍tha̱yurva̍sū̱yurindra̱ idrā̱yaḥ kṣa̍yati praya̱ntā
||14||इन्द्रो॑ अश्रायि सु॒ध्यो॑ निरे॒के प॒ज्रेषु॒ स्तोमो॒ दुर्यो॒ न यूप॑: ।
अ॒श्व॒युर्ग॒व्यू र॑थ॒युर्व॑सू॒युरिन्द्र॒ इद्रा॒यः क्ष॑यति प्रय॒न्ता
i̱daṃ namo̍ vṛṣa̱bhāya̍ sva̱rāje̍ sa̱tyaśu̍ṣmāya ta̱vase̍'vāci |
a̱sminni̍ndra vṛ̱jane̱ sarva̍vīrā̱: smatsū̱ribhi̱stava̱ śarma̍ntsyāma
||15||इ॒दं नमो॑ वृष॒भाय॑ स्व॒राजे॑ स॒त्यशु॑ष्माय त॒वसे॑ऽवाचि ।
अ॒स्मिन्नि॑न्द्र वृ॒जने॒ सर्व॑वीरा॒: स्मत्सू॒रिभि॒स्तव॒ शर्म॑न्त्स्याम