Study
- Anukramaṇī
- Source
5 kutsa āṅgirasaḥ| ṛbhavaḥ|jagatī, 5 triṣṭup|
takṣa̱n ratha̍ṃ su̱vṛta̍ṃ vidma̱nāpa̍sa̱stakṣa̱n harī̍ indra̱vāhā̱ vṛṣa̍ṇvasū |
takṣa̍n pi̱tṛbhyā̍mṛ̱bhavo̱ yuva̱d vaya̱stakṣa̍n va̱tsāya̍ mā̱tara̍ṃ sacā̱bhuva̍m
||1||तक्ष॒न् रथं॑ सु॒वृतं॑ विद्म॒नाप॑स॒स्तक्ष॒न् हरी॑ इन्द्र॒वाहा॒ वृष॑ण्वसू ।
तक्ष॑न् पि॒तृभ्या॑मृ॒भवो॒ युव॒द् वय॒स्तक्ष॑न् व॒त्साय॑ मा॒तरं॑ सचा॒भुव॑म्
ā no̍ ya̱jñāya̍ takṣata ṛbhu̱madvaya̱: kratve̱ dakṣā̍ya supra̱jāva̍tī̱miṣa̍m |
yathā̱ kṣayā̍ma̱ sarva̍vīrayā vi̱śā tanna̱: śardhā̍ya dhāsathā̱ svi̍ndri̱yam
||2||आ नो॑ य॒ज्ञाय॑ तक्षत ऋभु॒मद्वय॒: क्रत्वे॒ दक्षा॑य सुप्र॒जाव॑ती॒मिष॑म् ।
यथा॒ क्षया॑म॒ सर्व॑वीरया वि॒शा तन्न॒: शर्धा॑य धासथा॒ स्वि॑न्द्रि॒यम्
ā ta̍kṣata sā̱tima̱smabhya̍mṛbhavaḥ sā̱tiṃ rathā̍ya sā̱timarva̍te naraḥ |
sā̱tiṃ no̱ jaitrī̱ṃ saṃ ma̍heta vi̱śvahā̍ jā̱mimajā̍mi̱ṃ pṛta̍nāsu sa̱kṣaṇi̍m
||3||आ त॑क्षत सा॒तिम॒स्मभ्य॑मृभवः सा॒तिं रथा॑य सा॒तिमर्व॑ते नरः ।
सा॒तिं नो॒ जैत्रीं॒ सं म॑हेत वि॒श्वहा॑ जा॒मिमजा॑मिं॒ पृत॑नासु स॒क्षणि॑म्
ṛ̱bhu̱kṣaṇa̱mindra̱mā hu̍va ū̱taya̍ ṛ̱bhūn vājā̍n ma̱ruta̱: soma̍pītaye |
u̱bhā mi̱trāvaru̍ṇā nū̱nama̱śvinā̱ te no̍ hinvantu sā̱taye̍ dhi̱ye ji̱ṣe
||4||ऋ॒भु॒क्षण॒मिन्द्र॒मा हु॑व ऊ॒तय॑ ऋ॒भून् वाजा॑न् म॒रुत॒: सोम॑पीतये ।
उ॒भा मि॒त्रावरु॑णा नू॒नम॒श्विना॒ ते नो॑ हिन्वन्तु सा॒तये॑ धि॒ये जि॒षे
ṛ̱bhurbharā̍ya̱ saṃ śi̍śātu sā̱tiṃ sa̍marya̱jidvājo̍ a̱smām̐ a̍viṣṭu |
tanno̍ mi̱tro varu̍ṇo māmahantā̱madi̍ti̱: sindhu̍: pṛthi̱vī u̱ta dyauḥ
||5||ऋ॒भुर्भरा॑य॒ सं शि॑शातु सा॒तिं स॑मर्य॒जिद्वाजो॑ अ॒स्माँ अ॑विष्टु ।
तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः