Study
- Anukramaṇī
- Source
11 parucchepo daivodāsiḥ | agniḥ| atyaṣṭiḥ, 6 atidhṛtiḥ|
a̱gniṃ hotā̍raṃ manye̱ dāsva̍nta̱ṃ vasu̍ṃ sū̱nuṃ saha̍so jā̱tave̍dasa̱ṃ vipra̱ṃ na jā̱tave̍dasam |
ya ū̱rdhvayā̍ svadhva̱ro de̱vo de̱vācyā̍ kṛ̱pā |
ghṛ̱tasya̱ vibhrā̍ṣṭi̱manu̍ vaṣṭi śo̱ciṣā̱ ''juhvā̍nasya sa̱rpiṣa̍:
||1||अ॒ग्निं होता॑रं मन्ये॒ दास्व॑न्तं॒ वसुं॑ सू॒नुं सह॑सो जा॒तवे॑दसं॒ विप्रं॒ न जा॒तवे॑दसम् ।
य ऊ॒र्ध्वया॑ स्वध्व॒रो दे॒वो दे॒वाच्या॑ कृ॒पा ।
घृ॒तस्य॒ विभ्रा॑ष्टि॒मनु॑ वष्टि शो॒चिषा॒ ऽऽजुह्वा॑नस्य स॒र्पिष॑:
yaji̍ṣṭhaṃ tvā̱ yaja̍mānā huvema̱ jyeṣṭha̱maṅgi̍rasāṃ vipra̱ manma̍bhi̱rvipre̍bhiḥ śukra̱ manma̍bhiḥ |
pari̍jmānamiva̱ dyāṃ hotā̍raṃ carṣaṇī̱nām |
śo̱ciṣke̍śa̱ṃ vṛṣa̍ṇa̱ṃ yami̱mā viśa̱: prāva̍ntu jū̱taye̱ viśa̍:
||2||यजि॑ष्ठं त्वा॒ यज॑माना हुवेम॒ ज्येष्ठ॒मङ्गि॑रसां विप्र॒ मन्म॑भि॒र्विप्रे॑भिः शुक्र॒ मन्म॑भिः ।
परि॑ज्मानमिव॒ द्यां होता॑रं चर्षणी॒नाम् ।
शो॒चिष्के॑शं॒ वृष॑णं॒ यमि॒मा विश॒: प्राव॑न्तु जू॒तये॒ विश॑:
sa hi pu̱rū ci̱doja̍sā vi̱rukma̍tā̱ dīdyā̍no̱ bhava̍ti druhaṃta̱raḥ pa̍ra̱śurna dru̍haṃta̱raḥ |
vī̱l̤u ci̱d yasya̱ samṛ̍tau̱ śruva̱d vane̍va̱ yat sthi̱ram |
ni̱ṣṣaha̍māṇo yamate̱ nāya̍te dhanvā̱sahā̱ nāya̍te
||3||स हि पु॒रू चि॒दोज॑सा वि॒रुक्म॑ता॒ दीद्या॑नो॒ भव॑ति द्रुहंत॒रः प॑र॒शुर्न द्रु॑हंत॒रः ।
वी॒ळु चि॒द् यस्य॒ समृ॑तौ॒ श्रुव॒द् वने॑व॒ यत् स्थि॒रम् ।
नि॒ष्षह॑माणो यमते॒ नाय॑ते धन्वा॒सहा॒ नाय॑ते
dṛ̱hlā ci̍dasmā̱ anu̍ du̱ryathā̍ vi̱de teji̍ṣṭhābhira̱raṇi̍bhirdā̱ṣṭyava̍se̱ 'gnaye̍ dā̱ṣṭyava̍se |
pra yaḥ pu̱rūṇi̱ gāha̍te̱ takṣa̱d vane̍va śo̱ciṣā̍ |
sthi̱rā ci̱dannā̱ ni ri̍ṇā̱tyoja̍sā̱ ni sthi̱rāṇi̍ ci̱doja̍sā
||4||दृ॒ह्ला चि॑दस्मा॒ अनु॑ दु॒र्यथा॑ वि॒दे तेजि॑ष्ठाभिर॒रणि॑भिर्दा॒ष्ट्यव॑से॒ ऽग्नये॑ दा॒ष्ट्यव॑से ।
प्र यः पु॒रूणि॒ गाह॑ते॒ तक्ष॒द् वने॑व शो॒चिषा॑ ।
स्थि॒रा चि॒दन्ना॒ नि रि॑णा॒त्योज॑सा॒ नि स्थि॒राणि॑ चि॒दोज॑सा
tama̍sya pṛ̱kṣamupa̍rāsu dhīmahi̱ nakta̱ṃ yaḥ su̱darśa̍taro̱ divā̍tarā̱daprā̍yuṣe̱ divā̍tarāt |
āda̱syāyu̱rgrabha̍ṇavad vī̱l̤u śarma̱ na sū̱nave̍ |
bha̱ktamabha̍kta̱mavo̱ vyanto̍ a̱jarā̍ a̱gnayo̱ vyanto̍ a̱jarā̍:
||5||तम॑स्य पृ॒क्षमुप॑रासु धीमहि॒ नक्तं॒ यः सु॒दर्श॑तरो॒ दिवा॑तरा॒दप्रा॑युषे॒ दिवा॑तरात् ।
आद॒स्यायु॒र्ग्रभ॑णवद् वी॒ळु शर्म॒ न सू॒नवे॑ ।
भ॒क्तमभ॑क्त॒मवो॒ व्यन्तो॑ अ॒जरा॑ अ॒ग्नयो॒ व्यन्तो॑ अ॒जरा॑:
sa hi śardho̱ na māru̍taṃ tuvi̱ṣvaṇi̱rapna̍svatīṣū̱rvarā̍svi̱ṣṭani̱rārta̍nāsvi̱ṣṭani̍: |
āda̍ddha̱vyānyā̍da̱dirya̱jñasya̍ ke̱tura̱rhaṇā̍ |
adha̍ smāsya̱ harṣa̍to̱ hṛṣī̍vato̱ viśve̍ juṣanta̱ panthā̱ṃ nara̍: śu̱bhe na panthā̍m
||6||स हि शर्धो॒ न मारु॑तं तुवि॒ष्वणि॒रप्न॑स्वतीषू॒र्वरा॑स्वि॒ष्टनि॒रार्त॑नास्वि॒ष्टनि॑: ।
आद॑द्ध॒व्यान्या॑द॒दिर्य॒ज्ञस्य॑ के॒तुर॒र्हणा॑ ।
अध॑ स्मास्य॒ हर्ष॑तो॒ हृषी॑वतो॒ विश्वे॑ जुषन्त॒ पन्थां॒ नर॑: शु॒भे न पन्था॑म्
dvi̱tā yadī̍ṃ kī̱stāso̍ a̱bhidya̍vo nama̱syanta̍ upa̱voca̍nta̱ bhṛga̍vo ma̱thnanto̍ dā̱śā bhṛga̍vaḥ |
a̱gnirī̍śe̱ vasū̍nā̱ṃ śuci̱ryo dha̱rṇire̍ṣām |
pri̱yām̐ a̍pi̱dhīm̐rva̍niṣīṣṭa̱ medhi̍ra̱ ā va̍niṣīṣṭa̱ medhi̍raḥ
||7||द्वि॒ता यदीं॑ की॒स्तासो॑ अ॒भिद्य॑वो नम॒स्यन्त॑ उप॒वोच॑न्त॒ भृग॑वो म॒थ्नन्तो॑ दा॒शा भृग॑वः ।
अ॒ग्निरी॑शे॒ वसू॑नां॒ शुचि॒र्यो ध॒र्णिरे॑षाम् ।
प्रि॒याँ अ॑पि॒धीँर्व॑निषीष्ट॒ मेधि॑र॒ आ व॑निषीष्ट॒ मेधि॑रः
viśvā̍sāṃ tvā vi̱śāṃ pati̍ṃ havāmahe̱ sarvā̍sāṃ samā̱naṃ dampa̍tiṃ bhu̱je sa̱tyagi̍rvāhasaṃ bhu̱je |
ati̍thi̱ṃ mānu̍ṣāṇāṃ pi̱turna yasyā̍sa̱yā |
a̱mī ca̱ viśve̍ a̱mṛtā̍sa̱ ā vayo̍ ha̱vyā de̱veṣvā vaya̍:
||8||विश्वा॑सां त्वा वि॒शां पतिं॑ हवामहे॒ सर्वा॑सां समा॒नं दम्प॑तिं भु॒जे स॒त्यगि॑र्वाहसं भु॒जे ।
अति॑थिं॒ मानु॑षाणां पि॒तुर्न यस्या॑स॒या ।
अ॒मी च॒ विश्वे॑ अ॒मृता॑स॒ आ वयो॑ ह॒व्या दे॒वेष्वा वय॑:
tvama̍gne̱ saha̍sā̱ saha̍ntamaḥ śu̱ṣminta̍mo jāyase de̱vatā̍taye ra̱yirna de̱vatā̍taye |
śu̱ṣminta̍mo̱ hi te̱ mado̍ dyu̱mninta̍ma u̱ta kratu̍: |
adha̍ smā te̱ pari̍ carantyajara śruṣṭī̱vāno̱ nāja̍ra
||9||त्वम॑ग्ने॒ सह॑सा॒ सह॑न्तमः शु॒ष्मिन्त॑मो जायसे दे॒वता॑तये र॒यिर्न दे॒वता॑तये ।
शु॒ष्मिन्त॑मो॒ हि ते॒ मदो॑ द्यु॒म्निन्त॑म उ॒त क्रतु॑: ।
अध॑ स्मा ते॒ परि॑ चरन्त्यजर श्रुष्टी॒वानो॒ नाज॑र
pra vo̍ ma̱he saha̍sā̱ saha̍svata uṣa̱rbudhe̍ paśu̱ṣe nāgnaye̱ stomo̍ babhūtva̱gnaye̍ |
prati̱ yadī̍ṃ ha̱viṣmā̱n viśvā̍su̱ kṣāsu̱ jogu̍ve |
agre̍ re̱bho na ja̍rata ṛṣū̱ṇāṃ jūrṇi̱rhota̍ ṛṣū̱ṇām
||10||प्र वो॑ म॒हे सह॑सा॒ सह॑स्वत उष॒र्बुधे॑ पशु॒षे नाग्नये॒ स्तोमो॑ बभूत्व॒ग्नये॑ ।
प्रति॒ यदीं॑ ह॒विष्मा॒न् विश्वा॑सु॒ क्षासु॒ जोगु॑वे ।
अग्रे॑ रे॒भो न ज॑रत ऋषू॒णां जूर्णि॒र्होत॑ ऋषू॒णाम्
sa no̱ nedi̍ṣṭha̱ṃ dadṛ̍śāna̱ ā bha̱rāgne̍ de̱vebhi̱: saca̍nāḥ suce̱tunā̍ ma̱ho rā̱yaḥ su̍ce̱tunā̍ |
mahi̍ śaviṣṭha naskṛdhi sa̱ṃcakṣe̍ bhu̱je a̱syai |
mahi̍ sto̱tṛbhyo̍ maghavan tsu̱vīrya̱ṃ mathī̍ru̱gro na śava̍sā
||11||स नो॒ नेदि॑ष्ठं॒ ददृ॑शान॒ आ भ॒राग्ने॑ दे॒वेभि॒: सच॑नाः सुचे॒तुना॑ म॒हो रा॒यः सु॑चे॒तुना॑ ।
महि॑ शविष्ठ नस्कृधि सं॒चक्षे॑ भु॒जे अ॒स्यै ।
महि॑ स्तो॒तृभ्यो॑ मघवन् त्सु॒वीर्यं॒ मथी॑रु॒ग्रो न शव॑सा