Sūktam 7 — indramidgāthino (10 mantras) — Śākala Saṃhitā (Ṛgveda)

Study

indra̱midgā̱thino̍ bṛ̱hadindra̍ma̱rkebhi̍ra̱rkiṇa̍:| indra̱ṃ vāṇī̍ranūṣata

||1||

इन्द्र॒मिद्गा॒थिनो॑ बृ॒हदिन्द्र॑म॒र्केभि॑र॒र्किण॑:। इन्द्रं॒ वाणी॑रनूषत

indra̱ iddharyo̱: sacā̱ saṃmi̍śla̱ ā va̍co̱yujā̍| indro̍ va̱jrī hi̍ra̱ṇyaya̍:

||2||

इन्द्र॒ इद्धर्यो॒: सचा॒ संमि॑श्ल॒ आ व॑चो॒युजा॑। इन्द्रो॑ व॒ज्री हि॑र॒ण्यय॑:

indro̍ dī̱rghāya̱ cakṣa̍sa̱ ā sūrya̍ṃ rohayad di̱vi| vi gobhi̱radri̍mairayat

||3||

इन्द्रो॑ दी॒र्घाय॒ चक्ष॑स॒ आ सूर्यं॑ रोहयद् दि॒वि। वि गोभि॒रद्रि॑मैरयत्

indra̱ vāje̍ṣu no'va sa̱hasra̍pradhaneṣu ca| u̱gra u̱grābhi̍rū̱tibhi̍:

||4||

इन्द्र॒ वाजे॑षु नोऽव स॒हस्र॑प्रधनेषु च। उ॒ग्र उ॒ग्राभि॑रू॒तिभि॑:

indra̍ṃ va̱yaṃ ma̍hādha̱na indra̱marbhe̍ havāmahe| yuja̍ṃ vṛ̱treṣu̍ va̱jriṇa̍m

||5||

इन्द्रं॑ व॒यं म॑हाध॒न इन्द्र॒मर्भे॑ हवामहे। युजं॑ वृ॒त्रेषु॑ व॒ज्रिण॑म्

sa no̍ vṛṣanna̱muṃ ca̱ruṃ satrā̍dāva̱nnapā̍ vṛdhi| a̱smabhya̱mapra̍tiṣkutaḥ

||6||

स नो॑ वृषन्न॒मुं च॒रुं सत्रा॑दाव॒न्नपा॑ वृधि। अ॒स्मभ्य॒मप्र॑तिष्कुतः

tu̱ñjetu̍ñje̱ ya utta̍re̱ stomā̱ indra̍sya va̱jriṇa̍:| na vi̍ndhe asya suṣṭu̱tim

||7||

तु॒ञ्जेतु॑ञ्जे॒ य उत्त॑रे॒ स्तोमा॒ इन्द्र॑स्य व॒ज्रिण॑:। न वि॑न्धे अस्य सुष्टु॒तिम्

vṛṣā̍ yū̱theva̱ vaṃsa̍gaḥ kṛ̱ṣṭīri̍ya̱rtyoja̍sā| īśā̍no̱ apra̍tiṣkutaḥ

||8||

वृषा॑ यू॒थेव॒ वंस॑गः कृ॒ष्टीरि॑य॒र्त्योज॑सा। ईशा॑नो॒ अप्र॑तिष्कुतः

ya eka̍ścarṣaṇī̱nāṃ vasū̍nāmira̱jyati̍| indra̱: pañca̍ kṣitī̱nām

||9||

य एक॑श्चर्षणी॒नां वसू॑नामिर॒ज्यति॑। इन्द्र॒: पञ्च॑ क्षिती॒नाम्

indra̍ṃ vo vi̱śvata̱spari̱ havā̍mahe̱ jane̍bhyaḥ| a̱smāka̍mastu̱ keva̍laḥ

||10||

इन्द्रं॑ वो वि॒श्वत॒स्परि॒ हवा॑महे॒ जने॑भ्यः। अ॒स्माक॑मस्तु॒ केव॑लः