Study
- Anukramaṇī
- Source
10 parāśaraḥ śāktyaḥ| agniḥ| triṣṭup|
ra̱yirna yaḥ pi̍tṛvi̱tto va̍yo̱dhāḥ su̱praṇī̍tiściki̱tuṣo̱ na śāsu̍: |
syo̱na̱śīrati̍thi̱rna prī̍ṇā̱no hote̍va̱ sadma̍ vidha̱to vi tā̍rīt
||1||र॒यिर्न यः पि॑तृवि॒त्तो व॑यो॒धाः सु॒प्रणी॑तिश्चिकि॒तुषो॒ न शासु॑: ।
स्यो॒न॒शीरति॑थि॒र्न प्री॑णा॒नो होते॑व॒ सद्म॑ विध॒तो वि ता॑रीत्
de̱vo na yaḥ sa̍vi̱tā sa̱tyama̍nmā̱ kratvā̍ ni̱pāti̍ vṛ̱janā̍ni̱ viśvā̍ |
pu̱ru̱pra̱śa̱sto a̱mati̱rna sa̱tya ā̱tmeva̱ śevo̍ didhi̱ṣāyyo̍ bhūt
||2||दे॒वो न यः स॑वि॒ता स॒त्यम॑न्मा॒ क्रत्वा॑ नि॒पाति॑ वृ॒जना॑नि॒ विश्वा॑ ।
पु॒रु॒प्र॒श॒स्तो अ॒मति॒र्न स॒त्य आ॒त्मेव॒ शेवो॑ दिधि॒षाय्यो॑ भूत्
de̱vo na yaḥ pṛ̍thi̱vīṃ vi̱śvadhā̍yā upa̱kṣeti̍ hi̱tami̍tro̱ na rājā̍ |
pu̱ra̱:sada̍: śarma̱sado̱ na vī̱rā a̍nava̱dyā pati̍juṣṭeva̱ nārī̍
||3||दे॒वो न यः पृ॑थि॒वीं वि॒श्वधा॑या उप॒क्षेति॑ हि॒तमि॑त्रो॒ न राजा॑ ।
पु॒र॒:सद॑: शर्म॒सदो॒ न वी॒रा अ॑नव॒द्या पति॑जुष्टेव॒ नारी॑
taṃ tvā̱ naro̱ dama̱ ā nitya̍mi̱ddhamagne̱ saca̍nta kṣi̱tiṣu̍ dhru̱vāsu̍ |
adhi̍ dyu̱mnaṃ ni da̍dhu̱rbhūrya̍smi̱n bhavā̍ vi̱śvāyu̍rdha̱ruṇo̍ rayī̱ṇām
||4||तं त्वा॒ नरो॒ दम॒ आ नित्य॑मि॒द्धमग्ने॒ सच॑न्त क्षि॒तिषु॑ ध्रु॒वासु॑ ।
अधि॑ द्यु॒म्नं नि द॑धु॒र्भूर्य॑स्मि॒न् भवा॑ वि॒श्वायु॑र्ध॒रुणो॑ रयी॒णाम्
vi pṛkṣo̍ agne ma̱ghavā̍no aśyu̱rvi sū̱rayo̱ dada̍to̱ viśva̱māyu̍: |
sa̱nema̱ vāja̍ṃ sami̱theṣva̱ryo bhā̱gaṃ de̱veṣu̱ śrava̍se̱ dadhā̍nāḥ
||5||वि पृक्षो॑ अग्ने म॒घवा॑नो अश्यु॒र्वि सू॒रयो॒ दद॑तो॒ विश्व॒मायु॑: ।
स॒नेम॒ वाजं॑ समि॒थेष्व॒र्यो भा॒गं दे॒वेषु॒ श्रव॑से॒ दधा॑नाः
ṛ̱tasya̱ hi dhe̱navo̍ vāvaśā̱nāḥ smadū̍dhnīḥ pī̱paya̍nta̱ dyubha̍ktāḥ |
pa̱rā̱vata̍: suma̱tiṃ bhikṣa̍māṇā̱ vi sindha̍vaḥ sa̱mayā̍ sasru̱radri̍m
||6||ऋ॒तस्य॒ हि धे॒नवो॑ वावशा॒नाः स्मदू॑ध्नीः पी॒पय॑न्त॒ द्युभ॑क्ताः ।
प॒रा॒वत॑: सुम॒तिं भिक्ष॑माणा॒ वि सिन्ध॑वः स॒मया॑ सस्रु॒रद्रि॑म्
tve a̍gne suma̱tiṃ bhikṣa̍māṇā di̱vi śravo̍ dadhire ya̱jñiyā̍saḥ |
naktā̍ ca ca̱kruru̱ṣasā̱ virū̍pe kṛ̱ṣṇaṃ ca̱ varṇa̍maru̱ṇaṃ ca̱ saṃ dhu̍:
||7||त्वे अ॑ग्ने सुम॒तिं भिक्ष॑माणा दि॒वि श्रवो॑ दधिरे य॒ज्ञिया॑सः ।
नक्ता॑ च च॒क्रुरु॒षसा॒ विरू॑पे कृ॒ष्णं च॒ वर्ण॑मरु॒णं च॒ सं धु॑:
yān rā̱ye martā̱ntsuṣū̍do agne̱ te syā̍ma ma̱ghavā̍no va̱yaṃ ca̍ |
chā̱yeva̱ viśva̱ṃ bhuva̍naṃ sisakṣyāpapri̱vān roda̍sī a̱ntari̍kṣam
||8||यान् रा॒ये मर्ता॒न्त्सुषू॑दो अग्ने॒ ते स्या॑म म॒घवा॑नो व॒यं च॑ ।
छा॒येव॒ विश्वं॒ भुव॑नं सिसक्ष्यापप्रि॒वान् रोद॑सी अ॒न्तरि॑क्षम्
arva̍dbhiragne̱ arva̍to̱ nṛbhi̱rnṝn vī̱rairvī̱rān va̍nuyāmā̱ tvotā̍: |
ī̱śā̱nāsa̍: pitṛvi̱ttasya̍ rā̱yo vi sū̱raya̍: śa̱tahi̍mā no aśyuḥ
||9||अर्व॑द्भिरग्ने॒ अर्व॑तो॒ नृभि॒र्नॄन् वी॒रैर्वी॒रान् व॑नुयामा॒ त्वोता॑: ।
ई॒शा॒नास॑: पितृवि॒त्तस्य॑ रा॒यो वि सू॒रय॑: श॒तहि॑मा नो अश्युः
e̱tā te̍ agna u̱cathā̍ni vedho̱ juṣṭā̍ni santu̱ mana̍se hṛ̱de ca̍ |
śa̱kema̍ rā̱yaḥ su̱dhuro̱ yama̱ṃ te 'dhi̱ śravo̍ de̱vabha̍kta̱ṃ dadhā̍nāḥ
||10||ए॒ता ते॑ अग्न उ॒चथा॑नि वेधो॒ जुष्टा॑नि सन्तु॒ मन॑से हृ॒दे च॑ ।
श॒केम॑ रा॒यः सु॒धुरो॒ यमं॒ ते ऽधि॒ श्रवो॑ दे॒वभ॑क्तं॒ दधा॑नाः