Study
- Anukramaṇī
- Source
11 parucchepo daivodāsiḥ | 1 viśve devāḥ, 2 mitrā varuṇau, 3-5 aśvinau, 6 indraḥ, 7 agniḥ, 8 marutaḥ, 9 indrāgnī, 10 bṛhaspatiḥ, 11 viśve devāḥ| atyaṣṭiḥ, 5 bṛhatī, 11 triṣṭup
astu̱ śrauṣa̍ṭ pu̱ro a̱gniṃ dhi̱yā da̍dha̱ ā nu tacchardho̍ di̱vyaṃ vṛ̍ṇīmaha indravā̱yū vṛ̍ṇīmahe |
yaddha̍ krā̱ṇā vi̱vasva̍ti̱ nābhā̍ sa̱ṃdāyi̱ navya̍sī |
adha̱ pra sū na̱ upa̍ yantu dhī̱tayo̍ de̱vām̐ acchā̱ na dhī̱taya̍:
||1||अस्तु॒ श्रौष॑ट् पु॒रो अ॒ग्निं धि॒या द॑ध॒ आ नु तच्छर्धो॑ दि॒व्यं वृ॑णीमह इन्द्रवा॒यू वृ॑णीमहे ।
यद्ध॑ क्रा॒णा वि॒वस्व॑ति॒ नाभा॑ सं॒दायि॒ नव्य॑सी ।
अध॒ प्र सू न॒ उप॑ यन्तु धी॒तयो॑ दे॒वाँ अच्छा॒ न धी॒तय॑:
yaddha̱ tyanmi̍trāvaruṇāvṛ̱tādadhyā̍da̱dāthe̱ anṛ̍ta̱ṃ svena̍ ma̱nyunā̱ dakṣa̍sya̱ svena̍ ma̱nyunā̍ |
yu̱vori̱tthādhi̱ sadma̱svapa̍śyāma hira̱ṇyaya̍m |
dhī̱bhiśca̱na mana̍sā̱ svebhi̍ra̱kṣabhi̱: soma̍sya̱ svebhi̍ra̱kṣabhi̍:
||2||यद्ध॒ त्यन्मि॑त्रावरुणावृ॒तादध्या॑द॒दाथे॒ अनृ॑तं॒ स्वेन॑ म॒न्युना॒ दक्ष॑स्य॒ स्वेन॑ म॒न्युना॑ ।
यु॒वोरि॒त्थाधि॒ सद्म॒स्वप॑श्याम हिर॒ण्यय॑म् ।
धी॒भिश्च॒न मन॑सा॒ स्वेभि॑र॒क्षभि॒: सोम॑स्य॒ स्वेभि॑र॒क्षभि॑:
yu̱vāṃ stome̍bhirdeva̱yanto̍ aśvinā ''śrā̱vaya̍nta iva̱ śloka̍mā̱yavo̍ yu̱vāṃ ha̱vyābhyā̱ 3 yava̍: |
yu̱vorviśvā̱ adhi̱ śriya̱: pṛkṣa̍śca viśvavedasā |
pru̱ṣā̱yante̍ vāṃ pa̱vayo̍ hira̱ṇyaye̱ rathe̍ dasrā hira̱ṇyaye̍
||3||यु॒वां स्तोमे॑भिर्देव॒यन्तो॑ अश्विना ऽऽश्रा॒वय॑न्त इव॒ श्लोक॑मा॒यवो॑ यु॒वां ह॒व्याभ्या॒ ३ यव॑: ।
यु॒वोर्विश्वा॒ अधि॒ श्रिय॒: पृक्ष॑श्च विश्ववेदसा ।
प्रु॒षा॒यन्ते॑ वां प॒वयो॑ हिर॒ण्यये॒ रथे॑ दस्रा हिर॒ण्यये॑
ace̍ti dasrā̱ vyu 1 nāka̍mṛṇvatho yu̱ñjate̍ vāṃ ratha̱yujo̱ divi̍ṣṭiṣvadhva̱smāno̱ divi̍ṣṭiṣu |
adhi̍ vā̱ṃ sthāma̍ va̱ndhure̱ rathe̍ dasrā hira̱ṇyaye̍ |
pa̱theva̱ yantā̍vanu̱śāsa̍tā̱ rajo 'ñja̍sā̱ śāsa̍tā̱ raja̍:
||4||अचे॑ति दस्रा॒ व्यु १ नाक॑मृण्वथो यु॒ञ्जते॑ वां रथ॒युजो॒ दिवि॑ष्टिष्वध्व॒स्मानो॒ दिवि॑ष्टिषु ।
अधि॑ वां॒ स्थाम॑ व॒न्धुरे॒ रथे॑ दस्रा हिर॒ण्यये॑ ।
प॒थेव॒ यन्ता॑वनु॒शास॑ता॒ रजो ऽञ्ज॑सा॒ शास॑ता॒ रज॑:
śacī̍bhirnaḥ śacīvasū̱ divā̱ nakta̍ṃ daśasyatam |
mā vā̍ṃ rā̱tirupa̍ dasa̱t kadā̍ ca̱nāsmadrā̱tiḥ kadā̍ ca̱na
||5||शची॑भिर्नः शचीवसू॒ दिवा॒ नक्तं॑ दशस्यतम् ।
मा वां॑ रा॒तिरुप॑ दस॒त् कदा॑ च॒नास्मद्रा॒तिः कदा॑ च॒न
vṛṣa̍nnindra vṛṣa̱pāṇā̍sa̱ inda̍va i̱me su̱tā adri̍ṣutāsa u̱dbhida̱stubhya̍ṃ su̱tāsa̍ u̱dbhida̍: |
te tvā̍ mandantu dā̱vane̍ ma̱he ci̱trāya̱ rādha̍se |
gī̱rbhirgi̍rvāha̱: stava̍māna̱ ā ga̍hi sumṛl̤ī̱ko na̱ ā ga̍hi
||6||वृष॑न्निन्द्र वृष॒पाणा॑स॒ इन्द॑व इ॒मे सु॒ता अद्रि॑षुतास उ॒द्भिद॒स्तुभ्यं॑ सु॒तास॑ उ॒द्भिद॑: ।
ते त्वा॑ मन्दन्तु दा॒वने॑ म॒हे चि॒त्राय॒ राध॑से ।
गी॒र्भिर्गि॑र्वाह॒: स्तव॑मान॒ आ ग॑हि सुमृळी॒को न॒ आ ग॑हि
o ṣū ṇo̍ agne śṛṇuhi̱ tvamī̍l̤i̱to de̱vebhyo̍ bravasi ya̱jñiye̍bhyo̱ rāja̍bhyo ya̱jñiye̍bhyaḥ |
yaddha̱ tyāmaṅgi̍robhyo dhe̱nuṃ de̍vā̱ ada̍ttana |
vi tāṃ du̍hre arya̱mā ka̱rtarī̱ sacā̍m̐ e̱ṣa tāṃ ve̍da me̱ sacā̍ mo ṣu vo̍ a̱smada̱bhi tāni̱ pauṃsyā̱ sanā̍ bhūvandyu̱mnāni̱ mota jā̍riṣura̱smat pu̱rota jā̍riṣuḥ |
yad va̍ści̱traṃ yu̱geyu̍ge̱ navya̱ṃ ghoṣā̱dama̍rtyam |
a̱smāsu̱ tanma̍ruto̱ yacca̍ du̱ṣṭara̍ṃ didhṛ̱tā yacca̍ du̱ṣṭara̍m
||8||ओ षू णो॑ अग्ने शृणुहि॒ त्वमी॑ळि॒तो दे॒वेभ्यो॑ ब्रवसि य॒ज्ञिये॑भ्यो॒ राज॑भ्यो य॒ज्ञिये॑भ्यः ।
यद्ध॒ त्यामङ्गि॑रोभ्यो धे॒नुं दे॑वा॒ अद॑त्तन ।
वि तां दु॑ह्रे अर्य॒मा क॒र्तरी॒ सचाँ॑ ए॒ष तां वे॑द मे॒ सचा॑ ॥
मो षु वो॑ अ॒स्मद॒भि तानि॒ पौंस्या॒ सना॑ भूवन्द्यु॒म्नानि॒ मोत जा॑रिषुर॒स्मत् पु॒रोत जा॑रिषुः ।
यद् व॑श्चि॒त्रं यु॒गेयु॑गे॒ नव्यं॒ घोषा॒दम॑र्त्यम् ।
अ॒स्मासु॒ तन्म॑रुतो॒ यच्च॑ दु॒ष्टरं॑ दिधृ॒ता यच्च॑ दु॒ष्टर॑म्
da̱dhyaṅ ha̍ me ja̱nuṣa̱ṃ pūrvo̱ aṅgi̍rāḥ pri̱yame̍dha̱: kaṇvo̱ atri̱rmanu̍rvidu̱ste me̱ pūrve̱ manu̍rviduḥ |
teṣā̍ṃ de̱veṣvāya̍tira̱smāka̱ṃ teṣu̱ nābha̍yaḥ |
teṣā̍ṃ pa̱dena̱ mahyā na̍me gi̱rendrā̱gnī ā na̍me gi̱rā
||9||द॒ध्यङ् ह॑ मे ज॒नुषं॒ पूर्वो॒ अङ्गि॑राः प्रि॒यमे॑ध॒: कण्वो॒ अत्रि॒र्मनु॑र्विदु॒स्ते मे॒ पूर्वे॒ मनु॑र्विदुः ।
तेषां॑ दे॒वेष्वाय॑तिर॒स्माकं॒ तेषु॒ नाभ॑यः ।
तेषां॑ प॒देन॒ मह्या न॑मे गि॒रेन्द्रा॒ग्नी आ न॑मे गि॒रा
hotā̍ yakṣad va̱nino̍ vanta̱ vārya̱ṃ bṛha̱spati̍ryajati ve̱na u̱kṣabhi̍: puru̱vāre̍bhiru̱kṣabhi̍: |
ja̱gṛ̱bhmā dū̱raā̍diśa̱ṃ śloka̱madre̱radha̱ tmanā̍ |
adhā̍rayadara̱rindā̍ni su̱kratu̍: pu̱rū sadmā̍ni su̱kratu̍:
||10||होता॑ यक्षद् व॒निनो॑ वन्त॒ वार्यं॒ बृह॒स्पति॑र्यजति वे॒न उ॒क्षभि॑: पुरु॒वारे॑भिरु॒क्षभि॑: ।
ज॒गृ॒भ्मा दू॒रआ॑दिशं॒ श्लोक॒मद्रे॒रध॒ त्मना॑ ।
अधा॑रयदर॒रिन्दा॑नि सु॒क्रतु॑: पु॒रू सद्मा॑नि सु॒क्रतु॑:
ye de̍vāso di̱vyekā̍daśa̱ stha pṛ̍thi̱vyāmadhyekā̍daśa̱ stha |
a̱psu̱kṣito̍ mahi̱naikā̍daśa̱ stha te de̍vāso ya̱jñami̱maṃ ju̍ṣadhvam
||11||ये दे॑वासो दि॒व्येका॑दश॒ स्थ पृ॑थि॒व्यामध्येका॑दश॒ स्थ ।
अ॒प्सु॒क्षितो॑ महि॒नैका॑दश॒ स्थ ते दे॑वासो य॒ज्ञमि॒मं जु॑षध्वम्