Study
- Anukramaṇī
- Source
13 dīrghatamā aucathyaḥ| (āprīsūktaṃ)-1 idhmaḥ samiddho'gnirvā, 2 tanūna pāt, 3 narāśaṃsaḥ, 4 il̤aḥ, 5 barhiḥ, 6 devīḥ dvāraḥ, 7 uṣāsānaktā 8 daivyo hotārau pracetasau, 9 tisro devyaḥ sarasvatīl̤ā bhāratyaḥ, 10 tvaṣṭā, 11 vanaspatiḥ, 12 svāhā kṛtayaḥ, 13 indraḥ| anuṣṭup|
sami̍ddho agna̱ ā va̍ha de̱vām̐ a̱dya ya̱tasru̍ce | tantu̍ṃ tanuṣva pū̱rvyaṃ su̱taso̍māya dā̱śuṣe̍
||1||समि॑द्धो अग्न॒ आ व॑ह दे॒वाँ अ॒द्य य॒तस्रु॑चे । तन्तुं॑ तनुष्व पू॒र्व्यं सु॒तसो॑माय दा॒शुषे॑
ghṛ̱tava̍nta̱mupa̍ māsi̱ madhu̍mantaṃ tanūnapāt | ya̱jñaṃ vipra̍sya̱ māva̍taḥ śaśamā̱nasya̍ dā̱śuṣa̍:
||2||घृ॒तव॑न्त॒मुप॑ मासि॒ मधु॑मन्तं तनूनपात् । य॒ज्ञं विप्र॑स्य॒ माव॑तः शशमा॒नस्य॑ दा॒शुष॑:
śuci̍: pāva̱ko adbhu̍to̱ madhvā̍ ya̱jñaṃ mi̍mikṣati | narā̱śaṃsa̱strirā di̱vo de̱vo de̱veṣu̍ ya̱jñiya̍:
||3||शुचि॑: पाव॒को अद्भु॑तो॒ मध्वा॑ य॒ज्ञं मि॑मिक्षति । नरा॒शंस॒स्त्रिरा दि॒वो दे॒वो दे॒वेषु॑ य॒ज्ञिय॑:
ī̱l̤i̱to a̍gna̱ ā va̱hendra̍ṃ ci̱trami̱ha pri̱yam | i̱yaṃ hi tvā̍ ma̱tirmamācchā̍ sujihva va̱cyate̍
||4||ई॒ळि॒तो अ॑ग्न॒ आ व॒हेन्द्रं॑ चि॒त्रमि॒ह प्रि॒यम् । इ॒यं हि त्वा॑ म॒तिर्ममाच्छा॑ सुजिह्व व॒च्यते॑
stṛ̱ṇā̱nāso̍ ya̱tasru̍co ba̱rhirya̱jñe sva̍dhva̱re | vṛ̱ñje de̱vavya̍castama̱mindrā̍ya̱ śarma̍ sa̱pratha̍:
||5||स्तृ॒णा॒नासो॑ य॒तस्रु॑चो ब॒र्हिर्य॒ज्ञे स्व॑ध्व॒रे । वृ॒ञ्जे दे॒वव्य॑चस्तम॒मिन्द्रा॑य॒ शर्म॑ स॒प्रथ॑:
vi śra̍yantāmṛtā̱vṛdha̍: pra̱yai de̱vebhyo̍ ma̱hīḥ | pā̱va̱kāsa̍: puru̱spṛho̱ dvāro̍ de̱vīra̍sa̱ścata̍:
||6||वि श्र॑यन्तामृता॒वृध॑: प्र॒यै दे॒वेभ्यो॑ म॒हीः । पा॒व॒कास॑: पुरु॒स्पृहो॒ द्वारो॑ दे॒वीर॑स॒श्चत॑:
ā bhanda̍māne̱ upā̍ke̱ nakto̱ṣāsā̍ su̱peśa̍sā | ya̱hvī ṛ̱tasya̍ mā̱tarā̱ sīda̍tāṃ ba̱rhirā su̱mat
||7||आ भन्द॑माने॒ उपा॑के॒ नक्तो॒षासा॑ सु॒पेश॑सा । य॒ह्वी ऋ॒तस्य॑ मा॒तरा॒ सीद॑तां ब॒र्हिरा सु॒मत्
ma̱ndraji̍hvā jugu̱rvaṇī̱ hotā̍rā̱ daivyā̍ ka̱vī | ya̱jñaṃ no̍ yakṣatāmi̱maṃ si̱dhrama̱dya di̍vi̱spṛśa̍m
||8||म॒न्द्रजि॑ह्वा जुगु॒र्वणी॒ होता॑रा॒ दैव्या॑ क॒वी । य॒ज्ञं नो॑ यक्षतामि॒मं सि॒ध्रम॒द्य दि॑वि॒स्पृश॑म्
śuci̍rde̱veṣvarpi̍tā̱ hotrā̍ ma̱rutsu̱ bhāra̍tī | il̤ā̱ sara̍svatī ma̱hī ba̱rhiḥ sī̍dantu ya̱jñiyā̍:
||9||शुचि॑र्दे॒वेष्वर्पि॑ता॒ होत्रा॑ म॒रुत्सु॒ भार॑ती । इळा॒ सर॑स्वती म॒ही ब॒र्हिः सी॑दन्तु य॒ज्ञिया॑:
tanna̍stu̱rīpa̱madbhu̍taṃ pu̱ru vāra̍ṃ pu̱ru tmanā̍ | tvaṣṭā̱ poṣā̍ya̱ vi ṣya̍tu rā̱ye nābhā̍ no asma̱yuḥ
||10||तन्न॑स्तु॒रीप॒मद्भु॑तं पु॒रु वारं॑ पु॒रु त्मना॑ । त्वष्टा॒ पोषा॑य॒ वि ष्य॑तु रा॒ये नाभा॑ नो अस्म॒युः
a̱va̱sṛ̱jannupa̱ tmanā̍ de̱vān ya̍kṣi vanaspate | a̱gnirha̱vyā su̍ṣūdati de̱vo de̱veṣu̱ medhi̍raḥ
||11||अ॒व॒सृ॒जन्नुप॒ त्मना॑ दे॒वान् य॑क्षि वनस्पते । अ॒ग्निर्ह॒व्या सु॑षूदति दे॒वो दे॒वेषु॒ मेधि॑रः
pū̱ṣa̱ṇvate̍ ma̱rutva̍te vi̱śvade̍vāya vā̱yave̍ | svāhā̍ gāya̱trave̍pase ha̱vyamindrā̍ya kartana
||12||पू॒ष॒ण्वते॑ म॒रुत्व॑ते वि॒श्वदे॑वाय वा॒यवे॑ । स्वाहा॑ गाय॒त्रवे॑पसे ह॒व्यमिन्द्रा॑य कर्तन
svāhā̍kṛtā̱nyā ga̱hyupa̍ ha̱vyāni̍ vī̱taye̍ | indrā ga̍hi śru̱dhī hava̱ṃ tvāṃ ha̍vante adhva̱re
||13||स्वाहा॑कृता॒न्या ग॒ह्युप॑ ह॒व्यानि॑ वी॒तये॑ । इन्द्रा ग॑हि श्रु॒धी हवं॒ त्वां ह॑वन्ते अध्व॒रे