Study
- Anukramaṇī
- Source
11 kakṣīvān dairghatamasa auśijaḥ| aśvinau| triṣṭup|
ā vā̱ṃ ratho̍ aśvinā śye̱napa̍tvā sumṛl̤ī̱kaḥ svavā̍m̐ yātva̱rvāṅ |
yo martya̍sya̱ mana̍so̱ javī̍yān trivandhu̱ro vṛ̍ṣaṇā̱ vāta̍raṃhāḥ
||1||आ वां॒ रथो॑ अश्विना श्ये॒नप॑त्वा सुमृळी॒कः स्ववाँ॑ यात्व॒र्वाङ् ।
यो मर्त्य॑स्य॒ मन॑सो॒ जवी॑यान् त्रिवन्धु॒रो वृ॑षणा॒ वात॑रंहाः
tri̱va̱ndhu̱reṇa̍ tri̱vṛtā̱ rathe̍na trica̱kreṇa̍ su̱vṛtā yā̍tama̱rvāk |
pinva̍ta̱ṃ gā jinva̍ta̱marva̍to no va̱rdhaya̍tamaśvinā vī̱rama̱sme
||2||त्रि॒व॒न्धु॒रेण॑ त्रि॒वृता॒ रथे॑न त्रिच॒क्रेण॑ सु॒वृता या॑तम॒र्वाक् ।
पिन्व॑तं॒ गा जिन्व॑त॒मर्व॑तो नो व॒र्धय॑तमश्विना वी॒रम॒स्मे
pra̱vadyā̍manā su̱vṛtā̱ rathe̍na̱ dasrā̍vi̱maṃ śṛ̍ṇuta̱ṃ śloka̱madre̍: |
kima̱ṅga vā̱ṃ pratyava̍rti̱ṃ gami̍ṣṭhā̱hurviprā̍so aśvinā purā̱jāḥ
||3||प्र॒वद्या॑मना सु॒वृता॒ रथे॑न॒ दस्रा॑वि॒मं शृ॑णुतं॒ श्लोक॒मद्रे॑: ।
किम॒ङ्ग वां॒ प्रत्यव॑र्तिं॒ गमि॑ष्ठा॒हुर्विप्रा॑सो अश्विना पुरा॒जाः
ā vā̍ṃ śye̱nāso̍ aśvinā vahantu̱ rathe̍ yu̱ktāsa̍ ā̱śava̍: pata̱ṃgāḥ |
ye a̱pturo̍ di̱vyāso̱ na gṛdhrā̍ a̱bhi prayo̍ nāsatyā̱ vaha̍nti
||4||आ वां॑ श्ये॒नासो॑ अश्विना वहन्तु॒ रथे॑ यु॒क्तास॑ आ॒शव॑: पतं॒गाः ।
ये अ॒प्तुरो॑ दि॒व्यासो॒ न गृध्रा॑ अ॒भि प्रयो॑ नासत्या॒ वह॑न्ति
ā vā̱ṃ ratha̍ṃ yuva̱tisti̍ṣṭha̱datra̍ ju̱ṣṭvī na̍rā duhi̱tā sūrya̍sya |
pari̍ vā̱maśvā̱ vapu̍ṣaḥ pata̱ṃgā vayo̍ vahantvaru̱ṣā a̱bhīke̍
||5||आ वां॒ रथं॑ युव॒तिस्ति॑ष्ठ॒दत्र॑ जु॒ष्ट्वी न॑रा दुहि॒ता सूर्य॑स्य ।
परि॑ वा॒मश्वा॒ वपु॑षः पतं॒गा वयो॑ वहन्त्वरु॒षा अ॒भीके॑
ud vanda̍namairataṃ da̱ṃsanā̍bhi̱rudre̱bhaṃ da̍srā vṛṣaṇā̱ śacī̍bhiḥ |
niṣṭau̱gryaṃ pā̍rayathaḥ samu̱drāt puna̱ścyavā̍naṃ cakrathu̱ryuvā̍nam
||6||उद् वन्द॑नमैरतं दं॒सना॑भि॒रुद्रे॒भं द॑स्रा वृषणा॒ शची॑भिः ।
निष्टौ॒ग्र्यं पा॑रयथः समु॒द्रात् पुन॒श्च्यवा॑नं चक्रथु॒र्युवा॑नम्
yu̱vamatra̱ye'va̍nītāya ta̱ptamūrja̍mo̱māna̍maśvināvadhattam |
yu̱vaṃ kaṇvā̱yāpi̍riptāya̱ cakṣu̱: pratya̍dhattaṃ suṣṭu̱tiṃ ju̍juṣā̱ṇā
||7||यु॒वमत्र॒येऽव॑नीताय त॒प्तमूर्ज॑मो॒मान॑मश्विनावधत्तम् ।
यु॒वं कण्वा॒यापि॑रिप्ताय॒ चक्षु॒: प्रत्य॑धत्तं सुष्टु॒तिं जु॑जुषा॒णा
yu̱vaṃ dhe̱nuṃ śa̱yave̍ nādhi̱tāyāpi̍nvatamaśvinā pū̱rvyāya̍ |
amu̍ñcata̱ṃ varti̍kā̱maṃha̍so̱ niḥ prati̱ jaṅghā̍ṃ vi̱śpalā̍yā adhattam
||8||यु॒वं धे॒नुं श॒यवे॑ नाधि॒तायापि॑न्वतमश्विना पू॒र्व्याय॑ ।
अमु॑ञ्चतं॒ वर्ति॑का॒मंह॑सो॒ निः प्रति॒ जङ्घां॑ वि॒श्पला॑या अधत्तम्
yu̱vaṃ śve̱taṃ pe̱dava̱ indra̍jūtamahi̱hana̍maśvinādatta̱maśva̍m |
jo̱hūtra̍ma̱ryo a̱bhibhū̍timu̱graṃ sa̍hasra̱sāṃ vṛṣa̍ṇaṃ vī̱ḍva̍ṅgam
||9||यु॒वं श्वे॒तं पे॒दव॒ इन्द्र॑जूतमहि॒हन॑मश्विनादत्त॒मश्व॑म् ।
जो॒हूत्र॑म॒र्यो अ॒भिभू॑तिमु॒ग्रं स॑हस्र॒सां वृष॑णं वी॒ड्व॑ङ्गम्
tā vā̍ṃ narā̱ svava̍se sujā̱tā havā̍mahe aśvinā̱ nādha̍mānāḥ |
ā na̱ upa̱ vasu̍matā̱ rathe̍na̱ giro̍ juṣā̱ṇā su̍vi̱tāya̍ yātam
||10||ता वां॑ नरा॒ स्वव॑से सुजा॒ता हवा॑महे अश्विना॒ नाध॑मानाः ।
आ न॒ उप॒ वसु॑मता॒ रथे॑न॒ गिरो॑ जुषा॒णा सु॑वि॒ताय॑ यातम्
ā śye̱nasya̱ java̍sā̱ nūta̍nenā̱sme yā̍taṃ nāsatyā sa̱joṣā̍: |
have̱ hi vā̍maśvinā rā̱taha̍vyaḥ śaśvatta̱māyā̍ u̱ṣaso̱ vyu̍ṣṭau
||11||आ श्ये॒नस्य॒ जव॑सा॒ नूत॑नेना॒स्मे या॑तं नासत्या स॒जोषा॑: ।
हवे॒ हि वा॑मश्विना रा॒तह॑व्यः शश्वत्त॒माया॑ उ॒षसो॒ व्यु॑ष्टौ