Study
- Anukramaṇī
- Source
6 dīrghatamā aucathyaḥ| viṣṇuḥ|1-3 indrāviṣṇū| jagatī|
pra va̱: pānta̱mandha̍so dhiyāya̱te ma̱he śūrā̍ya̱ viṣṇa̍ve cārcata |
yā sānu̍ni̱ parva̍tānā̱madā̍bhyā ma̱hasta̱sthatu̱rarva̍teva sā̱dhunā̍
||1||प्र व॒: पान्त॒मन्ध॑सो धियाय॒ते म॒हे शूरा॑य॒ विष्ण॑वे चार्चत ।
या सानु॑नि॒ पर्व॑ताना॒मदा॑भ्या म॒हस्त॒स्थतु॒रर्व॑तेव सा॒धुना॑
tve̱ṣami̱tthā sa̱mara̍ṇa̱ṃ śimī̍vato̱rindrā̍viṣṇū suta̱pā vā̍muruṣyati |
yā martyā̍ya pratidhī̱yamā̍na̱mit kṛ̱śāno̱rastu̍rasa̱nāmu̍ru̱ṣyatha̍:
||2||त्वे॒षमि॒त्था स॒मर॑णं॒ शिमी॑वतो॒रिन्द्रा॑विष्णू सुत॒पा वा॑मुरुष्यति ।
या मर्त्या॑य प्रतिधी॒यमा॑न॒मित् कृ॒शानो॒रस्तु॑रस॒नामु॑रु॒ष्यथ॑:
tā ī̍ṃ vardhanti̱ mahya̍sya̱ pauṃsya̱ṃ ni mā̱tarā̍ nayati̱ reta̍se bhu̱je |
dadhā̍ti pu̱tro'va̍ra̱ṃ para̍ṃ pi̱turnāma̍ tṛ̱tīya̱madhi̍ roca̱ne di̱vaḥ
||3||ता ईं॑ वर्धन्ति॒ मह्य॑स्य॒ पौंस्यं॒ नि मा॒तरा॑ नयति॒ रेत॑से भु॒जे ।
दधा॑ति पु॒त्रोऽव॑रं॒ परं॑ पि॒तुर्नाम॑ तृ॒तीय॒मधि॑ रोच॒ने दि॒वः
tatta̱dida̍sya̱ pauṃsya̍ṃ gṛṇīmasī̱nasya̍ trā̱tura̍vṛ̱kasya̍ mī̱l̤ahuṣa̍: |
yaḥ pārthi̍vāni tri̱bhirid vigā̍mabhiru̱ru krami̍ṣṭorugā̱yāya̍ jī̱vase̍
||4||तत्त॒दिद॑स्य॒ पौंस्यं॑ गृणीमसी॒नस्य॑ त्रा॒तुर॑वृ॒कस्य॑ मी॒ळहुष॑: ।
यः पार्थि॑वानि त्रि॒भिरिद् विगा॑मभिरु॒रु क्रमि॑ष्टोरुगा॒याय॑ जी॒वसे॑
dve ida̍sya̱ krama̍ṇe sva̱rdṛśo̍ 'bhi̱khyāya̱ martyo̍ bhuraṇyati |
tṛ̱tīya̍masya̱ naki̱rā da̍dharṣati̱ vaya̍śca̱na pa̱taya̍ntaḥ pata̱triṇa̍:
||5||द्वे इद॑स्य॒ क्रम॑णे स्व॒र्दृशो॑ ऽभि॒ख्याय॒ मर्त्यो॑ भुरण्यति ।
तृ॒तीय॑मस्य॒ नकि॒रा द॑धर्षति॒ वय॑श्च॒न प॒तय॑न्तः पत॒त्रिण॑:
ca̱turbhi̍: sā̱kaṃ na̍va̱tiṃ ca̱ nāma̍bhiśca̱kraṃ na vṛ̱ttaṃ vyatī̍m̐ravīvipat |
bṛ̱haccha̍rīro vi̱mimā̍na̱ ṛkva̍bhi̱ryuvāku̍māra̱: pratye̍tyāha̱vam
||6||च॒तुर्भि॑: सा॒कं न॑व॒तिं च॒ नाम॑भिश्च॒क्रं न वृ॒त्तं व्यतीँ॑रवीविपत् ।
बृ॒हच्छ॑रीरो वि॒मिमा॑न॒ ऋक्व॑भि॒र्युवाकु॑मार॒: प्रत्ये॑त्याह॒वम्