Study
- Anukramaṇī
- Source
12 gotamo rāhūgaṇaḥ| agniṣomau| 1-3 anuṣṭup, 4-7, 12 triṣṭup, 8 jagatī triṣṭubvā, 9-11 gāyatrī |
agnī̍ṣomāvi̱maṃ su me̍ śṛṇu̱taṃ vṛ̍ṣaṇā̱ hava̍m |
prati̍ sū̱ktāni̍ haryata̱ṃ bhava̍taṃ dā̱śuṣe̱ maya̍:
||1||अग्नी॑षोमावि॒मं सु मे॑ शृणु॒तं वृ॑षणा॒ हव॑म् ।
प्रति॑ सू॒क्तानि॑ हर्यतं॒ भव॑तं दा॒शुषे॒ मय॑:
agnī̍ṣomā̱ yo a̱dya vā̍mi̱daṃ vaca̍: sapa̱ryati̍ |
tasmai̍ dhattaṃ su̱vīrya̱ṃ gavā̱ṃ poṣa̱ṃ svaśvya̍m
||2||अग्नी॑षोमा॒ यो अ॒द्य वा॑मि॒दं वच॑: सप॒र्यति॑ ।
तस्मै॑ धत्तं सु॒वीर्यं॒ गवां॒ पोषं॒ स्वश्व्य॑म्
agnī̍ṣomā̱ ya āhu̍ti̱ṃ yo vā̱ṃ dāśā̍ddha̱viṣkṛ̍tim |
sa pra̱jayā̍ su̱vīrya̱ṃ viśva̱māyu̱rvya̍śnavat
||3||अग्नी॑षोमा॒ य आहु॑तिं॒ यो वां॒ दाशा॑द्ध॒विष्कृ॑तिम् ।
स प्र॒जया॑ सु॒वीर्यं॒ विश्व॒मायु॒र्व्य॑श्नवत्
agnī̍ṣomā̱ ceti̱ tad vī̱rya̍ṃ vā̱ṃ yadamu̍ṣṇītamava̱saṃ pa̱ṇiṃ gāḥ |
avā̍tirata̱ṃ bṛsa̍yasya̱ śeṣo 'vi̍ndata̱ṃ jyoti̱reka̍ṃ ba̱hubhya̍:
||4||अग्नी॑षोमा॒ चेति॒ तद् वी॒र्यं॑ वां॒ यदमु॑ष्णीतमव॒सं प॒णिं गाः ।
अवा॑तिरतं॒ बृस॑यस्य॒ शेषो ऽवि॑न्दतं॒ ज्योति॒रेकं॑ ब॒हुभ्य॑:
yu̱vame̱tāni̍ di̱vi ro̍ca̱nānya̱gniśca̍ soma̱ sakra̍tū adhattam |
yu̱vaṃ sindhū̍m̐ra̱bhiśa̍sterava̱dyādagnī̍ṣomā̱vamu̍ñcataṃ gṛbhī̱tān
||5||यु॒वमे॒तानि॑ दि॒वि रो॑च॒नान्य॒ग्निश्च॑ सोम॒ सक्र॑तू अधत्तम् ।
यु॒वं सिन्धूँ॑र॒भिश॑स्तेरव॒द्यादग्नी॑षोमा॒वमु॑ञ्चतं गृभी॒तान्
ānyaṃ di̱vo mā̍ta̱riśvā̍ jabhā̱rāma̍thnāda̱nyaṃ pari̍ śye̱no adre̍: |
agnī̍ṣomā̱ brahma̍ṇā vāvṛdhā̱noruṃ ya̱jñāya̍ cakrathuru lo̱kam
||6||आन्यं दि॒वो मा॑त॒रिश्वा॑ जभा॒राम॑थ्नाद॒न्यं परि॑ श्ये॒नो अद्रे॑: ।
अग्नी॑षोमा॒ ब्रह्म॑णा वावृधा॒नोरुं य॒ज्ञाय॑ चक्रथुरु लो॒कम्
agnī̍ṣomā ha̱viṣa̱: prasthi̍tasya vī̱taṃ harya̍taṃ vṛṣaṇā ju̱ṣethā̍m |
su̱śarmā̍ṇā̱ svava̍sā̱ hi bhū̱tamathā̍ dhatta̱ṃ yaja̍mānāya̱ śaṃ yoḥ
||7||अग्नी॑षोमा ह॒विष॒: प्रस्थि॑तस्य वी॒तं हर्य॑तं वृषणा जु॒षेथा॑म् ।
सु॒शर्मा॑णा॒ स्वव॑सा॒ हि भू॒तमथा॑ धत्तं॒ यज॑मानाय॒ शं योः
yo a̱gnīṣomā̍ ha̱viṣā̍ sapa̱ryād de̍va̱drīcā̱ mana̍sā̱ yo ghṛ̱tena̍ |
tasya̍ vra̱taṃ ra̍kṣataṃ pā̱tamaṃha̍so vi̱śe janā̍ya̱ mahi̱ śarma̍ yacchatam
||8||यो अ॒ग्नीषोमा॑ ह॒विषा॑ सप॒र्याद् दे॑व॒द्रीचा॒ मन॑सा॒ यो घृ॒तेन॑ ।
तस्य॑ व्र॒तं र॑क्षतं पा॒तमंह॑सो वि॒शे जना॑य॒ महि॒ शर्म॑ यच्छतम्
agnī̍ṣomā̱ save̍dasā̱ sahū̍tī vanata̱ṃ gira̍: | saṃ de̍va̱trā ba̍bhūvathuḥ
||9||अग्नी॑षोमा॒ सवे॑दसा॒ सहू॑ती वनतं॒ गिर॑: । सं दे॑व॒त्रा ब॑भूवथुः
agnī̍ṣomāva̱nena̍ vā̱ṃ yo vā̍ṃ ghṛ̱tena̱ dāśa̍ti | tasmai̍ dīdayataṃ bṛ̱hat
||10||अग्नी॑षोमाव॒नेन॑ वां॒ यो वां॑ घृ॒तेन॒ दाश॑ति । तस्मै॑ दीदयतं बृ॒हत्
agnī̍ṣomāvi̱māni̍ no yu̱vaṃ ha̱vyā ju̍joṣatam | ā yā̍ta̱mupa̍ na̱: sacā̍
||11||अग्नी॑षोमावि॒मानि॑ नो यु॒वं ह॒व्या जु॑जोषतम् । आ या॑त॒मुप॑ न॒: सचा॑
agnī̍ṣomā pipṛ̱tamarva̍to na̱ ā pyā̍yantāmu̱sriyā̍ havya̱sūda̍: |
a̱sme balā̍ni ma̱ghava̍tsu dhattaṃ kṛṇu̱taṃ no̍ adhva̱raṃ śru̍ṣṭi̱manta̍m
||12||अग्नी॑षोमा पिपृ॒तमर्व॑तो न॒ आ प्या॑यन्तामु॒स्रिया॑ हव्य॒सूद॑: ।
अ॒स्मे बला॑नि म॒घव॑त्सु धत्तं कृणु॒तं नो॑ अध्व॒रं श्रु॑ष्टि॒मन्त॑म्