Study
- Anukramaṇī
- Source
12 gotamo rāhūgaṇaḥ| 1-3agniḥ madhyamo' gnirvā, 4-12 agniḥ| 1-3 triṣṭup, 4-6 uṣṇik, 7-12 gāyatrī |
hira̍ṇyakeśo̱ raja̍so visā̱re 'hi̱rdhuni̱rvāta̍ iva̱ dhrajī̍mān |
śuci̍bhrājā u̱ṣaso̱ nave̍dā̱ yaśa̍svatīrapa̱syuvo̱ na sa̱tyāḥ
||1||हिर॑ण्यकेशो॒ रज॑सो विसा॒रे ऽहि॒र्धुनि॒र्वात॑ इव॒ ध्रजी॑मान् ।
शुचि॑भ्राजा उ॒षसो॒ नवे॑दा॒ यश॑स्वतीरप॒स्युवो॒ न स॒त्याः
ā te̍ supa̱rṇā a̍minanta̱m̐ evai̍: kṛ̱ṣṇo no̍nāva vṛṣa̱bho yadī̱dam |
śi̱vābhi̱rna smaya̍mānābhi̱rāgā̱t pata̍nti̱ miha̍: sta̱naya̍ntya̱bhrā
||2||आ ते॑ सुप॒र्णा अ॑मिनन्तँ॒ एवै॑: कृ॒ष्णो नो॑नाव वृष॒भो यदी॒दम् ।
शि॒वाभि॒र्न स्मय॑मानाभि॒रागा॒त् पत॑न्ति॒ मिह॑: स्त॒नय॑न्त्य॒भ्रा
yadī̍mṛ̱tasya̱ paya̍sā̱ piyā̍no̱ naya̍nnṛ̱tasya̍ pa̱thibhī̱ raji̍ṣṭhaiḥ |
a̱rya̱mā mi̱tro varu̍ṇa̱: pari̍jmā̱ tvaca̍ṃ pṛñca̱ntyupa̍rasya̱ yonau̍
||3||यदी॑मृ॒तस्य॒ पय॑सा॒ पिया॑नो॒ नय॑न्नृ॒तस्य॑ प॒थिभी॒ रजि॑ष्ठैः ।
अ॒र्य॒मा मि॒त्रो वरु॑ण॒: परि॑ज्मा॒ त्वचं॑ पृञ्च॒न्त्युप॑रस्य॒ योनौ॑
agne̱ vāja̍sya̱ goma̍ta̱ īśā̍naḥ sahaso yaho | a̱sme dhe̍hi jātavedo̱ mahi̱ śrava̍:
||4||अग्ने॒ वाज॑स्य॒ गोम॑त॒ ईशा॑नः सहसो यहो । अ॒स्मे धे॑हि जातवेदो॒ महि॒ श्रव॑:
sa i̍dhā̱no vasu̍ṣka̱vira̱gnirī̱l̤enyo̍ gi̱rā | re̱vada̱smabhya̍ṃ purvaṇīka dīdihi
||5||स इ॑धा॒नो वसु॑ष्क॒विर॒ग्निरी॒ळेन्यो॑ गि॒रा । रे॒वद॒स्मभ्यं॑ पुर्वणीक दीदिहि
kṣa̱po rā̍jannu̱ta tmanāgne̱ vasto̍ru̱toṣasa̍: | sa ti̍gmajambha ra̱kṣaso̍ daha̱ prati̍
||6||क्ष॒पो रा॑जन्नु॒त त्मनाग्ने॒ वस्तो॑रु॒तोषस॑: । स ति॑ग्मजम्भ र॒क्षसो॑ दह॒ प्रति॑
avā̍ no agna ū̱tibhi̍rgāya̱trasya̱ prabha̍rmaṇi | viśvā̍su dhī̱ṣu va̍ndya
||7||अवा॑ नो अग्न ऊ॒तिभि॑र्गाय॒त्रस्य॒ प्रभ॑र्मणि । विश्वा॑सु धी॒षु व॑न्द्य
ā no̍ agne ra̱yiṃ bha̍ra satrā̱sāha̱ṃ vare̍ṇyam | viśvā̍su pṛ̱tsu du̱ṣṭara̍m
||8||आ नो॑ अग्ने र॒यिं भ॑र सत्रा॒साहं॒ वरे॑ण्यम् । विश्वा॑सु पृ॒त्सु दु॒ष्टर॑म्
ā no̍ agne suce̱tunā̍ ra̱yiṃ vi̱śvāyu̍poṣasam | mā̱rḍī̱kaṃ dhe̍hi jī̱vase̍
||9||आ नो॑ अग्ने सुचे॒तुना॑ र॒यिं वि॒श्वायु॑पोषसम् । मा॒र्डी॒कं धे॑हि जी॒वसे॑
pra pū̱tāsti̱gmaśo̍ciṣe̱ vāco̍ gotamā̱gnaye̍ | bhara̍sva sumna̱yurgira̍:
||10||प्र पू॒तास्ति॒ग्मशो॑चिषे॒ वाचो॑ गोतमा॒ग्नये॑ । भर॑स्व सुम्न॒युर्गिर॑:
yo no̍ agne'bhi̱dāsa̱tyanti̍ dū̱re pa̍dī̱ṣṭa saḥ | a̱smāka̱mid vṛ̱dhe bha̍va
||11||यो नो॑ अग्नेऽभि॒दास॒त्यन्ति॑ दू॒रे प॑दी॒ष्ट सः । अ॒स्माक॒मिद् वृ॒धे भ॑व
sa̱ha̱srā̱kṣo vica̍rṣaṇira̱gnī rakṣā̍ṃsi sedhati | hotā̍ gṛṇīta u̱kthya̍:
||12||स॒ह॒स्रा॒क्षो विच॑र्षणिर॒ग्नी रक्षां॑सि सेधति । होता॑ गृणीत उ॒क्थ्य॑: