Study
- Anukramaṇī
- Source
16 gotamo rāhūgaṇaḥ| indraḥ, 16 indraḥ, (atharvā, manuḥ dadhyaṅ ca)| paṃktiḥ|
i̱tthā hi soma̱ inmade̍ bra̱hmā ca̱kāra̱ vardha̍nam |
śavi̍ṣṭha vajri̱nnoja̍sā pṛthi̱vyā niḥ śa̍śā̱ ahi̱marca̱nnanu̍ sva̱rājya̍m
||1||इ॒त्था हि सोम॒ इन्मदे॑ ब्र॒ह्मा च॒कार॒ वर्ध॑नम् ।
शवि॑ष्ठ वज्रि॒न्नोज॑सा पृथि॒व्या निः श॑शा॒ अहि॒मर्च॒न्ननु॑ स्व॒राज्य॑म्
sa tvā̍mada̱d vṛṣā̱ mada̱: soma̍: śye̱nābhṛ̍taḥ su̱taḥ |
yenā̍ vṛ̱traṃ nira̱dbhyo ja̱ghantha̍ vajri̱nnoja̱sārca̱nnanu̍ sva̱rājya̍m
||2||स त्वा॑मद॒द् वृषा॒ मद॒: सोम॑: श्ये॒नाभृ॑तः सु॒तः ।
येना॑ वृ॒त्रं निर॒द्भ्यो ज॒घन्थ॑ वज्रि॒न्नोज॒सार्च॒न्ननु॑ स्व॒राज्य॑म्
prehya̱bhī̍hi dhṛṣṇu̱hi na te̱ vajro̱ ni ya̍ṃsate |
indra̍ nṛ̱mṇaṃ hi te̱ śavo̱ hano̍ vṛ̱traṃ jayā̍ a̱po 'rca̱nnanu̍ sva̱rājya̍m
||3||प्रेह्य॒भी॑हि धृष्णु॒हि न ते॒ वज्रो॒ नि यं॑सते ।
इन्द्र॑ नृ॒म्णं हि ते॒ शवो॒ हनो॑ वृ॒त्रं जया॑ अ॒पो ऽर्च॒न्ननु॑ स्व॒राज्य॑म्
niri̍ndra̱ bhūmyā̱ adhi̍ vṛ̱traṃ ja̍ghantha̱ nirdi̱vaḥ |
sṛ̱jā ma̱rutva̍tī̱rava̍ jī̱vadha̍nyā i̱mā a̱po 'rca̱nnanu̍ sva̱rājya̍m
||4||निरि॑न्द्र॒ भूम्या॒ अधि॑ वृ॒त्रं ज॑घन्थ॒ निर्दि॒वः ।
सृ॒जा म॒रुत्व॑ती॒रव॑ जी॒वध॑न्या इ॒मा अ॒पो ऽर्च॒न्ननु॑ स्व॒राज्य॑म्
indro̍ vṛ̱trasya̱ dodha̍ta̱: sānu̱ṃ vajre̍ṇa hīl̤i̱taḥ |
a̱bhi̱kramyāva̍ jighnate̱ 'paḥ sarmā̍ya co̱daya̱nnarca̱nnanu̍ sva̱rājya̍m
||5||इन्द्रो॑ वृ॒त्रस्य॒ दोध॑त॒: सानुं॒ वज्रे॑ण हीळि॒तः ।
अ॒भि॒क्रम्याव॑ जिघ्नते॒ ऽपः सर्मा॑य चो॒दय॒न्नर्च॒न्ननु॑ स्व॒राज्य॑म्
adhi̱ sānau̱ ni ji̍ghnate̱ vajre̍ṇa śa̱tapa̍rvaṇā |
ma̱ndā̱na indro̱ andha̍sa̱: sakhi̍bhyo gā̱tumi̍ccha̱tyarca̱nnanu̍ sva̱rājya̍m
||6||अधि॒ सानौ॒ नि जि॑घ्नते॒ वज्रे॑ण श॒तप॑र्वणा ।
म॒न्दा॒न इन्द्रो॒ अन्ध॑स॒: सखि॑भ्यो गा॒तुमि॑च्छ॒त्यर्च॒न्ननु॑ स्व॒राज्य॑म्
indra̱ tubhya̱mida̍dri̱vo 'nu̍ttaṃ vajrin vī̱rya̍m |
yaddha̱ tyaṃ mā̱yina̍ṃ mṛ̱gaṃ tamu̱ tvaṃ mā̱yayā̍vadhī̱rarca̱nnanu̍ sva̱rājya̍m
||7||इन्द्र॒ तुभ्य॒मिद॑द्रि॒वो ऽनु॑त्तं वज्रिन् वी॒र्य॑म् ।
यद्ध॒ त्यं मा॒यिनं॑ मृ॒गं तमु॒ त्वं मा॒यया॑वधी॒रर्च॒न्ननु॑ स्व॒राज्य॑म्
vi te̱ vajrā̍so asthirannava̱tiṃ nā̱vyā̱ 3 anu̍ |
ma̱hat ta̍ indra vī̱rya̍ṃ bā̱hvoste̱ bala̍ṃ hi̱tamarca̱nnanu̍ sva̱rājya̍m
||8||वि ते॒ वज्रा॑सो अस्थिरन्नव॒तिं ना॒व्या॒ ३ अनु॑ ।
म॒हत् त॑ इन्द्र वी॒र्यं॑ बा॒ह्वोस्ते॒ बलं॑ हि॒तमर्च॒न्ननु॑ स्व॒राज्य॑म्
sa̱hasra̍ṃ sā̱kama̍rcata̱ pari̍ ṣṭobhata viṃśa̱tiḥ |
śa̱taina̱manva̍nonavu̱rindrā̍ya̱ brahmodya̍ta̱marca̱nnanu̍ sva̱rājya̍m
||9||स॒हस्रं॑ सा॒कम॑र्चत॒ परि॑ ष्टोभत विंश॒तिः ।
श॒तैन॒मन्व॑नोनवु॒रिन्द्रा॑य॒ ब्रह्मोद्य॑त॒मर्च॒न्ननु॑ स्व॒राज्य॑म्
indro̍ vṛ̱trasya̱ tavi̍ṣī̱ṃ nira̍ha̱ntsaha̍sā̱ saha̍: |
ma̱hat tada̍sya̱ pauṃsya̍ṃ vṛ̱traṃ ja̍gha̱nvām̐ a̍sṛja̱darca̱nnanu̍ sva̱rājya̍m
||10||इन्द्रो॑ वृ॒त्रस्य॒ तवि॑षीं॒ निर॑ह॒न्त्सह॑सा॒ सह॑: ।
म॒हत् तद॑स्य॒ पौंस्यं॑ वृ॒त्रं ज॑घ॒न्वाँ अ॑सृज॒दर्च॒न्ननु॑ स्व॒राज्य॑म्
i̱me ci̱t tava̍ ma̱nyave̱ vepe̍te bhi̱yasā̍ ma̱hī |
yadi̍ndra vajri̱nnoja̍sā vṛ̱traṃ ma̱rutvā̱m̐ ava̍dhī̱rarca̱nnanu̍ sva̱rājya̍m
||11||इ॒मे चि॒त् तव॑ म॒न्यवे॒ वेपे॑ते भि॒यसा॑ म॒ही ।
यदि॑न्द्र वज्रि॒न्नोज॑सा वृ॒त्रं म॒रुत्वाँ॒ अव॑धी॒रर्च॒न्ननु॑ स्व॒राज्य॑म्
na vepa̍sā̱ na ta̍nya̱tendra̍ṃ vṛ̱tro vi bī̍bhayat |
a̱bhye̍na̱ṃ vajra̍ āya̱saḥ sa̱hasra̍bhṛṣṭirāya̱tārca̱nnanu̍ sva̱rājya̍m
||12||न वेप॑सा॒ न त॑न्य॒तेन्द्रं॑ वृ॒त्रो वि बी॑भयत् ।
अ॒भ्ये॑नं॒ वज्र॑ आय॒सः स॒हस्र॑भृष्टिराय॒तार्च॒न्ननु॑ स्व॒राज्य॑म्
yad vṛ̱traṃ tava̍ cā̱śani̱ṃ vajre̍ṇa sa̱mayo̍dhayaḥ |
ahi̍mindra̱ jighā̍ṃsato di̱vi te̍ badbadhe̱ śavo 'rca̱nnanu̍ sva̱rājya̍m
||13||यद् वृ॒त्रं तव॑ चा॒शनिं॒ वज्रे॑ण स॒मयो॑धयः ।
अहि॑मिन्द्र॒ जिघां॑सतो दि॒वि ते॑ बद्बधे॒ शवो ऽर्च॒न्ननु॑ स्व॒राज्य॑म्
a̱bhi̱ṣṭa̱ne te̍ adrivo̱ yat sthā jaga̍cca rejate |
tvaṣṭā̍ ci̱t tava̍ ma̱nyava̱ indra̍ vevi̱jyate̍ bhi̱yārca̱nnanu̍ sva̱rājya̍m
||14||अ॒भि॒ष्ट॒ने ते॑ अद्रिवो॒ यत् स्था जग॑च्च रेजते ।
त्वष्टा॑ चि॒त् तव॑ म॒न्यव॒ इन्द्र॑ वेवि॒ज्यते॑ भि॒यार्च॒न्ननु॑ स्व॒राज्य॑म्
na̱hi nu yāda̍dhī̱masīndra̱ṃ ko vī̱ryā̍ pa̱raḥ |
tasmi̍nnṛ̱mṇamu̱ta kratu̍ṃ de̱vā ojā̍ṃsi̱ saṃ da̍dhu̱rarca̱nnanu̍ sva̱rājya̍m
||15||न॒हि नु याद॑धी॒मसीन्द्रं॒ को वी॒र्या॑ प॒रः ।
तस्मि॑न्नृ॒म्णमु॒त क्रतुं॑ दे॒वा ओजां॑सि॒ सं द॑धु॒रर्च॒न्ननु॑ स्व॒राज्य॑म्
yāmatha̍rvā̱ manu̍ṣpi̱tā da̱dhyaṅ dhiya̱matna̍ta |
tasmi̱n brahmā̍ṇi pū̱rvathendra̍ u̱kthā sama̍gma̱tārca̱nnanu̍ sva̱rājya̍m
||16||यामथ॑र्वा॒ मनु॑ष्पि॒ता द॒ध्यङ् धिय॒मत्न॑त ।
तस्मि॒न् ब्रह्मा॑णि पू॒र्वथेन्द्र॑ उ॒क्था सम॑ग्म॒तार्च॒न्ननु॑ स्व॒राज्य॑म्