Study
- Anukramaṇī
- Source
19 vārṣāgirāḥ ṛjrā śvā'mbarīṣa-sahadeva-bhayamāna-surādhasaḥ| indraḥ| triṣṭup|
sa yo vṛṣā̱ vṛṣṇye̍bhi̱: samo̍kā ma̱ho di̱vaḥ pṛ̍thi̱vyāśca̍ sa̱mrāṭ |
sa̱tī̱nasa̍tvā̱ havyo̱ bhare̍ṣu ma̱rutvā̍n no bhava̱tvindra̍ ū̱tī
||1||स यो वृषा॒ वृष्ण्ये॑भि॒: समो॑का म॒हो दि॒वः पृ॑थि॒व्याश्च॑ स॒म्राट् ।
स॒ती॒नस॑त्वा॒ हव्यो॒ भरे॑षु म॒रुत्वा॑न् नो भव॒त्विन्द्र॑ ऊ॒ती
yasyānā̍pta̱: sūrya̍syeva̱ yāmo̱ bhare̍bhare vṛtra̱hā śuṣmo̱ asti̍ |
vṛṣa̍ntama̱: sakhi̍bhi̱: svebhi̱revai̍rma̱rutvā̍n no bhava̱tvindra̍ ū̱tī
||2||यस्याना॑प्त॒: सूर्य॑स्येव॒ यामो॒ भरे॑भरे वृत्र॒हा शुष्मो॒ अस्ति॑ ।
वृष॑न्तम॒: सखि॑भि॒: स्वेभि॒रेवै॑र्म॒रुत्वा॑न् नो भव॒त्विन्द्र॑ ऊ॒ती
di̱vo na yasya̱ reta̍so̱ dughā̍nā̱: panthā̍so̱ yanti̱ śava̱sāpa̍rītāḥ |
ta̱raddve̍ṣāḥ sāsa̱hiḥ pauṃsye̍bhirma̱rutvā̍n no bhava̱tvindra̍ ū̱tī
||3||दि॒वो न यस्य॒ रेत॑सो॒ दुघा॑ना॒: पन्था॑सो॒ यन्ति॒ शव॒साप॑रीताः ।
त॒रद्द्वे॑षाः सास॒हिः पौंस्ये॑भिर्म॒रुत्वा॑न् नो भव॒त्विन्द्र॑ ऊ॒ती
so aṅgi̍robhi̱raṅgi̍rastamo bhū̱d vṛṣā̱ vṛṣa̍bhi̱: sakhi̍bhi̱: sakhā̱ san |
ṛ̱gmibhi̍rṛgmī gā̱tubhi̱rjyeṣṭho̍ ma̱rutvā̍n no bhava̱tvindra̍ ū̱tī
||4||सो अङ्गि॑रोभि॒रङ्गि॑रस्तमो भू॒द् वृषा॒ वृष॑भि॒: सखि॑भि॒: सखा॒ सन् ।
ऋ॒ग्मिभि॑र्ऋग्मी गा॒तुभि॒र्ज्येष्ठो॑ म॒रुत्वा॑न् नो भव॒त्विन्द्र॑ ऊ॒ती
sa sū̱nubhi̱rna ru̱drebhi̱rṛbhvā̍ nṛ̱ṣāhye̍ sāsa̱hvām̐ a̱mitrā̍n |
sanī̍l̤ebhiḥ śrava̱syā̍ni̱ tūrva̍n ma̱rutvā̍n no bhava̱tvindra̍ ū̱tī
||5||स सू॒नुभि॒र्न रु॒द्रेभि॒र्ऋभ्वा॑ नृ॒षाह्ये॑ सास॒ह्वाँ अ॒मित्रा॑न् ।
सनी॑ळेभिः श्रव॒स्या॑नि॒ तूर्व॑न् म॒रुत्वा॑न् नो भव॒त्विन्द्र॑ ऊ॒ती
sa ma̍nyu̱mīḥ sa̱mada̍nasya ka̱rtā 'smāke̍bhi̱rnṛbhi̱: sūrya̍ṃ sanat |
a̱sminnaha̱ntsatpa̍tiḥ puruhū̱to ma̱rutvā̍n no bhava̱tvindra̍ ū̱tī
||6||स म॑न्यु॒मीः स॒मद॑नस्य क॒र्ता ऽस्माके॑भि॒र्नृभि॒: सूर्यं॑ सनत् ।
अ॒स्मिन्नह॒न्त्सत्प॑तिः पुरुहू॒तो म॒रुत्वा॑न् नो भव॒त्विन्द्र॑ ऊ॒ती
tamū̱tayo̍ raṇaya̱ñchūra̍sātau̱ taṃ kṣema̍sya kṣi̱taya̍: kṛṇvata̱ trām |
sa viśva̍sya ka̱ruṇa̍syeśa̱ eko̍ ma̱rutvā̍n no bhava̱tvindra̍ ū̱tī
||7||तमू॒तयो॑ रणय॒ञ्छूर॑सातौ॒ तं क्षेम॑स्य क्षि॒तय॑: कृण्वत॒ त्राम् ।
स विश्व॑स्य क॒रुण॑स्येश॒ एको॑ म॒रुत्वा॑न् नो भव॒त्विन्द्र॑ ऊ॒ती
tama̍psanta̱ śava̍sa utsa̱veṣu̱ naro̱ nara̱mava̍se̱ taṃ dhanā̍ya |
so a̱ndhe ci̱t tama̍si̱ jyoti̍rvidan ma̱rutvā̍n no bhava̱tvindra̍ ū̱tī
||8||तम॑प्सन्त॒ शव॑स उत्स॒वेषु॒ नरो॒ नर॒मव॑से॒ तं धना॑य ।
सो अ॒न्धे चि॒त् तम॑सि॒ ज्योति॑र्विदन् म॒रुत्वा॑न् नो भव॒त्विन्द्र॑ ऊ॒ती
sa sa̱vyena̍ yamati̱ vrādha̍taści̱t sa da̍kṣi̱ṇe saṃgṛ̍bhītā kṛ̱tāni̍ |
sa kī̱riṇā̍ ci̱t sani̍tā̱ dhanā̍ni ma̱rutvā̍n no bhava̱tvindra̍ ū̱tī
||9||स स॒व्येन॑ यमति॒ व्राध॑तश्चि॒त् स द॑क्षि॒णे संगृ॑भीता कृ॒तानि॑ ।
स की॒रिणा॑ चि॒त् सनि॑ता॒ धना॑नि म॒रुत्वा॑न् नो भव॒त्विन्द्र॑ ऊ॒ती
sa grāme̍bhi̱: sani̍tā̱ sa rathe̍bhirvi̱de viśvā̍bhiḥ kṛ̱ṣṭibhi̱rnva1dya |
sa pauṃsye̍bhirabhi̱bhūraśa̍stīrma̱rutvā̍n no bhava̱tvindra̍ ū̱tī
||10||स ग्रामे॑भि॒: सनि॑ता॒ स रथे॑भिर्वि॒दे विश्वा॑भिः कृ॒ष्टिभि॒र्न्व१द्य ।
स पौंस्ये॑भिरभि॒भूरश॑स्तीर्म॒रुत्वा॑न् नो भव॒त्विन्द्र॑ ऊ॒ती
sa jā̱mibhi̱ryat sa̱majā̍ti mī̱hle 'jā̍mibhirvā puruhū̱ta evai̍: |
a̱pāṃ to̱kasya̱ tana̍yasya je̱ṣe ma̱rutvā̍n no bhava̱tvindra̍ ū̱tī sa va̍jra̱bhṛd da̍syu̱hā bhī̱ma u̱graḥ sa̱hasra̍cetāḥ śa̱tanī̍tha̱ ṛbhvā̍ |
ca̱mrī̱ṣo na śava̍sā̱ pāñca̍janyo ma̱rutvā̍n no bhava̱tvindra̍ ū̱tī
||12||स जा॒मिभि॒र्यत् स॒मजा॑ति मी॒ह्ले ऽजा॑मिभिर्वा पुरुहू॒त एवै॑: ।
अ॒पां तो॒कस्य॒ तन॑यस्य जे॒षे म॒रुत्वा॑न् नो भव॒त्विन्द्र॑ ऊ॒ती ॥
स व॑ज्र॒भृद् द॑स्यु॒हा भी॒म उ॒ग्रः स॒हस्र॑चेताः श॒तनी॑थ॒ ऋभ्वा॑ ।
च॒म्री॒षो न शव॑सा॒ पाञ्च॑जन्यो म॒रुत्वा॑न् नो भव॒त्विन्द्र॑ ऊ॒ती
tasya̱ vajra̍: krandati̱ smat sva̱rṣā di̱vo na tve̱ṣo ra̱vatha̱: śimī̍vān |
taṃ sa̍cante sa̱naya̱staṃ dhanā̍ni ma̱rutvā̍n no bhava̱tvindra̍ ū̱tī
||13||तस्य॒ वज्र॑: क्रन्दति॒ स्मत् स्व॒र्षा दि॒वो न त्वे॒षो र॒वथ॒: शिमी॑वान् ।
तं स॑चन्ते स॒नय॒स्तं धना॑नि म॒रुत्वा॑न् नो भव॒त्विन्द्र॑ ऊ॒ती
yasyāja̍sra̱ṃ śava̍sā̱ māna̍mu̱kthaṃ pa̍ribhu̱jad roda̍sī vi̱śvata̍: sīm |
sa pā̍riṣa̱t kratu̍bhirmandasā̱no ma̱rutvā̍n no bhava̱tvindra̍ ū̱tī
||14||यस्याज॑स्रं॒ शव॑सा॒ मान॑मु॒क्थं प॑रिभु॒जद् रोद॑सी वि॒श्वत॑: सीम् ।
स पा॑रिष॒त् क्रतु॑भिर्मन्दसा॒नो म॒रुत्वा॑न् नो भव॒त्विन्द्र॑ ऊ॒ती
na yasya̍ de̱vā de̱vatā̱ na martā̱ āpa̍śca̱na śava̍so̱ anta̍mā̱puḥ |
sa pra̱rikvā̱ tvakṣa̍sā̱ kṣmo di̱vaśca̍ ma̱rutvā̍n no bhava̱tvindra̍ ū̱tī
||15||न यस्य॑ दे॒वा दे॒वता॒ न मर्ता॒ आप॑श्च॒न शव॑सो॒ अन्त॑मा॒पुः ।
स प्र॒रिक्वा॒ त्वक्ष॑सा॒ क्ष्मो दि॒वश्च॑ म॒रुत्वा॑न् नो भव॒त्विन्द्र॑ ऊ॒ती
ro̱hicchyā̱vā su̱mada̍ṃśurlalā̱mīrdyu̱kṣā rā̱ya ṛ̱jrāśva̍sya |
vṛṣa̍ṇvanta̱ṃ bibhra̍tī dhū̱rṣu ratha̍ṃ ma̱ndrā ci̍keta̱ nāhu̍ṣīṣu vi̱kṣu
||16||रो॒हिच्छ्या॒वा सु॒मदं॑शुर्लला॒मीर्द्यु॒क्षा रा॒य ऋ॒ज्राश्व॑स्य ।
वृष॑ण्वन्तं॒ बिभ्र॑ती धू॒र्षु रथं॑ म॒न्द्रा चि॑केत॒ नाहु॑षीषु वि॒क्षु
e̱tat tyat ta̍ indra̱ vṛṣṇa̍ u̱kthaṃ vā̍rṣāgi̱rā a̱bhi gṛ̍ṇanti̱ rādha̍: |
ṛ̱jrāśva̱: praṣṭi̍bhiramba̱rīṣa̍: sa̱hade̍vo̱ bhaya̍mānaḥ su̱rādhā̍:
||17||ए॒तत् त्यत् त॑ इन्द्र॒ वृष्ण॑ उ॒क्थं वा॑र्षागि॒रा अ॒भि गृ॑णन्ति॒ राध॑: ।
ऋ॒ज्राश्व॒: प्रष्टि॑भिरम्ब॒रीष॑: स॒हदे॑वो॒ भय॑मानः सु॒राधा॑:
dasyū̱ñchimyū̍m̐śca puruhū̱ta evai̍rha̱tvā pṛ̍thi̱vyāṃ śarvā̱ ni ba̍rhīt |
sana̱t kṣetra̱ṃ sakhi̍bhiḥ śvi̱tnyebhi̱: sana̱t sūrya̱ṃ sana̍da̱paḥ su̱vajra̍:
||18||दस्यू॒ञ्छिम्यूँ॑श्च पुरुहू॒त एवै॑र्ह॒त्वा पृ॑थि॒व्यां शर्वा॒ नि ब॑र्हीत् ।
सन॒त् क्षेत्रं॒ सखि॑भिः श्वि॒त्न्येभि॒: सन॒त् सूर्यं॒ सन॑द॒पः सु॒वज्र॑:
vi̱śvāhendro̍ adhiva̱ktā no̍ a̱stvapa̍rihvṛtāḥ sanuyāma̱ vāja̍m |
tanno̍ mi̱tro varu̍ṇo māmahantā̱madi̍ti̱: sindhu̍: pṛthi̱vī u̱ta dyauḥ
||19||वि॒श्वाहेन्द्रो॑ अधिव॒क्ता नो॑ अ॒स्त्वप॑रिह्वृताः सनुयाम॒ वाज॑म् ।
तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः