Study
- Anukramaṇī
- Source
9 medhātithiḥkāṇvaḥ| indraḥ|gāyatrī|
ā tvā̍ vahantu̱ hara̍yo̱ vṛṣa̍ṇa̱ṃ soma̍pītaye | indra̍ tvā̱ sūra̍cakṣasaḥ
||1||आ त्वा॑ वहन्तु॒ हर॑यो॒ वृष॑णं॒ सोम॑पीतये । इन्द्र॑ त्वा॒ सूर॑चक्षसः
i̱mā dhā̱nā ghṛ̍ta̱snuvo̱ harī̍ i̱hopa̍ vakṣataḥ | indra̍ṃ su̱khata̍me̱ rathe̍
||2||इ॒मा धा॒ना घृ॑त॒स्नुवो॒ हरी॑ इ॒होप॑ वक्षतः । इन्द्रं॑ सु॒खत॑मे॒ रथे॑
indra̍ṃ prā̱tarha̍vāmaha̱ indra̍ṃ praya̱tya̍dhva̱re | indra̱ṃ soma̍sya pī̱taye̍
||3||इन्द्रं॑ प्रा॒तर्ह॑वामह॒ इन्द्रं॑ प्रय॒त्य॑ध्व॒रे । इन्द्रं॒ सोम॑स्य पी॒तये॑
upa̍ naḥ su̱tamā ga̍hi̱ hari̍bhirindra ke̱śibhi̍: | su̱te hi tvā̱ havā̍mahe
||4||उप॑ नः सु॒तमा ग॑हि॒ हरि॑भिरिन्द्र के॒शिभि॑: । सु॒ते हि त्वा॒ हवा॑महे
semaṃ na̱: stoma̱mā ga̱hyupe̱daṃ sava̍naṃ su̱tam | gau̱ro na tṛ̍ṣi̱taḥ pi̍ba
||5||सेमं न॒: स्तोम॒मा ग॒ह्युपे॒दं सव॑नं सु॒तम् । गौ॒रो न तृ॑षि॒तः पि॑ब
i̱me somā̍sa̱ inda̍vaḥ su̱tāso̱ adhi̍ ba̱rhiṣi̍ | tām̐ i̍ndra̱ saha̍se piba
||6||इ॒मे सोमा॑स॒ इन्द॑वः सु॒तासो॒ अधि॑ ब॒र्हिषि॑ । ताँ इ॑न्द्र॒ सह॑से पिब
a̱yaṃ te̱ stomo̍ agri̱yo hṛ̍di̱spṛga̍stu̱ śaṃta̍maḥ | athā̱ soma̍ṃ su̱taṃ pi̍ba
||7||अ॒यं ते॒ स्तोमो॑ अग्रि॒यो हृ॑दि॒स्पृग॑स्तु॒ शंत॑मः । अथा॒ सोमं॑ सु॒तं पि॑ब
viśva̱mitsava̍naṃ su̱tamindro̱ madā̍ya gacchati | vṛ̱tra̱hā soma̍pītaye
||8||विश्व॒मित्सव॑नं सु॒तमिन्द्रो॒ मदा॑य गच्छति । वृ॒त्र॒हा सोम॑पीतये
semaṃ na̱: kāma̱mā pṛ̍ṇa̱ gobhi̱raśvai̍: śatakrato | stavā̍ma tvā svā̱dhya̍:
||9||सेमं न॒: काम॒मा पृ॑ण॒ गोभि॒रश्वै॑: शतक्रतो । स्तवा॑म त्वा स्वा॒ध्य॑: