Sūktam 13 — narāśasa (12 mantras) — Śākala Saṃhitā (Ṛgveda)

Study

susa̍middho na̱ ā va̍ha de̱vām̐ a̍gne ha̱viṣma̍te | hota̍: pāvaka̱ yakṣi̍ ca

||1||

सुस॑मिद्धो न॒ आ व॑ह दे॒वाँ अ॑ग्ने ह॒विष्म॑ते । होत॑: पावक॒ यक्षि॑ च

madhu̍mantaṃ tanūnapād ya̱jñaṃ de̱veṣu̍ naḥ kave | a̱dyā kṛ̍ṇuhi vī̱taye̍

||2||

मधु॑मन्तं तनूनपाद् य॒ज्ञं दे॒वेषु॑ नः कवे । अ॒द्या कृ॑णुहि वी॒तये॑

narā̱śaṃsa̍mi̱ha pri̱yama̱smin ya̱jña upa̍ hvaye | madhu̍jihvaṃ havi̱ṣkṛta̍m

||3||

नरा॒शंस॑मि॒ह प्रि॒यम॒स्मिन् य॒ज्ञ उप॑ ह्वये । मधु॑जिह्वं हवि॒ष्कृत॑म्

agne̍ su̱khata̍me̱ rathe̍ de̱vām̐ ī̍l̤i̱ta ā va̍ha | asi̱ hotā̱ manu̍rhitaḥ

||4||

अग्ने॑ सु॒खत॑मे॒ रथे॑ दे॒वाँ ई॑ळि॒त आ व॑ह । असि॒ होता॒ मनु॑र्हितः

stṛ̱ṇī̱ta ba̱rhirā̍nu̱ṣag ghṛ̱tapṛ̍ṣṭhaṃ manīṣiṇaḥ | yatrā̱mṛta̍sya̱ cakṣa̍ṇam

||5||

स्तृ॒णी॒त ब॒र्हिरा॑नु॒षग् घृ॒तपृ॑ष्ठं मनीषिणः । यत्रा॒मृत॑स्य॒ चक्ष॑णम्

vi śra̍yantāmṛtā̱vṛdho̱ dvāro̍ de̱vīra̍sa̱ścata̍: | a̱dyā nū̱naṃ ca̱ yaṣṭa̍ve

||6||

वि श्र॑यन्तामृता॒वृधो॒ द्वारो॑ दे॒वीर॑स॒श्चत॑: । अ॒द्या नू॒नं च॒ यष्ट॑वे

nakto̱ṣāsā̍ su̱peśa̍sā̱ 'smin ya̱jña upa̍ hvaye | i̱daṃ no̍ ba̱rhirā̱sade̍

||7||

नक्तो॒षासा॑ सु॒पेश॑सा॒ ऽस्मिन् य॒ज्ञ उप॑ ह्वये । इ॒दं नो॑ ब॒र्हिरा॒सदे॑

tā su̍ji̱hvā upa̍ hvaye̱ hotā̍rā̱ daivyā̍ ka̱vī | ya̱jñaṃ no̍ yakṣatāmi̱mam

||8||

ता सु॑जि॒ह्वा उप॑ ह्वये॒ होता॑रा॒ दैव्या॑ क॒वी । य॒ज्ञं नो॑ यक्षतामि॒मम्

il̤ā̱ sara̍svatī ma̱hī ti̱sro de̱vīrma̍yo̱bhuva̍: | ba̱rhiḥ sī̍dantva̱sridha̍:

||9||

इळा॒ सर॑स्वती म॒ही ति॒स्रो दे॒वीर्म॑यो॒भुव॑: । ब॒र्हिः सी॑दन्त्व॒स्रिध॑:

i̱ha tvaṣṭā̍ramagri̱yaṃ vi̱śvarū̍pa̱mupa̍ hvaye | a̱smāka̍mastu̱ keva̍laḥ

||10||

इ॒ह त्वष्टा॑रमग्रि॒यं वि॒श्वरू॑प॒मुप॑ ह्वये । अ॒स्माक॑मस्तु॒ केव॑लः

ava̍ sṛjā vanaspate̱ deva̍ de̱vebhyo̍ ha̱viḥ | pra dā̱tura̍stu̱ ceta̍nam

||11||

अव॑ सृजा वनस्पते॒ देव॑ दे॒वेभ्यो॑ ह॒विः । प्र दा॒तुर॑स्तु॒ चेत॑नम्

svāhā̍ ya̱jñaṃ kṛ̍ṇota̱nendrā̍ya̱ yajva̍no gṛ̱he | tatra̍ de̱vām̐ upa̍ hvaye

||12||

स्वाहा॑ य॒ज्ञं कृ॑णोत॒नेन्द्रा॑य॒ यज्व॑नो गृ॒हे । तत्र॑ दे॒वाँ उप॑ ह्वये