Study
- Anukramaṇī
- Source
5 nodhā gautamaḥ| agniḥ|triṣṭup|
vahni̍ṃ ya̱śasa̍ṃ vi̱datha̍sya ke̱tuṃ su̍prā̱vya̍ṃ dū̱taṃ sa̱dyoa̍rtham |
dvi̱janmā̍naṃ ra̱yimi̍va praśa̱staṃ rā̱tiṃ bha̍ra̱d bhṛga̍ve māta̱riśvā̍
||1||वह्निं॑ य॒शसं॑ वि॒दथ॑स्य के॒तुं सु॑प्रा॒व्यं॑ दू॒तं स॒द्योअ॑र्थम् ।
द्वि॒जन्मा॑नं र॒यिमि॑व प्रश॒स्तं रा॒तिं भ॑र॒द् भृग॑वे मात॒रिश्वा॑
a̱sya śāsu̍ru̱bhayā̍saḥ sacante ha̱viṣma̍nta u̱śijo̱ ye ca̱ martā̍: |
di̱vaści̱t pūrvo̱ nya̍sādi̱ hotā̱ ''pṛcchyo̍ vi̱śpati̍rvi̱kṣu ve̱dhāḥ
||2||अ॒स्य शासु॑रु॒भया॑सः सचन्ते ह॒विष्म॑न्त उ॒शिजो॒ ये च॒ मर्ता॑: ।
दि॒वश्चि॒त् पूर्वो॒ न्य॑सादि॒ होता॒ ऽऽपृच्छ्यो॑ वि॒श्पति॑र्वि॒क्षु वे॒धाः
taṃ navya̍sī hṛ̱da ā jāya̍mānama̱smat su̍kī̱rtirmadhu̍jihvamaśyāḥ |
yamṛ̱tvijo̍ vṛ̱jane̱ mānu̍ṣāsa̱: praya̍svanta ā̱yavo̱ jīja̍nanta
||3||तं नव्य॑सी हृ॒द आ जाय॑मानम॒स्मत् सु॑की॒र्तिर्मधु॑जिह्वमश्याः ।
यमृ॒त्विजो॑ वृ॒जने॒ मानु॑षास॒: प्रय॑स्वन्त आ॒यवो॒ जीज॑नन्त
u̱śik pā̍va̱ko vasu̱rmānu̍ṣeṣu̱ vare̍ṇyo̱ hotā̍dhāyi vi̱kṣu |
damū̍nā gṛ̱hapa̍ti̱rdama̱ ām̐ a̱gnirbhu̍vad rayi̱patī̍ rayī̱ṇām
||4||उ॒शिक् पा॑व॒को वसु॒र्मानु॑षेषु॒ वरे॑ण्यो॒ होता॑धायि वि॒क्षु ।
दमू॑ना गृ॒हप॑ति॒र्दम॒ आँ अ॒ग्निर्भु॑वद् रयि॒पती॑ रयी॒णाम्
taṃ tvā̍ va̱yaṃ pati̍magne rayī̱ṇāṃ pra śa̍ṃsāmo ma̱tibhi̱rgota̍māsaḥ |
ā̱śuṃ na vā̍jambha̱raṃ ma̱rjaya̍ntaḥ prā̱tarma̱kṣū dhi̱yāva̍surjagamyāt
||5||तं त्वा॑ व॒यं पति॑मग्ने रयी॒णां प्र शं॑सामो म॒तिभि॒र्गोत॑मासः ।
आ॒शुं न वा॑जम्भ॒रं म॒र्जय॑न्तः प्रा॒तर्म॒क्षू धि॒याव॑सुर्जगम्यात्