Study
- Anukramaṇī
- Source
9 kaṇvo ghauraḥ| varuṇamitrāryamaṇaḥ, 4-6 ādityāḥ| gāyatrī|
yaṃ rakṣa̍nti̱ prace̍taso̱ varu̍ṇo mi̱tro a̍rya̱mā | nū ci̱tsa da̍bhyate̱ jana̍:
||1||यं रक्ष॑न्ति॒ प्रचे॑तसो॒ वरु॑णो मि॒त्रो अ॑र्य॒मा । नू चि॒त्स द॑भ्यते॒ जन॑:
yaṃ bā̱hute̍va̱ pipra̍ti̱ pānti̱ martya̍ṃ ri̱ṣaḥ | ari̍ṣṭa̱: sarva̍ edhate
||2||यं बा॒हुते॑व॒ पिप्र॑ति॒ पान्ति॒ मर्त्यं॑ रि॒षः । अरि॑ष्ट॒: सर्व॑ एधते
vi du̱rgā vi dviṣa̍: pu̱ro ghnanti̱ rājā̍na eṣām | naya̍nti duri̱tā ti̱raḥ
||3||वि दु॒र्गा वि द्विष॑: पु॒रो घ्नन्ति॒ राजा॑न एषाम् । नय॑न्ति दुरि॒ता ति॒रः
su̱gaḥ panthā̍ anṛkṣa̱ra ādi̍tyāsa ṛ̱taṃ ya̱te | nātrā̍vakhā̱do a̍sti vaḥ
||4||सु॒गः पन्था॑ अनृक्ष॒र आदि॑त्यास ऋ॒तं य॒ते । नात्रा॑वखा॒दो अ॑स्ति वः
yaṃ ya̱jñaṃ naya̍thā nara̱ ādi̍tyā ṛ̱junā̍ pa̱thā | pra va̱: sa dhī̱taye̍ naśat
||5||यं य॒ज्ञं नय॑था नर॒ आदि॑त्या ऋ॒जुना॑ प॒था । प्र व॒: स धी॒तये॑ नशत्
sa ratna̱ṃ martyo̱ vasu̱ viśva̍ṃ to̱kamu̱ta tmanā̍ | acchā̍ gaccha̱tyastṛ̍taḥ
||6||स रत्नं॒ मर्त्यो॒ वसु॒ विश्वं॑ तो॒कमु॒त त्मना॑ । अच्छा॑ गच्छ॒त्यस्तृ॑तः
ka̱thā rā̍dhāma sakhāya̱: stoma̍ṃ mi̱trasyā̍rya̱mṇaḥ | mahi̱ psaro̱ varu̍ṇasya
||7||क॒था रा॑धाम सखाय॒: स्तोमं॑ मि॒त्रस्या॑र्य॒म्णः । महि॒ प्सरो॒ वरु॑णस्य
mā vo̱ ghnanta̱ṃ mā śapa̍nta̱ṃ prati̍ voce deva̱yanta̍m | su̱mnairid va̱ ā vi̍vāse
||8||मा वो॒ घ्नन्तं॒ मा शप॑न्तं॒ प्रति॑ वोचे देव॒यन्त॑म् । सु॒म्नैरिद् व॒ आ वि॑वासे
ca̱tura̍ści̱d dada̍mānād bibhī̱yādā nidhā̍toḥ | na du̍ru̱ktāya̍ spṛhayet
||9||च॒तुर॑श्चि॒द् दद॑मानाद् बिभी॒यादा निधा॑तोः । न दु॑रु॒क्ताय॑ स्पृहयेत्