अध्ययनम्
- अनुक्रमणिका
- मूलम्
५ गोतमो राहूगणः। अग्निः। त्रिष्टुप्।
क॒था दा॑शेमा॒ग्नये॒ कास्मै॑ दे॒वजु॑ष्टोच्यते भा॒मिने॒ गीः ।
यो मर्त्ये॑ष्व॒मृत॑ ऋ॒तावा॒ होता॒ यजि॑ष्ठ॒ इत् कृ॒णोति॑ दे॒वान्
॥१॥ka̱thā dā̍śemā̱gnaye̱ kāsmai̍ de̱vaju̍ṣṭocyate bhā̱mine̱ gīḥ |
yo martye̍ṣva̱mṛta̍ ṛ̱tāvā̱ hotā̱ yaji̍ṣṭha̱ it kṛ̱ṇoti̍ de̱vān
यो अ॑ध्व॒रेषु॒ शंत॑म ऋ॒तावा॒ होता॒ तमू॒ नमो॑भि॒रा कृ॑णुध्वम् ।
अ॒ग्निर्यद् वेर्मर्ता॑य दे॒वान्त्स चा॒ बोधा॑ति॒ मन॑सा यजाति
॥२॥yo a̍dhva̱reṣu̱ śaṃta̍ma ṛ̱tāvā̱ hotā̱ tamū̱ namo̍bhi̱rā kṛ̍ṇudhvam |
a̱gniryad vermartā̍ya de̱vāntsa cā̱ bodhā̍ti̱ mana̍sā yajāti
स हि क्रतु॒: स मर्य॒: स सा॒धुर्मि॒त्रो न भू॒दद्भु॑तस्य र॒थीः ।
तं मेधे॑षु प्रथ॒मं दे॑व॒यन्ती॒र्विश॒ उप॑ ब्रुवते द॒स्ममारी॑:
॥३॥sa hi kratu̱: sa marya̱: sa sā̱dhurmi̱tro na bhū̱dadbhu̍tasya ra̱thīḥ |
taṃ medhe̍ṣu pratha̱maṃ de̍va̱yantī̱rviśa̱ upa̍ bruvate da̱smamārī̍:
स नो॑ नृ॒णां नृत॑मो रि॒शादा॑ अ॒ग्निर्गिरोऽव॑सा वेतु धी॒तिम् ।
तना॑ च॒ ये म॒घवा॑न॒: शवि॑ष्ठा॒ वाज॑प्रसूता इ॒षय॑न्त॒ मन्म॑
॥४॥sa no̍ nṛ̱ṇāṃ nṛta̍mo ri̱śādā̍ a̱gnirgiro'va̍sā vetu dhī̱tim |
tanā̍ ca̱ ye ma̱ghavā̍na̱: śavi̍ṣṭhā̱ vāja̍prasūtā i̱ṣaya̍nta̱ manma̍
ए॒वाग्निर्गोत॑मेभिर्ऋ॒तावा॒ विप्रे॑भिरस्तोष्ट जा॒तवे॑दाः ।
स ए॑षु द्यु॒म्नं पी॑पय॒त् स वाजं॒ स पु॒ष्टिं या॑ति॒ जोष॒मा चि॑कि॒त्वान्
॥५॥e̱vāgnirgota̍mebhirṛ̱tāvā̱ vipre̍bhirastoṣṭa jā̱tave̍dāḥ |
sa e̍ṣu dyu̱mnaṃ pī̍paya̱t sa vāja̱ṃ sa pu̱ṣṭiṃ yā̍ti̱ joṣa̱mā ci̍ki̱tvān