अध्ययनम्
- अनुक्रमणिका
- मूलम्
४ दीर्घतमा औचथ्यः। मित्रावरुणौ। त्रिष्टुप्।
यजा॑महे वां म॒हः स॒जोषा॑ ह॒व्येभि॑र्मित्रावरुणा॒ नमो॑भिः ।
घृ॒तैर्घृ॑तस्नू॒ अध॒ यद् वा॑म॒स्मे अ॑ध्व॒र्यवो॒ न धी॒तिभि॒र्भर॑न्ति
॥१॥yajā̍mahe vāṃ ma̱haḥ sa̱joṣā̍ ha̱vyebhi̍rmitrāvaruṇā̱ namo̍bhiḥ |
ghṛ̱tairghṛ̍tasnū̱ adha̱ yad vā̍ma̱sme a̍dhva̱ryavo̱ na dhī̱tibhi̱rbhara̍nti
प्रस्तु॑तिर्वां॒ धाम॒ न प्रयु॑क्ति॒रया॑मि मित्रावरुणा सुवृ॒क्तिः ।
अ॒नक्ति॒ यद् वां॑ वि॒दथे॑षु॒ होता॑ सु॒म्नं वां॑ सू॒रिर्वृ॑षणा॒विय॑क्षन्
॥२॥prastu̍tirvā̱ṃ dhāma̱ na prayu̍kti̱rayā̍mi mitrāvaruṇā suvṛ̱ktiḥ |
a̱nakti̱ yad vā̍ṃ vi̱dathe̍ṣu̱ hotā̍ su̱mnaṃ vā̍ṃ sū̱rirvṛ̍ṣaṇā̱viya̍kṣan
पी॒पाय॑ धे॒नुरदि॑तिर्ऋ॒ताय॒ जना॑य मित्रावरुणा हवि॒र्दे ।
हि॒नोति॒ यद् वां॑ वि॒दथे॑ सप॒र्यन् त्स रा॒तह॑व्यो॒ मानु॑षो॒ न होता॑
॥३॥pī̱pāya̍ dhe̱nuradi̍tirṛ̱tāya̱ janā̍ya mitrāvaruṇā havi̱rde |
hi̱noti̱ yad vā̍ṃ vi̱dathe̍ sapa̱ryan tsa rā̱taha̍vyo̱ mānu̍ṣo̱ na hotā̍
उ॒त वां॑ वि॒क्षु मद्या॒स्वन्धो॒ गाव॒ आप॑श्च पीपयन्त दे॒वीः ।
उ॒तो नो॑ अ॒स्य पू॒र्व्यः पति॒र्दन् वी॒तं पा॒तं पय॑स उ॒स्रिया॑याः
॥४॥u̱ta vā̍ṃ vi̱kṣu madyā̱svandho̱ gāva̱ āpa̍śca pīpayanta de̱vīḥ |
u̱to no̍ a̱sya pū̱rvyaḥ pati̱rdan vī̱taṃ pā̱taṃ paya̍sa u̱sriyā̍yāḥ