अध्ययनम्
- अनुक्रमणिका
- मूलम्
५ अगस्त्यो मैत्रावरुणिः । इन्द्रः। त्रिष्टुप्।
यद्ध॒ स्या त॑ इन्द्र श्रु॒ष्टिरस्ति॒ यया॑ ब॒भूथ॑ जरि॒तृभ्य॑ ऊ॒ती ।
मा न॒: कामं॑ म॒हय॑न्त॒मा ध॒ग्विश्वा॑ ते अश्यां॒ पर्याप॑ आ॒योः
॥१॥yaddha̱ syā ta̍ indra śru̱ṣṭirasti̱ yayā̍ ba̱bhūtha̍ jari̱tṛbhya̍ ū̱tī |
mā na̱: kāma̍ṃ ma̱haya̍nta̱mā dha̱gviśvā̍ te aśyā̱ṃ paryāpa̍ ā̱yoḥ
न घा॒ राजेन्द्र॒ आ द॑भन्नो॒ या नु स्वसा॑रा कृ॒णव॑न्त॒ योनौ॑ ।
आप॑श्चिदस्मै सु॒तुका॑ अवेष॒न् गम॑न्न॒ इन्द्र॑: स॒ख्या वय॑श्च
॥२॥na ghā̱ rājendra̱ ā da̍bhanno̱ yā nu svasā̍rā kṛ̱ṇava̍nta̱ yonau̍ |
āpa̍ścidasmai su̱tukā̍ aveṣa̱n gama̍nna̱ indra̍: sa̱khyā vaya̍śca
जेता॒ नृभि॒रिन्द्र॑: पृ॒त्सु शूर॒: श्रोता॒ हवं॒ नाध॑मानस्य का॒रोः ।
प्रभ॑र्ता॒ रथं॑ दा॒शुष॑ उपा॒क उद्य॑न्ता॒ गिरो॒ यदि॑ च॒ त्मना॒ भूत्
॥३॥jetā̱ nṛbhi̱rindra̍: pṛ̱tsu śūra̱: śrotā̱ hava̱ṃ nādha̍mānasya kā̱roḥ |
prabha̍rtā̱ ratha̍ṃ dā̱śuṣa̍ upā̱ka udya̍ntā̱ giro̱ yadi̍ ca̱ tmanā̱ bhūt
ए॒वा नृभि॒रिन्द्र॑: सुश्रव॒स्या प्र॑खा॒दः पृ॒क्षो अ॒भि मि॒त्रिणो॑ भूत् ।
स॒म॒र्य इ॒षः स्त॑वते॒ विवा॑चि सत्राक॒रो यज॑मानस्य॒ शंस॑:
॥४॥e̱vā nṛbhi̱rindra̍: suśrava̱syā pra̍khā̱daḥ pṛ̱kṣo a̱bhi mi̱triṇo̍ bhūt |
sa̱ma̱rya i̱ṣaḥ sta̍vate̱ vivā̍ci satrāka̱ro yaja̍mānasya̱ śaṃsa̍:
त्वया॑ व॒यं म॑घवन्निन्द्र॒ शत्रू॑न॒भि ष्या॑म मह॒तो मन्य॑मानान् ।
त्वं त्रा॒ता त्वमु॑ नो वृ॒धे भू॑र्वि॒द्यामे॒षं वृ॒जनं॑ जी॒रदा॑नुम्
॥५॥tvayā̍ va̱yaṃ ma̍ghavannindra̱ śatrū̍na̱bhi ṣyā̍ma maha̱to manya̍mānān |
tvaṃ trā̱tā tvamu̍ no vṛ̱dhe bhū̍rvi̱dyāme̱ṣaṃ vṛ̱jana̍ṃ jī̱radā̍num