अध्ययनम्
- अनुक्रमणिका
- मूलम्
८ कुत्स आङ्गिरसः। इन्द्रः। त्रिष्टुप्।
तत् त॑ इन्द्रि॒यं प॑र॒मं प॑रा॒चैरधा॑रयन्त क॒वय॑: पु॒रेदम् ।
क्ष॒मेदम॒न्यद् दि॒व्य १ न्यद॑स्य॒ समी॑ पृच्यते सम॒नेव॑ के॒तुः
॥१॥tat ta̍ indri̱yaṃ pa̍ra̱maṃ pa̍rā̱cairadhā̍rayanta ka̱vaya̍: pu̱redam |
kṣa̱medama̱nyad di̱vya 1 nyada̍sya̱ samī̍ pṛcyate sama̱neva̍ ke̱tuḥ
स धा॑रयत् पृथि॒वीं प॒प्रथ॑च्च॒ वज्रे॑ण ह॒त्वा निर॒पः स॑सर्ज ।
अह॒न्नहि॒मभि॑नद्रौहि॒णं व्यह॒न् व्यं॑सं म॒घवा॒ शची॑भिः
॥२॥sa dhā̍rayat pṛthi̱vīṃ pa̱pratha̍cca̱ vajre̍ṇa ha̱tvā nira̱paḥ sa̍sarja |
aha̱nnahi̱mabhi̍nadrauhi̱ṇaṃ vyaha̱n vya̍ṃsaṃ ma̱ghavā̱ śacī̍bhiḥ
स जा॒तूभ॑र्मा श्र॒द्दधा॑न॒ ओज॒: पुरो॑ विभि॒न्दन्न॑चर॒द् वि दासी॑: ।
वि॒द्वान् वज्रि॒न् दस्य॑वे हे॒तिम॒स्याऽऽर्यं॒ सहो॑ वर्धया द्यु॒म्नमि॑न्द्र
॥३॥sa jā̱tūbha̍rmā śra̱ddadhā̍na̱ oja̱: puro̍ vibhi̱ndanna̍cara̱d vi dāsī̍: |
vi̱dvān vajri̱n dasya̍ve he̱tima̱syā''rya̱ṃ saho̍ vardhayā dyu̱mnami̍ndra
तदू॒चुषे॒ मानु॑षे॒मा यु॒गानि॑ की॒र्तेन्यं॑ म॒घवा॒ नाम॒ बिभ्र॑त् ।
उ॒प॒प्र॒यन् द॑स्यु॒हत्या॑य व॒ज्री यद्ध॑ सू॒नुः श्रव॑से॒ नाम॑ द॒धे
॥४॥tadū̱cuṣe̱ mānu̍ṣe̱mā yu̱gāni̍ kī̱rtenya̍ṃ ma̱ghavā̱ nāma̱ bibhra̍t |
u̱pa̱pra̱yan da̍syu̱hatyā̍ya va̱jrī yaddha̍ sū̱nuḥ śrava̍se̱ nāma̍ da̱dhe
तद॑स्ये॒दं प॑श्यता॒ भूरि॑ पु॒ष्टं श्रदिन्द्र॑स्य धत्तन वी॒र्या॑य ।
स गा अ॑विन्द॒त् सो अ॑विन्द॒दश्वा॒न् त्स ओष॑धी॒: सो अ॒पः स वना॑नि
॥५॥tada̍sye̱daṃ pa̍śyatā̱ bhūri̍ pu̱ṣṭaṃ śradindra̍sya dhattana vī̱ryā̍ya |
sa gā a̍vinda̱t so a̍vinda̱daśvā̱n tsa oṣa̍dhī̱: so a̱paḥ sa vanā̍ni
भूरि॑कर्मणे वृष॒भाय॒ वृष्णे॑ स॒त्यशु॑ष्माय सुनवाम॒ सोम॑म् ।
य आ॒दृत्या॑ परिप॒न्थीव॒ शूरो ऽय॑ज्वनो वि॒भज॒न्नेति॒ वेद॑:
॥६॥bhūri̍karmaṇe vṛṣa̱bhāya̱ vṛṣṇe̍ sa̱tyaśu̍ṣmāya sunavāma̱ soma̍m |
ya ā̱dṛtyā̍ paripa̱nthīva̱ śūro 'ya̍jvano vi̱bhaja̱nneti̱ veda̍:
तदि॑न्द्र॒ प्रेव॑ वी॒र्यं॑ चकर्थ॒ यत् स॒सन्तं॒ वज्रे॒णाबो॑ध॒योऽहि॑म् ।
अनु॑ त्वा॒ पत्नी॑र्हृषि॒तं वय॑श्च॒ विश्वे॑ दे॒वासो॑ अमद॒न्ननु॑ त्वा
॥७॥tadi̍ndra̱ preva̍ vī̱rya̍ṃ cakartha̱ yat sa̱santa̱ṃ vajre̱ṇābo̍dha̱yo'hi̍m |
anu̍ tvā̱ patnī̍rhṛṣi̱taṃ vaya̍śca̱ viśve̍ de̱vāso̍ amada̱nnanu̍ tvā
शुष्णं॒ पिप्रुं॒ कुय॑वं वृ॒त्रमि॑न्द्र य॒दाव॑धी॒र्वि पुर॒: शम्ब॑रस्य ।
तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः
॥८॥śuṣṇa̱ṃ pipru̱ṃ kuya̍vaṃ vṛ̱trami̍ndra ya̱dāva̍dhī̱rvi pura̱: śamba̍rasya |
tanno̍ mi̱tro varu̍ṇo māmahantā̱madi̍ti̱: sindhu̍: pṛthi̱vī u̱ta dyauḥ