अध्ययनम्
- अनुक्रमणिका
- मूलम्
१० कण्वो घौरः। पूषा। गायत्री।
सं पू॑ष॒न्नध्व॑नस्तिर॒ व्यंहो॑ विमुचो नपात् । सक्ष्वा॑ देव॒ प्र ण॑स्पु॒रः
॥१॥saṃ pū̍ṣa̱nnadhva̍nastira̱ vyaṃho̍ vimuco napāt | sakṣvā̍ deva̱ pra ṇa̍spu̱raḥ
यो न॑: पूषन्न॒घो वृको॑ दु॒:शेव॑ आ॒दिदे॑शति । अप॑ स्म॒ तं प॒थो ज॑हि
॥२॥yo na̍: pūṣanna̱gho vṛko̍ du̱:śeva̍ ā̱dide̍śati | apa̍ sma̱ taṃ pa̱tho ja̍hi
अप॒ त्यं प॑रिप॒न्थिनं॑ मुषी॒वाणं॑ हुर॒श्चित॑म् । दू॒रमधि॑ स्रु॒तेर॑ज
॥३॥apa̱ tyaṃ pa̍ripa̱nthina̍ṃ muṣī̱vāṇa̍ṃ hura̱ścita̍m | dū̱ramadhi̍ sru̱tera̍ja
त्वं तस्य॑ द्वया॒विनो॒ ऽघशं॑सस्य॒ कस्य॑ चित् । प॒दाभि ति॑ष्ठ॒ तपु॑षिम्
॥४॥tvaṃ tasya̍ dvayā̱vino̱ 'ghaśa̍ṃsasya̱ kasya̍ cit | pa̱dābhi ti̍ṣṭha̱ tapu̍ṣim
आ तत्ते॑ दस्र मन्तुम॒: पूष॒न्नवो॑ वृणीमहे । येन॑ पि॒तॄनचो॑दयः
॥५॥ā tatte̍ dasra mantuma̱: pūṣa̱nnavo̍ vṛṇīmahe | yena̍ pi̱tṝnaco̍dayaḥ
अधा॑ नो विश्वसौभग॒ हिर॑ण्यवाशीमत्तम । धना॑नि सु॒षणा॑ कृधि
॥६॥adhā̍ no viśvasaubhaga̱ hira̍ṇyavāśīmattama | dhanā̍ni su̱ṣaṇā̍ kṛdhi
अति॑ नः स॒श्चतो॑ नय सु॒गा न॑: सु॒पथा॑ कृणु । पूष॑न्नि॒ह क्रतुं॑ विदः
॥७॥ati̍ naḥ sa̱ścato̍ naya su̱gā na̍: su̱pathā̍ kṛṇu | pūṣa̍nni̱ha kratu̍ṃ vidaḥ
अ॒भि सू॒यव॑सं नय॒ न न॑वज्वा॒रो अध्व॑ने । पूष॑न्नि॒ह क्रतुं॑ विदः
॥८॥a̱bhi sū̱yava̍saṃ naya̱ na na̍vajvā̱ro adhva̍ne | pūṣa̍nni̱ha kratu̍ṃ vidaḥ
श॒ग्धि पू॒र्धि प्र यं॑सि च शिशी॒हि प्रास्यु॒दर॑म् । पूष॑न्नि॒ह क्रतुं॑ विदः
॥९॥śa̱gdhi pū̱rdhi pra ya̍ṃsi ca śiśī̱hi prāsyu̱dara̍m | pūṣa̍nni̱ha kratu̍ṃ vidaḥ
न पू॒षणं॑ मेथामसि सू॒क्तैर॒भि गृ॑णीमसि । वसू॑नि द॒स्ममी॑महे
॥१०॥na pū̱ṣaṇa̍ṃ methāmasi sū̱ktaira̱bhi gṛ̍ṇīmasi | vasū̍ni da̱smamī̍mahe