अध्ययनम्
- अनुक्रमणिका
- मूलम्
१२ मेधातिथिः काण्वः। अग्निः,६ प्रथमपादस्य (निर्मथ्याहवनीयौ) अग्नी। गायत्री।
अ॒ग्निं दू॒तं वृ॑णीमहे॒ होता॑रं वि॒श्ववे॑दसम् । अ॒स्य य॒ज्ञस्य॑ सु॒क्रतु॑म्
॥१॥a̱gniṃ dū̱taṃ vṛ̍ṇīmahe̱ hotā̍raṃ vi̱śvave̍dasam | a̱sya ya̱jñasya̍ su̱kratu̍m
अ॒ग्निम॑ग्निं॒ हवी॑मभि॒: सदा॑ हवन्त वि॒श्पति॑म् । ह॒व्य॒वाहं॑ पुरुप्रि॒यम्
॥२॥a̱gnima̍gni̱ṃ havī̍mabhi̱: sadā̍ havanta vi̱śpati̍m | ha̱vya̱vāha̍ṃ purupri̱yam
अग्ने॑ दे॒वाँ इ॒हा व॑ह जज्ञा॒नो वृ॒क्तब॑र्हिषे । असि॒ होता॑ न॒ ईड्य॑:
॥३॥agne̍ de̱vām̐ i̱hā va̍ha jajñā̱no vṛ̱ktaba̍rhiṣe | asi̱ hotā̍ na̱ īḍya̍:
ताँ उ॑श॒तो वि बो॑धय॒ यद॑ग्ने॒ यासि॑ दू॒त्य॑म् । दे॒वैरा स॑त्सि ब॒र्हिषि॑
॥४॥tām̐ u̍śa̱to vi bo̍dhaya̱ yada̍gne̱ yāsi̍ dū̱tya̍m | de̱vairā sa̍tsi ba̱rhiṣi̍
घृता॑हवन दीदिव॒: प्रति॑ ष्म॒ रिष॑तो दह । अग्ने॒ त्वं र॑क्ष॒स्विन॑:
॥५॥ghṛtā̍havana dīdiva̱: prati̍ ṣma̱ riṣa̍to daha | agne̱ tvaṃ ra̍kṣa̱svina̍:
अ॒ग्निना॒ग्निः समि॑ध्यते क॒विर्गृ॒हप॑ति॒र्युवा॑ । ह॒व्य॒वाड् जु॒ह्वा॑स्यः
॥६॥a̱gninā̱gniḥ sami̍dhyate ka̱virgṛ̱hapa̍ti̱ryuvā̍ | ha̱vya̱vāḍ ju̱hvā̍syaḥ
क॒विम॒ग्निमुप॑ स्तुहि स॒त्यध॑र्माणमध्व॒रे । दे॒वम॑मीव॒चात॑नम्
॥७॥ka̱vima̱gnimupa̍ stuhi sa̱tyadha̍rmāṇamadhva̱re | de̱vama̍mīva̱cāta̍nam
यस्त्वाम॑ग्ने ह॒विष्प॑तिर्दू॒तं दे॑व सप॒र्यति॑ । तस्य॑ स्म प्रावि॒ता भ॑व
॥८॥yastvāma̍gne ha̱viṣpa̍tirdū̱taṃ de̍va sapa̱ryati̍ | tasya̍ sma prāvi̱tā bha̍va
यो अ॒ग्निं दे॒ववी॑तये ह॒विष्माँ॑ आ॒विवा॑सति । तस्मै॑ पावक मृळय
॥९॥yo a̱gniṃ de̱vavī̍taye ha̱viṣmā̍m̐ ā̱vivā̍sati | tasmai̍ pāvaka mṛl̤aya
स न॑: पावक दीदि॒वो ऽग्ने॑ दे॒वाँ इ॒हा व॑ह । उप॑ य॒ज्ञं ह॒विश्च॑ नः
॥१०॥sa na̍: pāvaka dīdi̱vo 'gne̍ de̱vām̐ i̱hā va̍ha | upa̍ ya̱jñaṃ ha̱viśca̍ naḥ
स न॒: स्तवा॑न॒ आ भ॑र गाय॒त्रेण॒ नवी॑यसा । र॒यिं वी॒रव॑ती॒मिष॑म्
॥११॥sa na̱: stavā̍na̱ ā bha̍ra gāya̱treṇa̱ navī̍yasā | ra̱yiṃ vī̱rava̍tī̱miṣa̍m
अग्ने॑ शु॒क्रेण॑ शो॒चिषा॒ विश्वा॑भिर्दे॒वहू॑तिभिः । इ॒मं स्तोमं॑ जुषस्व नः
॥१२॥agne̍ śu̱kreṇa̍ śo̱ciṣā̱ viśvā̍bhirde̱vahū̍tibhiḥ | i̱maṃ stoma̍ṃ juṣasva naḥ