अध्ययनम्
- अनुक्रमणिका
- मूलम्
१० गोतमो राहूगणः। मरुतः। गायत्री।
मरु॑तो॒ यस्य॒ हि क्षये॑ पा॒था दि॒वो वि॑महसः । स सु॑गो॒पात॑मो॒ जन॑:
॥१॥maru̍to̱ yasya̱ hi kṣaye̍ pā̱thā di̱vo vi̍mahasaḥ | sa su̍go̱pāta̍mo̱ jana̍:
य॒ज्ञैर्वा॑ यज्ञवाहसो॒ विप्र॑स्य वा मती॒नाम् । मरु॑तः शृणु॒ता हव॑म्
॥२॥ya̱jñairvā̍ yajñavāhaso̱ vipra̍sya vā matī̱nām | maru̍taḥ śṛṇu̱tā hava̍m
उ॒त वा॒ यस्य॑ वा॒जिनो ऽनु॒ विप्र॒मत॑क्षत । स गन्ता॒ गोम॑ति व्र॒जे
॥३॥u̱ta vā̱ yasya̍ vā̱jino 'nu̱ vipra̱mata̍kṣata | sa gantā̱ goma̍ti vra̱je
अ॒स्य वी॒रस्य॑ ब॒र्हिषि॑ सु॒तः सोमो॒ दिवि॑ष्टिषु । उ॒क्थं मद॑श्च शस्यते
॥४॥a̱sya vī̱rasya̍ ba̱rhiṣi̍ su̱taḥ somo̱ divi̍ṣṭiṣu | u̱kthaṃ mada̍śca śasyate
अ॒स्य श्रो॑ष॒न्त्वा भुवो॒ विश्वा॒ यश्च॑र्ष॒णीर॒भि । सूरं॑ चित् स॒स्रुषी॒रिष॑:
॥५॥a̱sya śro̍ṣa̱ntvā bhuvo̱ viśvā̱ yaśca̍rṣa̱ṇīra̱bhi | sūra̍ṃ cit sa̱sruṣī̱riṣa̍:
पू॒र्वीभि॒र्हि द॑दाशि॒म श॒रद्भि॑र्मरुतो व॒यम् । अवो॑भिश्चर्षणी॒नाम्
॥६॥pū̱rvībhi̱rhi da̍dāśi̱ma śa̱radbhi̍rmaruto va̱yam | avo̍bhiścarṣaṇī̱nām
सु॒भग॒: स प्र॑यज्यवो॒ मरु॑तो अस्तु॒ मर्त्य॑: । यस्य॒ प्रयां॑सि॒ पर्ष॑थ
॥७॥su̱bhaga̱: sa pra̍yajyavo̱ maru̍to astu̱ martya̍: | yasya̱ prayā̍ṃsi̱ parṣa̍tha
श॒श॒मा॒नस्य॑ वा नर॒: स्वेद॑स्य सत्यशवसः । वि॒दा काम॑स्य॒ वेन॑तः
॥८॥śa̱śa̱mā̱nasya̍ vā nara̱: sveda̍sya satyaśavasaḥ | vi̱dā kāma̍sya̱ vena̍taḥ
यू॒यं तत् स॑त्यशवस आ॒विष्क॑र्त महित्व॒ना । विध्य॑ता वि॒द्युता॒ रक्ष॑:
॥९॥yū̱yaṃ tat sa̍tyaśavasa ā̱viṣka̍rta mahitva̱nā | vidhya̍tā vi̱dyutā̱ rakṣa̍:
गूह॑ता॒ गुह्यं॒ तमो॒ वि या॑त॒ विश्व॑म॒त्रिण॑म् । ज्योति॑ष्कर्ता॒ यदु॒श्मसि॑
॥१०॥gūha̍tā̱ guhya̱ṃ tamo̱ vi yā̍ta̱ viśva̍ma̱triṇa̍m | jyoti̍ṣkartā̱ yadu̱śmasi̍