अध्ययनम्
- अनुक्रमणिका
- मूलम्
२२ आजीगर्तिः शुनःशेप स कृत्रिमो वैश्वामित्रो देवरातः। १-१६ इन्द्रः, १७-१९ अश्विनौ, २०-२२ उषाः।१-१०, १२-१५, १७-२२ गायत्री, ११ पादनिचृद्गायत्री, १६ त्रिष्टुप्।
आ व॒ इन्द्रं॒ क्रिविं॑ यथा वाज॒यन्त॑: श॒तक्र॑तुम् । मंहि॑ष्ठं सिञ्च॒ इन्दु॑भिः
॥१॥ā va̱ indra̱ṃ krivi̍ṃ yathā vāja̱yanta̍: śa̱takra̍tum | maṃhi̍ṣṭhaṃ siñca̱ indu̍bhiḥ
श॒तं वा॒ यः शुची॑नां स॒हस्रं॑ वा॒ समा॑शिराम् । एदु॑ नि॒म्नं न री॑यते
॥२॥śa̱taṃ vā̱ yaḥ śucī̍nāṃ sa̱hasra̍ṃ vā̱ samā̍śirām | edu̍ ni̱mnaṃ na rī̍yate
सं यन्मदा॑य शु॒ष्मिण॑ ए॒ना ह्य॑स्यो॒दरे॑ । स॒मु॒द्रो न व्यचो॑ द॒धे
॥३॥saṃ yanmadā̍ya śu̱ṣmiṇa̍ e̱nā hya̍syo̱dare̍ | sa̱mu̱dro na vyaco̍ da̱dhe
अ॒यमु॑ ते॒ सम॑तसि क॒पोत॑ इव गर्भ॒धिम् । वच॒स्तच्चि॑न्न ओहसे
॥४॥a̱yamu̍ te̱ sama̍tasi ka̱pota̍ iva garbha̱dhim | vaca̱stacci̍nna ohase
स्तो॒त्रं रा॑धानां पते॒ गिर्वा॑हो वीर॒ यस्य॑ ते । विभू॑तिरस्तु सू॒नृता॑
॥५॥sto̱traṃ rā̍dhānāṃ pate̱ girvā̍ho vīra̱ yasya̍ te | vibhū̍tirastu sū̱nṛtā̍
ऊ॒र्ध्वस्ति॑ष्ठा न ऊ॒तये॒ऽस्मिन्वाजे॑ शतक्रतो । सम॒न्येषु॑ ब्रवावहै
॥६॥ū̱rdhvasti̍ṣṭhā na ū̱taye̱'sminvāje̍ śatakrato | sama̱nyeṣu̍ bravāvahai
योगे॑योगे त॒वस्त॑रं॒ वाजे॑वाजे हवामहे । सखा॑य॒ इन्द्र॑मू॒तये॑
॥७॥yoge̍yoge ta̱vasta̍ra̱ṃ vāje̍vāje havāmahe | sakhā̍ya̱ indra̍mū̱taye̍
आ घा॑ गम॒द्यदि॒ श्रव॑त् सह॒स्रिणी॑भिरू॒तिभि॑: । वाजे॑भि॒रुप॑ नो॒ हव॑म्
॥८॥ā ghā̍ gama̱dyadi̱ śrava̍t saha̱sriṇī̍bhirū̱tibhi̍: | vāje̍bhi̱rupa̍ no̱ hava̍m
अनु॑ प्र॒त्नस्यौक॑सो हु॒वे तु॑विप्र॒तिं नर॑म् । यं ते॒ पूर्वं॑ पि॒ता हु॒वे
॥९॥anu̍ pra̱tnasyauka̍so hu̱ve tu̍vipra̱tiṃ nara̍m | yaṃ te̱ pūrva̍ṃ pi̱tā hu̱ve
तं त्वा॑ व॒यं वि॑श्ववा॒रा ऽऽ शा॑स्महे पुरुहूत । सखे॑ वसो जरि॒तृभ्य॑:
॥१०॥taṃ tvā̍ va̱yaṃ vi̍śvavā̱rā '' śā̍smahe puruhūta | sakhe̍ vaso jari̱tṛbhya̍:
अ॒स्माकं॑ शि॒प्रिणी॑नां॒ सोम॑पाः सोम॒पाव्ना॑म् । सखे॑ वज्रि॒न्त्सखी॑नाम्
॥११॥a̱smāka̍ṃ śi̱priṇī̍nā̱ṃ soma̍pāḥ soma̱pāvnā̍m | sakhe̍ vajri̱ntsakhī̍nām
तथा॒ तद॑स्तु सोमपा॒: सखे॑ वज्रि॒न्तथा॑ कृणु । यथा॑ त उ॒श्मसी॒ष्टये॑
॥१२॥tathā̱ tada̍stu somapā̱: sakhe̍ vajri̱ntathā̍ kṛṇu | yathā̍ ta u̱śmasī̱ṣṭaye̍
रे॒वती॑र्नः सध॒माद॒ इन्द्रे॑ सन्तु तु॒विवा॑जाः । क्षु॒मन्तो॒ याभि॒र्मदे॑म
॥१३॥re̱vatī̍rnaḥ sadha̱māda̱ indre̍ santu tu̱vivā̍jāḥ | kṣu̱manto̱ yābhi̱rmade̍ma
आ घ॒ त्वावा॒न् त्मना॒प्तः स्तो॒तृभ्यो॑ धृष्णविया॒नः । ऋ॒णोरक्षं॒ न च॒क्र्यो॑:
॥१४॥ā gha̱ tvāvā̱n tmanā̱ptaḥ sto̱tṛbhyo̍ dhṛṣṇaviyā̱naḥ | ṛ̱ṇorakṣa̱ṃ na ca̱kryo̍:
आ यद् दुव॑: शतक्रत॒वा कामं॑ जरितॄ॒णाम् । ऋ॒णोरक्षं॒ न शची॑भिः
॥१५॥ā yad duva̍: śatakrata̱vā kāma̍ṃ jaritṝ̱ṇām | ṛ̱ṇorakṣa̱ṃ na śacī̍bhiḥ
शश्व॒दिन्द्र॒: पोप्रु॑थद्भिर्जिगाय॒ नान॑दद्भि॒: शाश्व॑सद्भि॒र्धना॑नि ।
स नो॑ हिरण्यर॒थं दं॒सना॑वा॒न्त्स न॑: सनि॒ता स॒नये॒ स नो॑ऽदात्
॥१६॥śaśva̱dindra̱: popru̍thadbhirjigāya̱ nāna̍dadbhi̱: śāśva̍sadbhi̱rdhanā̍ni |
sa no̍ hiraṇyara̱thaṃ da̱ṃsanā̍vā̱ntsa na̍: sani̱tā sa̱naye̱ sa no̍'dāt
आश्वि॑ना॒वश्वा॑वत्ये॒षा या॑तं॒ शवी॑रया । गोम॑द् दस्रा॒ हिर॑ण्यवत्
॥१७॥āśvi̍nā̱vaśvā̍vatye̱ṣā yā̍ta̱ṃ śavī̍rayā | goma̍d dasrā̱ hira̍ṇyavat
स॒मा॒नयो॑जनो॒ हि वां॒ रथो॑ दस्रा॒वम॑र्त्यः । स॒मु॒द्रे अ॑श्वि॒नेय॑ते
॥१८॥sa̱mā̱nayo̍jano̱ hi vā̱ṃ ratho̍ dasrā̱vama̍rtyaḥ | sa̱mu̱dre a̍śvi̱neya̍te
न्य१घ्न्यस्य॑ मू॒र्धनि॑ च॒क्रं रथ॑स्य येमथुः । परि॒ द्याम॒न्यदी॑यते
॥१९॥nya1ghnyasya̍ mū̱rdhani̍ ca̱kraṃ ratha̍sya yemathuḥ | pari̱ dyāma̱nyadī̍yate
कस्त॑ उषः कधप्रिये भु॒जे मर्तो॑ अमर्त्ये । कं न॑क्षसे विभावरि
॥२०॥kasta̍ uṣaḥ kadhapriye bhu̱je marto̍ amartye | kaṃ na̍kṣase vibhāvari
व॒यं हि ते॒ अम॑न्म॒ह्याऽऽन्ता॒दा प॑रा॒कात् । अश्वे॒ न चि॑त्रे अरुषि
॥२१॥va̱yaṃ hi te̱ ama̍nma̱hyā''ntā̱dā pa̍rā̱kāt | aśve̱ na ci̍tre aruṣi
त्वं त्येभि॒रा ग॑हि॒ वाजे॑भिर्दुहितर्दिवः । अ॒स्मे र॒यिं नि धा॑रय
॥२२॥tvaṃ tyebhi̱rā ga̍hi̱ vāje̍bhirduhitardivaḥ | a̱sme ra̱yiṃ ni dhā̍raya