अध्ययनम्
- अनुक्रमणिका
- मूलम्
८ मेधातिथिः काण्वः। ऋभवः।गायत्री।
अ॒यं दे॒वाय॒ जन्म॑ने॒ स्तोमो॒ विप्रे॑भिरास॒या । अका॑रि रत्न॒धात॑मः
॥१॥a̱yaṃ de̱vāya̱ janma̍ne̱ stomo̱ vipre̍bhirāsa̱yā | akā̍ri ratna̱dhāta̍maḥ
य इन्द्रा॑य वचो॒युजा॑ तत॒क्षुर्मन॑सा॒ हरी॑ । शमी॑भिर्य॒ज्ञमा॑शत
॥२॥ya indrā̍ya vaco̱yujā̍ tata̱kṣurmana̍sā̱ harī̍ | śamī̍bhirya̱jñamā̍śata
तक्ष॒न् नास॑त्याभ्यां॒ परि॑ज्मानं सु॒खं रथ॑म् । तक्ष॑न् धे॒नुं स॑ब॒र्दुघा॑म्
॥३॥takṣa̱n nāsa̍tyābhyā̱ṃ pari̍jmānaṃ su̱khaṃ ratha̍m | takṣa̍n dhe̱nuṃ sa̍ba̱rdughā̍m
युवा॑ना पि॒तरा॒ पुन॑: स॒त्यम॑न्त्रा ऋजू॒यव॑: । ऋ॒भवो॑ वि॒ष्ट्य॑क्रत
॥४॥yuvā̍nā pi̱tarā̱ puna̍: sa̱tyama̍ntrā ṛjū̱yava̍: | ṛ̱bhavo̍ vi̱ṣṭya̍krata
सं वो॒ मदा॑सो अग्म॒तेन्द्रे॑ण च म॒रुत्व॑ता । आ॒दि॒त्येभि॑श्च॒ राज॑भिः
॥५॥saṃ vo̱ madā̍so agma̱tendre̍ṇa ca ma̱rutva̍tā | ā̱di̱tyebhi̍śca̱ rāja̍bhiḥ
उ॒त त्यं च॑म॒सं नवं॒ त्वष्टु॑र्दे॒वस्य॒ निष्कृ॑तम् । अक॑र्त च॒तुर॒: पुन॑:
॥६॥u̱ta tyaṃ ca̍ma̱saṃ nava̱ṃ tvaṣṭu̍rde̱vasya̱ niṣkṛ̍tam | aka̍rta ca̱tura̱: puna̍:
ते नो॒ रत्ना॑नि धत्तन॒ त्रिरा साप्ता॑नि सुन्व॒ते । एक॑मेकं सुश॒स्तिभि॑:
॥७॥te no̱ ratnā̍ni dhattana̱ trirā sāptā̍ni sunva̱te | eka̍mekaṃ suśa̱stibhi̍:
अधा॑रयन्त॒ वह्न॒यो ऽभ॑जन्त सुकृ॒त्यया॑ । भा॒गं दे॒वेषु॑ य॒ज्ञिय॑म्
॥८॥adhā̍rayanta̱ vahna̱yo 'bha̍janta sukṛ̱tyayā̍ | bhā̱gaṃ de̱veṣu̍ ya̱jñiya̍m