अध्ययनम्
- अनुक्रमणिका
- मूलम्
१० मधुच्छन्दा वैश्वामित्रः। १-३ इन्द्रः, ४,६,८,९ मरुतः, ५,७ मरुत इन्द्रश्च, १० इन्द्रः। गायत्री।
यु॒ञ्जन्ति॑ ब्र॒ध्नम॑रु॒षं चर॑न्तं॒ परि॑ त॒स्थुष॑:। रोच॑न्ते रोच॒ना दि॒वि
॥१॥yu̱ñjanti̍ bra̱dhnama̍ru̱ṣaṃ cara̍nta̱ṃ pari̍ ta̱sthuṣa̍:| roca̍nte roca̱nā di̱vi
यु॒ञ्जन्त्य॑स्य॒ काम्या॒ हरी॒ विप॑क्षसा॒ रथे॑। शोणा॑ धृ॒ष्णू नृ॒वाह॑सा
॥२॥yu̱ñjantya̍sya̱ kāmyā̱ harī̱ vipa̍kṣasā̱ rathe̍| śoṇā̍ dhṛ̱ṣṇū nṛ̱vāha̍sā
के॒तुं कृ॒ण्वन्न॑के॒तवे॒ पेशो॑ मर्या अपे॒शसे॑। समु॒षद्भि॑रजायथाः
॥३॥ke̱tuṃ kṛ̱ṇvanna̍ke̱tave̱ peśo̍ maryā ape̱śase̍| samu̱ṣadbhi̍rajāyathāḥ
आदह॑ स्व॒धामनु॒ पुन॑र्गर्भ॒त्वमे॑रि॒रे। दधा॑ना॒ नाम॑ य॒ज्ञिय॑म्
॥४॥ādaha̍ sva̱dhāmanu̱ puna̍rgarbha̱tvame̍ri̱re| dadhā̍nā̱ nāma̍ ya̱jñiya̍m
वी॒ळु चि॑दारुज॒त्नुभि॒र्गुहा॑ चिदिन्द्र॒ वह्नि॑भिः। अवि॑न्द उ॒स्रिया॒ अनु॑
॥५॥vī̱l̤u ci̍dāruja̱tnubhi̱rguhā̍ cidindra̱ vahni̍bhiḥ| avi̍nda u̱sriyā̱ anu̍
दे॒व॒यन्तो॒ यथा॑ म॒तिमच्छा॑ वि॒दद्व॑सुं॒ गिर॑:। म॒हाम॑नूषत श्रु॒तम्
॥६॥de̱va̱yanto̱ yathā̍ ma̱timacchā̍ vi̱dadva̍su̱ṃ gira̍:| ma̱hāma̍nūṣata śru̱tam
इन्द्रे॑ण॒ सं हि दृक्ष॑से संजग्मा॒नो अबि॑भ्युषा। म॒न्दू स॑मा॒नव॑र्चसा
॥७॥indre̍ṇa̱ saṃ hi dṛkṣa̍se saṃjagmā̱no abi̍bhyuṣā| ma̱ndū sa̍mā̱nava̍rcasā
अ॒न॒व॒द्यैर॒भिद्यु॑भिर्म॒खः सह॑स्वदर्चति। ग॒णैरिन्द्र॑स्य॒ काम्यै॑:
॥८॥a̱na̱va̱dyaira̱bhidyu̍bhirma̱khaḥ saha̍svadarcati| ga̱ṇairindra̍sya̱ kāmyai̍:
अत॑: परिज्म॒न्ना ग॑हि दि॒वो वा॑ रोच॒नादधि॑। सम॑स्मिन्नृञ्जते॒ गिर॑:
॥९॥ata̍: parijma̱nnā ga̍hi di̱vo vā̍ roca̱nādadhi̍| sama̍sminnṛñjate̱ gira̍:
इ॒तो वा॑ सा॒तिमीम॑हे दि॒वो वा॒ पार्थि॑वा॒दधि॑। इन्द्रं॑ म॒हो वा॒ रज॑सः
॥१०॥i̱to vā̍ sā̱timīma̍he di̱vo vā̱ pārthi̍vā̱dadhi̍| indra̍ṃ ma̱ho vā̱ raja̍saḥ