अध्ययनम्
- अनुक्रमणिका
- मूलम्
६ सव्य आङ्गिरसः। इन्द्रः। जगती।
प्र मंहि॑ष्ठाय बृह॒ते बृ॒हद्र॑ये स॒त्यशु॑ष्माय त॒वसे॑ म॒तिं भ॑रे ।
अ॒पामि॑व प्रव॒णे यस्य॑ दु॒र्धरं॒ राधो॑ वि॒श्वायु॒ शव॑से॒ अपा॑वृतम्
॥१॥pra maṃhi̍ṣṭhāya bṛha̱te bṛ̱hadra̍ye sa̱tyaśu̍ṣmāya ta̱vase̍ ma̱tiṃ bha̍re |
a̱pāmi̍va prava̱ṇe yasya̍ du̱rdhara̱ṃ rādho̍ vi̱śvāyu̱ śava̍se̱ apā̍vṛtam
अध॑ ते॒ विश्व॒मनु॑ हासदि॒ष्टय॒ आपो॑ नि॒म्नेव॒ सव॑ना ह॒विष्म॑तः ।
यत् पर्व॑ते॒ न स॒मशी॑त हर्य॒त इन्द्र॑स्य॒ वज्र॒: श्नथि॑ता हिर॒ण्यय॑:
॥२॥adha̍ te̱ viśva̱manu̍ hāsadi̱ṣṭaya̱ āpo̍ ni̱mneva̱ sava̍nā ha̱viṣma̍taḥ |
yat parva̍te̱ na sa̱maśī̍ta harya̱ta indra̍sya̱ vajra̱: śnathi̍tā hira̱ṇyaya̍:
अ॒स्मै भी॒माय॒ नम॑सा॒ सम॑ध्व॒र उषो॒ न शु॑भ्र॒ आ भ॑रा॒ पनी॑यसे ।
यस्य॒ धाम॒ श्रव॑से॒ नामे॑न्द्रि॒यं ज्योति॒रका॑रि ह॒रितो॒ नाय॑से
॥३॥a̱smai bhī̱māya̱ nama̍sā̱ sama̍dhva̱ra uṣo̱ na śu̍bhra̱ ā bha̍rā̱ panī̍yase |
yasya̱ dhāma̱ śrava̍se̱ nāme̍ndri̱yaṃ jyoti̱rakā̍ri ha̱rito̱ nāya̍se
इ॒मे त॑ इन्द्र॒ ते व॒यं पु॑रुष्टुत॒ ये त्वा॒रभ्य॒ चरा॑मसि प्रभूवसो ।
न॒हि त्वद॒न्यो गि॑र्वणो॒ गिर॒: सघ॑त् क्षो॒णीरि॑व॒ प्रति॑ नो हर्य॒ तद् वच॑:
॥४॥i̱me ta̍ indra̱ te va̱yaṃ pu̍ruṣṭuta̱ ye tvā̱rabhya̱ carā̍masi prabhūvaso |
na̱hi tvada̱nyo gi̍rvaṇo̱ gira̱: sagha̍t kṣo̱ṇīri̍va̱ prati̍ no harya̱ tad vaca̍:
भूरि॑ त इन्द्र वी॒र्यं १ तव॑ स्मस्य॒स्य स्तो॒तुर्म॑घव॒न् काम॒मा पृ॑ण ।
अनु॑ ते॒ द्यौर्बृ॑ह॒ती वी॒र्यं॑ मम इ॒यं च॑ ते पृथि॒वी ने॑म॒ ओज॑से
॥५॥bhūri̍ ta indra vī̱ryaṃ 1 tava̍ smasya̱sya sto̱turma̍ghava̱n kāma̱mā pṛ̍ṇa |
anu̍ te̱ dyaurbṛ̍ha̱tī vī̱rya̍ṃ mama i̱yaṃ ca̍ te pṛthi̱vī ne̍ma̱ oja̍se
त्वं तमि॑न्द्र॒ पर्व॑तं म॒हामु॒रुं वज्रे॑ण वज्रिन् पर्व॒शश्च॑कर्तिथ ।
अवा॑सृजो॒ निवृ॑ता॒: सर्त॒वा अ॒पः स॒त्रा विश्वं॑ दधिषे॒ केव॑लं॒ सह॑:
॥६॥tvaṃ tami̍ndra̱ parva̍taṃ ma̱hāmu̱ruṃ vajre̍ṇa vajrin parva̱śaśca̍kartitha |
avā̍sṛjo̱ nivṛ̍tā̱: sarta̱vā a̱paḥ sa̱trā viśva̍ṃ dadhiṣe̱ keva̍la̱ṃ saha̍: