अध्ययनम्
- अनुक्रमणिका
- मूलम्
३ परुच्छेपो दैवोदासिः। मित्रावरुणौ।अतिशक्वरी।
सु॒षु॒मा या॑त॒मद्रि॑भि॒र्गोश्री॑ता मत्स॒रा इ॒मे सोमा॑सो मत्स॒रा इ॒मे ।
आ रा॑जाना दिविस्पृशा ऽस्म॒त्रा ग॑न्त॒मुप॑ नः ।
इ॒मे वां॑ मित्रावरुणा॒ गवा॑शिर॒: सोमा॑: शु॒क्रा गवा॑शिरः
॥१॥su̱ṣu̱mā yā̍ta̱madri̍bhi̱rgośrī̍tā matsa̱rā i̱me somā̍so matsa̱rā i̱me |
ā rā̍jānā divispṛśā 'sma̱trā ga̍nta̱mupa̍ naḥ |
i̱me vā̍ṃ mitrāvaruṇā̱ gavā̍śira̱: somā̍: śu̱krā gavā̍śiraḥ
इ॒म आ या॑त॒मिन्द॑व॒: सोमा॑सो॒ दध्या॑शिरः सु॒तासो॒ दध्या॑शिरः ।
उ॒त वा॑मु॒षसो॑ बु॒धि सा॒कं सूर्य॑स्य र॒श्मिभि॑: ।
सु॒तो मि॒त्राय॒ वरु॑णाय पी॒तये॒ चारु॑र्ऋ॒ताय॑ पी॒तये॑
॥२॥i̱ma ā yā̍ta̱minda̍va̱: somā̍so̱ dadhyā̍śiraḥ su̱tāso̱ dadhyā̍śiraḥ |
u̱ta vā̍mu̱ṣaso̍ bu̱dhi sā̱kaṃ sūrya̍sya ra̱śmibhi̍: |
su̱to mi̱trāya̱ varu̍ṇāya pī̱taye̱ cāru̍rṛ̱tāya̍ pī̱taye̍
तां वां॑ धे॒नुं न वा॑स॒रीमं॒शुं दु॑ह॒न्त्यद्रि॑भि॒: सोमं॑ दुह॒न्त्यद्रि॑भिः ।
अ॒स्म॒त्रा ग॑न्त॒मुप॑ नो॒ऽर्वाञ्चा॒ सोम॑पीतये ।
अ॒यं वां॑ मित्रावरुणा॒ नृभि॑: सु॒तः सोम॒ आ पी॒तये॑ सु॒तः
॥३॥tāṃ vā̍ṃ dhe̱nuṃ na vā̍sa̱rīma̱ṃśuṃ du̍ha̱ntyadri̍bhi̱: soma̍ṃ duha̱ntyadri̍bhiḥ |
a̱sma̱trā ga̍nta̱mupa̍ no̱'rvāñcā̱ soma̍pītaye |
a̱yaṃ vā̍ṃ mitrāvaruṇā̱ nṛbhi̍: su̱taḥ soma̱ ā pī̱taye̍ su̱taḥ