अध्ययनम्
- अनुक्रमणिका
- अन्यत्र सङ्ग्रहे
- मूलम्
९ कुसीदी काण्व:। इन्द्र: । गायत्री ।
आ तू न॑ इन्द्र क्षु॒मन्तं॑ चि॒त्रं ग्रा॒भं सं गृ॑भाय । म॒हा॒ह॒स्ती दक्षि॑णेन ॥8.81.1॥
ā tū na̍ indra kṣu̱manta̍ṃ ci̱traṃ grā̱bhaṃ saṃ gṛ̍bhāya | ma̱hā̱ha̱stī dakṣi̍ṇena
वि॒द्मा हि त्वा॑ तुविकू॒र्मिं तु॒विदे॑ष्णं तु॒वीम॑घम् । तु॒वि॒मा॒त्रमवो॑भिः ॥8.81.2॥
vi̱dmā hi tvā̍ tuvikū̱rmiṃ tu̱vide̍ṣṇaṃ tu̱vīma̍gham | tu̱vi̱mā̱tramavo̍bhiḥ
न॒हि त्वा॑ शूर दे॒वा न मर्ता॑सो॒ दित्स॑न्तम् । भी॒मं न गां वा॒रय॑न्ते ॥8.81.3॥
na̱hi tvā̍ śūra de̱vā na martā̍so̱ ditsa̍ntam | bhī̱maṃ na gāṃ vā̱raya̍nte
एतो॒ न्विन्द्रं॒ स्तवा॒मेशा॑नं॒ वस्व॑: स्व॒राज॑म् । न राध॑सा मर्धिषन्नः ॥8.81.4॥
eto̱ nvindra̱ṃ stavā̱meśā̍na̱ṃ vasva̍: sva̱rāja̍m | na rādha̍sā mardhiṣannaḥ
प्र स्तो॑ष॒दुप॑ गासिष॒च्छ्रव॒त्साम॑ गी॒यमा॑नम् । अ॒भि राध॑सा जुगुरत् ॥8.81.5॥
pra sto̍ṣa̱dupa̍ gāsiṣa̱cchrava̱tsāma̍ gī̱yamā̍nam | a̱bhi rādha̍sā jugurat
आ नो॑ भर॒ दक्षि॑णेना॒ऽभि स॒व्येन॒ प्र मृ॑श । इन्द्र॒ मा नो॒ वसो॒र्निर्भा॑क् ॥8.81.6॥
ā no̍ bhara̱ dakṣi̍ṇenā̱'bhi sa̱vyena̱ pra mṛ̍śa | indra̱ mā no̱ vaso̱rnirbhā̍k
उप॑ क्रम॒स्वा भ॑र धृष॒ता धृ॑ष्णो॒ जना॑नाम् । अदा॑शूष्टरस्य॒ वेद॑: ॥8.81.7॥
upa̍ krama̱svā bha̍ra dhṛṣa̱tā dhṛ̍ṣṇo̱ janā̍nām | adā̍śūṣṭarasya̱ veda̍:
इन्द्र॒ य उ॒ नु ते॒ अस्ति॒ वाजो॒ विप्रे॑भि॒: सनि॑त्वः । अ॒स्माभि॒: सु तं स॑नुहि ॥8.81.8॥
indra̱ ya u̱ nu te̱ asti̱ vājo̱ vipre̍bhi̱: sani̍tvaḥ | a̱smābhi̱: su taṃ sa̍nuhi
स॒द्यो॒जुव॑स्ते॒ वाजा॑ अ॒स्मभ्यं॑ वि॒श्वश्च॑न्द्राः । वशै॑श्च म॒क्षू ज॑रन्ते ॥8.81.13॥
sa̱dyo̱juva̍ste̱ vājā̍ a̱smabhya̍ṃ vi̱śvaśca̍ndrāḥ | vaśai̍śca ma̱kṣū ja̍rante
१० वैरूपो नभः प्रभेदनः। इन्द्रः। त्रिष्टुप्।
नि षु सी॑द गणपते ग॒णेषु॒ त्वामा॑हु॒र्विप्र॑तमं कवी॒नाम् ।
न ऋ॒ते त्वत्क्रि॑यते॒ किं च॒नारे म॒हाम॒र्कं म॑घवञ्चि॒त्रम॑र्च ॥10.112.9॥
ni ṣu sī̍da gaṇapate ga̱ṇeṣu̱ tvāmā̍hu̱rvipra̍tamaṃ kavī̱nām |
na ṛ̱te tvatkri̍yate̱ kiṃ ca̱nāre ma̱hāma̱rkaṃ ma̍ghavañci̱trama̍rca
अ॒भि॒ख्या नो॑ मघव॒न्नाध॑माना॒न्त्सखे॑ बो॒धि व॑सुपते॒ सखी॑नाम् ।
रणं॑ कृधि रणकृत्सत्यशु॒ष्माऽभ॑क्ते चि॒दा भ॑जा रा॒ये अ॒स्मान् ॥10.112.10॥
a̱bhi̱khyā no̍ maghava̱nnādha̍mānā̱ntsakhe̍ bo̱dhi va̍supate̱ sakhī̍nām |
raṇa̍ṃ kṛdhi raṇakṛtsatyaśu̱ṣmā'bha̍kte ci̱dā bha̍jā rā̱ye a̱smān
१९ गृत्समद (आङ्गिरसः शौनहोत्रः पश्चाद्) भार्गवः शौनकः। बृहस्पतिः, १, ५, ९, ११, १७, १९, ब्रह्मणस्पतिः। जगती, १५, १९ त्रिष्टुप्।
ग॒णानां॑ त्वा ग॒णप॑तिं हवामहे क॒विं क॑वी॒नामु॑प॒मश्र॑वस्तमम् ।
ज्ये॒ष्ठ॒राजं॒ ब्रह्म॑णां ब्रह्मणस्पत॒ आ न॑: शृ॒ण्वन्नू॒तिभि॑: सीद॒ साद॑नम् ॥2.23.1॥
ga̱ṇānā̍ṃ tvā ga̱ṇapa̍tiṃ havāmahe ka̱viṃ ka̍vī̱nāmu̍pa̱maśra̍vastamam |
jye̱ṣṭha̱rāja̱ṃ brahma̍ṇāṃ brahmaṇaspata̱ ā na̍: śṛ̱ṇvannū̱tibhi̍: sīda̱ sāda̍nam