अध्ययनम्
- अनुक्रमणिका
- मूलम्
९ कण्वो घौरः। रुद्रः, मित्रावरुणौ च, ७-९ सोमः। गायत्री, ९ अनुष्टप्।
कद् रु॒द्राय॒ प्रचे॑तसे मी॒ह्ळुष्ट॑माय॒ तव्य॑से । वो॒चेम॒ शंत॑मं हृ॒दे
॥१॥kad ru̱drāya̱ prace̍tase mī̱hl̤uṣṭa̍māya̱ tavya̍se | vo̱cema̱ śaṃta̍maṃ hṛ̱de
यथा॑ नो॒ अदि॑ति॒: कर॒त् पश्वे॒ नृभ्यो॒ यथा॒ गवे॑ । यथा॑ तो॒काय॑ रु॒द्रिय॑म्
॥२॥yathā̍ no̱ adi̍ti̱: kara̱t paśve̱ nṛbhyo̱ yathā̱ gave̍ | yathā̍ to̱kāya̍ ru̱driya̍m
यथा॑ नो मि॒त्रो वरु॑णो॒ यथा॑ रु॒द्रश्चिके॑तति । यथा॒ विश्वे॑ स॒जोष॑सः
॥३॥yathā̍ no mi̱tro varu̍ṇo̱ yathā̍ ru̱draścike̍tati | yathā̱ viśve̍ sa̱joṣa̍saḥ
गा॒थप॑तिं मे॒धप॑तिं रु॒द्रं जला॑षभेषजम् । तच्छं॒योः सु॒म्नमी॑महे
॥४॥gā̱thapa̍tiṃ me̱dhapa̍tiṃ ru̱draṃ jalā̍ṣabheṣajam | taccha̱ṃyoḥ su̱mnamī̍mahe
यः शु॒क्र इ॑व॒ सूर्यो॒ हिर॑ण्यमिव॒ रोच॑ते । श्रेष्ठो॑ दे॒वानां॒ वसु॑:
॥५॥yaḥ śu̱kra i̍va̱ sūryo̱ hira̍ṇyamiva̱ roca̍te | śreṣṭho̍ de̱vānā̱ṃ vasu̍:
शं न॑: कर॒त्यर्व॑ते सु॒गं मे॒षाय॑ मे॒ष्ये॑ । नृभ्यो॒ नारि॑भ्यो॒ गवे॑
॥६॥śaṃ na̍: kara̱tyarva̍te su̱gaṃ me̱ṣāya̍ me̱ṣye̍ | nṛbhyo̱ nāri̍bhyo̱ gave̍
अ॒स्मे सो॑म॒ श्रिय॒मधि॒ नि धे॑हि श॒तस्य॑ नृ॒णाम् । महि॒ श्रव॑स्तुविनृ॒म्णम्
॥७॥a̱sme so̍ma̱ śriya̱madhi̱ ni dhe̍hi śa̱tasya̍ nṛ̱ṇām | mahi̱ śrava̍stuvinṛ̱mṇam
मा न॑: सोमपरि॒बाधो॒ मारा॑तयो जुहुरन्त । आ न॑ इन्दो॒ वाजे॑ भज
॥८॥mā na̍: somapari̱bādho̱ mārā̍tayo juhuranta | ā na̍ indo̱ vāje̍ bhaja
यास्ते॑ प्र॒जा अ॒मृत॑स्य॒ पर॑स्मि॒न्धाम॑न्नृ॒तस्य॑ ।
मू॒र्धा नाभा॑ सोम वेन आ॒भूष॑न्तीः सोम वेदः
॥९॥yāste̍ pra̱jā a̱mṛta̍sya̱ para̍smi̱ndhāma̍nnṛ̱tasya̍ |
mū̱rdhā nābhā̍ soma vena ā̱bhūṣa̍ntīḥ soma vedaḥ