अध्ययनम्
- अनुक्रमणिका
- मूलम्
११ अगस्त्यो मैत्रावरुणिः । अन्नं। १अनुष्टुब्गर्भा उष्णिक्, ३, ५-७, ११ अनुष्टुप्,११ बृहती वा, २, ४, ८-१० गायत्री।
पि॒तुं नु स्तो॑षं म॒हो ध॒र्माणं॒ तवि॑षीम् । यस्य॑ त्रि॒तो व्योज॑सा वृ॒त्रं विप॑र्वम॒र्दय॑त्
॥१॥pi̱tuṃ nu sto̍ṣaṃ ma̱ho dha̱rmāṇa̱ṃ tavi̍ṣīm | yasya̍ tri̱to vyoja̍sā vṛ̱traṃ vipa̍rvama̱rdaya̍t
स्वादो॑ पितो॒ मधो॑ पितो व॒यं त्वा॑ ववृमहे । अ॒स्माक॑मवि॒ता भ॑व
॥२॥svādo̍ pito̱ madho̍ pito va̱yaṃ tvā̍ vavṛmahe | a̱smāka̍mavi̱tā bha̍va
उप॑ नः पित॒वा च॑र शि॒वः शि॒वाभि॑रू॒तिभि॑: । म॒यो॒भुर॑द्विषे॒ण्यः सखा॑ सु॒शेवो॒ अद्व॑याः
॥३॥upa̍ naḥ pita̱vā ca̍ra śi̱vaḥ śi̱vābhi̍rū̱tibhi̍: | ma̱yo̱bhura̍dviṣe̱ṇyaḥ sakhā̍ su̱śevo̱ adva̍yāḥ
तव॒ त्ये पि॑तो॒ रसा॒ रजां॒स्यनु॒ विष्ठि॑ताः । दि॒वि वाता॑ इव श्रि॒ताः
॥४॥tava̱ tye pi̍to̱ rasā̱ rajā̱ṃsyanu̱ viṣṭhi̍tāḥ | di̱vi vātā̍ iva śri̱tāḥ
तव॒ त्ये पि॑तो॒ दद॑त॒स्तव॑ स्वादिष्ठ॒ ते पि॑तो । प्र स्वा॒द्मानो॒ रसा॑नां तुवि॒ग्रीवा॑ इवेरते
॥५॥tava̱ tye pi̍to̱ dada̍ta̱stava̍ svādiṣṭha̱ te pi̍to | pra svā̱dmāno̱ rasā̍nāṃ tuvi̱grīvā̍ iverate
त्वे पि॑तो म॒हानां॑ दे॒वानां॒ मनो॑ हि॒तम् । अका॑रि॒ चारु॑ के॒तुना॒ तवाहि॒मव॑सावधीत्
॥६॥tve pi̍to ma̱hānā̍ṃ de̱vānā̱ṃ mano̍ hi̱tam | akā̍ri̱ cāru̍ ke̱tunā̱ tavāhi̱mava̍sāvadhīt
यद॒दो पि॑तो॒ अज॑गन्वि॒वस्व॒ पर्व॑तानाम् । अत्रा॑ चिन्नो मधो पि॒तो ऽरं॑ भ॒क्षाय॑ गम्याः
॥७॥yada̱do pi̍to̱ aja̍ganvi̱vasva̱ parva̍tānām | atrā̍ cinno madho pi̱to 'ra̍ṃ bha̱kṣāya̍ gamyāḥ
यद॒पामोष॑धीनां परिं॒शमा॑रि॒शाम॑हे । वाता॑पे॒ पीव॒ इद् भ॑व
॥८॥yada̱pāmoṣa̍dhīnāṃ pari̱ṃśamā̍ri̱śāma̍he | vātā̍pe̱ pīva̱ id bha̍va
यत् ते॑ सोम॒ गवा॑शिरो॒ यवा॑शिरो॒ भजा॑महे । वाता॑पे॒ पीव॒ इद् भ॑व
॥९॥yat te̍ soma̱ gavā̍śiro̱ yavā̍śiro̱ bhajā̍mahe | vātā̍pe̱ pīva̱ id bha̍va
क॒र॒म्भ ओ॑षधे भव॒ पीवो॑ वृ॒क्क उ॑दार॒थिः । वाता॑पे॒ पीव॒ इद् भ॑व
॥१०॥ka̱ra̱mbha o̍ṣadhe bhava̱ pīvo̍ vṛ̱kka u̍dāra̱thiḥ | vātā̍pe̱ pīva̱ id bha̍va
तं त्वा॑ व॒यं पि॑तो॒ वचो॑भि॒र्गावो॒ न ह॒व्या सु॑षूदिम ।
दे॒वेभ्य॑स्त्वा सध॒माद॑म॒स्मभ्यं॑ त्वा सध॒माद॑म्
॥११॥taṃ tvā̍ va̱yaṃ pi̍to̱ vaco̍bhi̱rgāvo̱ na ha̱vyā su̍ṣūdima |
de̱vebhya̍stvā sadha̱māda̍ma̱smabhya̍ṃ tvā sadha̱māda̍m