अध्ययनम्
- अनुक्रमणिका
- मूलम्
५ नैऋर्तः कपोतः।विश्वेदेवाः। त्रिष्टुप्।
देवा॑: क॒पोत॑ इषि॒तो यदि॒च्छन्दू॒तो निॠ॑त्या इ॒दमा॑ज॒गाम॑ ।
तस्मा॑ अर्चाम कृ॒णवा॑म॒ निष्कृ॑तिं॒ शं नो॑ अस्तु द्वि॒पदे॒ शं चतु॑ष्पदे
॥१॥devā̍: ka̱pota̍ iṣi̱to yadi̱cchandū̱to niṝ̍tyā i̱damā̍ja̱gāma̍ |
tasmā̍ arcāma kṛ̱ṇavā̍ma̱ niṣkṛ̍ti̱ṃ śaṃ no̍ astu dvi̱pade̱ śaṃ catu̍ṣpade
शि॒वः क॒पोत॑ इषि॒तो नो॑ अस्त्वना॒गा दे॑वाः शकु॒नो गृ॒हेषु॑ ।
अ॒ग्निर्हि विप्रो॑ जु॒षतां॑ ह॒विर्न॒: परि॑ हे॒तिः प॒क्षिणी॑ नो वृणक्तु
॥२॥śi̱vaḥ ka̱pota̍ iṣi̱to no̍ astvanā̱gā de̍vāḥ śaku̱no gṛ̱heṣu̍ |
a̱gnirhi vipro̍ ju̱ṣatā̍ṃ ha̱virna̱: pari̍ he̱tiḥ pa̱kṣiṇī̍ no vṛṇaktu
हे॒तिः प॒क्षिणी॒ न द॑भात्य॒स्माना॒ष्ट्र्यां प॒दं कृ॑णुते अग्नि॒धाने॑ ।
शं नो॒ गोभ्य॑श्च॒ पुरु॑षेभ्यश्चास्तु॒ मा नो॑ हिंसीदि॒ह दे॑वाः क॒पोत॑:
॥३॥he̱tiḥ pa̱kṣiṇī̱ na da̍bhātya̱smānā̱ṣṭryāṃ pa̱daṃ kṛ̍ṇute agni̱dhāne̍ |
śaṃ no̱ gobhya̍śca̱ puru̍ṣebhyaścāstu̱ mā no̍ hiṃsīdi̱ha de̍vāḥ ka̱pota̍:
यदुलू॑को॒ वद॑ति मो॒घमे॒तद्यत्क॒पोत॑: प॒दम॒ग्नौ कृ॒णोति॑ ।
यस्य॑ दू॒तः प्रहि॑त ए॒ष ए॒तत्तस्मै॑ य॒माय॒ नमो॑ अस्तु मृ॒त्यवे॑
॥४॥yadulū̍ko̱ vada̍ti mo̱ghame̱tadyatka̱pota̍: pa̱dama̱gnau kṛ̱ṇoti̍ |
yasya̍ dū̱taḥ prahi̍ta e̱ṣa e̱tattasmai̍ ya̱māya̱ namo̍ astu mṛ̱tyave̍
ऋ॒चा क॒पोतं॑ नुदत प्र॒णोद॒मिषं॒ मद॑न्त॒: परि॒ गां न॑यध्वम् ।
सं॒यो॒पय॑न्तो दुरि॒तानि॒ विश्वा॑ हि॒त्वा न॒ ऊर्जं॒ प्र प॑ता॒त्पति॑ष्ठः
॥५॥ṛ̱cā ka̱pota̍ṃ nudata pra̱ṇoda̱miṣa̱ṃ mada̍nta̱: pari̱ gāṃ na̍yadhvam |
sa̱ṃyo̱paya̍nto duri̱tāni̱ viśvā̍ hi̱tvā na̱ ūrja̱ṃ pra pa̍tā̱tpati̍ṣṭhaḥ