अध्ययनम्
- अनुक्रमणिका
- मूलम्
८ शार्गां: १-२ जरिता, ३-४ द्रोणः, ५-६ सारिसृक्व:, ७-८ स्तम्बमित्रः। अग्निः। त्रिष्टुप् , १-२ जगती, ७-८ अनुष्टुप्।
अ॒यम॑ग्ने जरि॒ता त्वे अ॑भू॒दपि॒ सह॑सः सूनो न॒ह्य१न्यदस्त्याप्य॑म् ।
भ॒द्रं हि शर्म॑ त्रि॒वरू॑थ॒मस्ति॑ त आ॒रे हिंसा॑ना॒मप॑ दि॒द्युमा कृ॑धि
॥१॥a̱yama̍gne jari̱tā tve a̍bhū̱dapi̱ saha̍saḥ sūno na̱hya1nyadastyāpya̍m |
bha̱draṃ hi śarma̍ tri̱varū̍tha̱masti̍ ta ā̱re hiṃsā̍nā̱mapa̍ di̱dyumā kṛ̍dhi
प्र॒वत्ते॑ अग्ने॒ जनि॑मा पितूय॒तः सा॒चीव॒ विश्वा॒ भुव॑ना॒ न्यृ॑ञ्जसे ।
प्र सप्त॑य॒: प्र स॑निषन्त नो॒ धिय॑: पु॒रश्च॑रन्ति पशु॒पा इ॑व॒ त्मना॑
॥२॥pra̱vatte̍ agne̱ jani̍mā pitūya̱taḥ sā̱cīva̱ viśvā̱ bhuva̍nā̱ nyṛ̍ñjase |
pra sapta̍ya̱: pra sa̍niṣanta no̱ dhiya̍: pu̱raśca̍ranti paśu̱pā i̍va̱ tmanā̍
उ॒त वा उ॒ परि॑ वृणक्षि॒ बप्स॑द्ब॒होर॑ग्न॒ उल॑पस्य स्वधावः ।
उ॒त खि॒ल्या उ॒र्वरा॑णां भवन्ति॒ मा ते॑ हे॒तिं तवि॑षीं चुक्रुधाम
॥३॥u̱ta vā u̱ pari̍ vṛṇakṣi̱ bapsa̍dba̱hora̍gna̱ ula̍pasya svadhāvaḥ |
u̱ta khi̱lyā u̱rvarā̍ṇāṃ bhavanti̱ mā te̍ he̱tiṃ tavi̍ṣīṃ cukrudhāma
यदु॒द्वतो॑ नि॒वतो॒ यासि॒ बप्स॒त्पृथ॑गेषि प्रग॒र्धिनी॑व॒ सेना॑ ।
य॒दा ते॒ वातो॑ अनु॒वाति॑ शो॒चिर्वप्ते॑व॒ श्मश्रु॑ वपसि॒ प्र भूम॑
॥४॥yadu̱dvato̍ ni̱vato̱ yāsi̱ bapsa̱tpṛtha̍geṣi praga̱rdhinī̍va̱ senā̍ |
ya̱dā te̱ vāto̍ anu̱vāti̍ śo̱cirvapte̍va̱ śmaśru̍ vapasi̱ pra bhūma̍
प्रत्य॑स्य॒ श्रेण॑यो ददृश्र॒ एकं॑ नि॒यानं॑ ब॒हवो॒ रथा॑सः ।
बा॒हू यद॑ग्ने अनु॒मर्मृ॑जानो॒ न्य॑ङ्ङुत्ता॒नाम॒न्वेषि॒ भूमि॑म्
॥५॥pratya̍sya̱ śreṇa̍yo dadṛśra̱ eka̍ṃ ni̱yāna̍ṃ ba̱havo̱ rathā̍saḥ |
bā̱hū yada̍gne anu̱marmṛ̍jāno̱ nya̍ṅṅuttā̱nāma̱nveṣi̱ bhūmi̍m
उत्ते॒ शुष्मा॑ जिहता॒मुत्ते॑ अ॒र्चिरुत्ते॑ अग्ने शशमा॒नस्य॒ वाजा॑: ।
उच्छ्व॑ञ्चस्व॒ नि न॑म॒ वर्ध॑मान॒ आ त्वा॒द्य विश्वे॒ वस॑वः सदन्तु
॥६॥utte̱ śuṣmā̍ jihatā̱mutte̍ a̱rcirutte̍ agne śaśamā̱nasya̱ vājā̍: |
ucchva̍ñcasva̱ ni na̍ma̱ vardha̍māna̱ ā tvā̱dya viśve̱ vasa̍vaḥ sadantu
अ॒पामि॒दं न्यय॑नं समु॒द्रस्य॑ नि॒वेश॑नम् । अ॒न्यं कृ॑णुष्वे॒तः पन्थां॒ तेन॑ याहि॒ वशाँ॒ अनु॑
॥७॥a̱pāmi̱daṃ nyaya̍naṃ samu̱drasya̍ ni̱veśa̍nam | a̱nyaṃ kṛ̍ṇuṣve̱taḥ panthā̱ṃ tena̍ yāhi̱ vaśā̱m̐ anu̍
आय॑ने ते प॒राय॑णे॒ दूर्वा॑ रोहन्तु पु॒ष्पिणी॑: । ह्र॒दाश्च॑ पु॒ण्डरी॑काणि समु॒द्रस्य॑ गृ॒हा इ॒मे
॥८॥āya̍ne te pa̱rāya̍ṇe̱ dūrvā̍ rohantu pu̱ṣpiṇī̍: | hra̱dāśca̍ pu̱ṇḍarī̍kāṇi samu̱drasya̍ gṛ̱hā i̱me