अध्ययनम्
- अनुक्रमणिका
- मूलम्
१२ बन्धु: श्रुतबन्धुर्विप्रबन्धुर्गौपायनाः,६ अगस्त्यस्वसा एषां माता ऋषिका। १-४,६ असमातिः, ५ इन्द्रः,७-११ जीवः,१२ हस्तः।अनुष्टुप्,१-५ गायत्री, ८-९ पंक्तिः।
आ जनं॑ त्वे॒षसं॑दृशं॒ माही॑नाना॒मुप॑स्तुतम् । अग॑न्म॒ बिभ्र॑तो॒ नम॑:
॥१॥ā jana̍ṃ tve̱ṣasa̍ṃdṛśa̱ṃ māhī̍nānā̱mupa̍stutam | aga̍nma̱ bibhra̍to̱ nama̍:
अस॑मातिं नि॒तोश॑नं त्वे॒षं नि॑य॒यिनं॒ रथ॑म् । भ॒जेर॑थस्य॒ सत्प॑तिम्
॥२॥asa̍mātiṃ ni̱tośa̍naṃ tve̱ṣaṃ ni̍ya̱yina̱ṃ ratha̍m | bha̱jera̍thasya̱ satpa̍tim
यो जना॑न्महि॒षाँ इ॑वाऽतित॒स्थौ पवी॑रवान् । उ॒ताप॑वीरवान्यु॒धा
॥३॥yo janā̍nmahi̱ṣām̐ i̍vā'tita̱sthau pavī̍ravān | u̱tāpa̍vīravānyu̱dhā
यस्ये॑क्ष्वा॒कुरुप॑ व्र॒ते रे॒वान्म॑रा॒य्येध॑ते । दि॒वी॑व॒ पञ्च॑ कृ॒ष्टय॑:
॥४॥yasye̍kṣvā̱kurupa̍ vra̱te re̱vānma̍rā̱yyedha̍te | di̱vī̍va̱ pañca̍ kṛ̱ṣṭaya̍:
इन्द्र॑ क्ष॒त्रास॑मातिषु॒ रथ॑प्रोष्ठेषु धारय । दि॒वी॑व॒ सूर्यं॑ दृ॒शे
॥५॥indra̍ kṣa̱trāsa̍mātiṣu̱ ratha̍proṣṭheṣu dhāraya | di̱vī̍va̱ sūrya̍ṃ dṛ̱śe
अ॒गस्त्य॑स्य॒ नद्भ्य॒: सप्ती॑ युनक्षि॒ रोहि॑ता । प॒णीन्न्य॑क्रमीर॒भि विश्वा॑न्राजन्नरा॒धस॑:
॥६॥a̱gastya̍sya̱ nadbhya̱: saptī̍ yunakṣi̱ rohi̍tā | pa̱ṇīnnya̍kramīra̱bhi viśvā̍nrājannarā̱dhasa̍:
अ॒यं मा॒तायं पि॒ताऽयं जी॒वातु॒राग॑मत् । इ॒दं तव॑ प्र॒सर्प॑णं॒ सुब॑न्ध॒वेहि॒ निरि॑हि
॥७॥a̱yaṃ mā̱tāyaṃ pi̱tā'yaṃ jī̱vātu̱rāga̍mat | i̱daṃ tava̍ pra̱sarpa̍ṇa̱ṃ suba̍ndha̱vehi̱ niri̍hi
यथा॑ यु॒गं व॑र॒त्रया॒ नह्य॑न्ति ध॒रुणा॑य॒ कम् । ए॒वा दा॑धार ते॒ मनो॑ जी॒वात॑वे॒ न मृ॒त्यवेऽथो॑ अरि॒ष्टता॑तये
॥८॥yathā̍ yu̱gaṃ va̍ra̱trayā̱ nahya̍nti dha̱ruṇā̍ya̱ kam | e̱vā dā̍dhāra te̱ mano̍ jī̱vāta̍ve̱ na mṛ̱tyave'tho̍ ari̱ṣṭatā̍taye
यथे॒यं पृ॑थि॒वी म॒ही दा॒धारे॒मान्वन॒स्पती॑न् । ए॒वा दा॑धार ते॒ मनो॑ जी॒वात॑वे॒ न मृ॒त्यवेऽथो॑ अरि॒ष्टता॑तये
॥९॥yathe̱yaṃ pṛ̍thi̱vī ma̱hī dā̱dhāre̱mānvana̱spatī̍n | e̱vā dā̍dhāra te̱ mano̍ jī̱vāta̍ve̱ na mṛ̱tyave'tho̍ ari̱ṣṭatā̍taye
य॒माद॒हं वै॑वस्व॒तात्सु॒बन्धो॒र्मन॒ आभ॑रम् । जी॒वात॑वे॒ न मृ॒त्यवेऽथो॑ अरि॒ष्टता॑तये
॥१०॥ya̱māda̱haṃ vai̍vasva̱tātsu̱bandho̱rmana̱ ābha̍ram | jī̱vāta̍ve̱ na mṛ̱tyave'tho̍ ari̱ṣṭatā̍taye
न्य१ग्वातोऽव॑ वाति॒ न्य॑क्तपति॒ सूर्य॑: । नी॒चीन॑म॒घ्न्या दु॑हे॒ न्य॑ग्भवतु ते॒ रप॑:
॥११॥nya1gvāto'va̍ vāti̱ nya̍ktapati̱ sūrya̍: | nī̱cīna̍ma̱ghnyā du̍he̱ nya̍gbhavatu te̱ rapa̍:
अ॒यं मे॒ हस्तो॒ भग॑वान॒यं मे॒ भग॑वत्तरः । अ॒यं मे॑ वि॒श्वभे॑षजो॒ऽयं शि॒वाभि॑मर्शनः
॥१२॥a̱yaṃ me̱ hasto̱ bhaga̍vāna̱yaṃ me̱ bhaga̍vattaraḥ | a̱yaṃ me̍ vi̱śvabhe̍ṣajo̱'yaṃ śi̱vābhi̍marśanaḥ