अध्ययनम्
- अनुक्रमणिका
- मूलम्
४ शबरः काक्षीवतः।गावः। त्रिष्टुप्।
म॒यो॒भूर्वातो॑ अ॒भि वा॑तू॒स्रा ऊर्ज॑स्वती॒रोष॑धी॒रा रि॑शन्ताम् ।
पीव॑स्वतीर्जी॒वध॑न्याः पिबन्त्वव॒साय॑ प॒द्वते॑ रुद्र मृळ
॥१॥ma̱yo̱bhūrvāto̍ a̱bhi vā̍tū̱srā ūrja̍svatī̱roṣa̍dhī̱rā ri̍śantām |
pīva̍svatīrjī̱vadha̍nyāḥ pibantvava̱sāya̍ pa̱dvate̍ rudra mṛl̤a
याः सरू॑पा॒ विरू॑पा॒ एक॑रूपा॒ यासा॑म॒ग्निरिष्ट्या॒ नामा॑नि॒ वेद॑ ।
या अङ्गि॑रस॒स्तप॑से॒ह च॒क्रुस्ताभ्य॑: पर्जन्य॒ महि॒ शर्म॑ यच्छ
॥२॥yāḥ sarū̍pā̱ virū̍pā̱ eka̍rūpā̱ yāsā̍ma̱gniriṣṭyā̱ nāmā̍ni̱ veda̍ |
yā aṅgi̍rasa̱stapa̍se̱ha ca̱krustābhya̍: parjanya̱ mahi̱ śarma̍ yaccha
या दे॒वेषु॑ त॒न्व१मैर॑यन्त॒ यासां॒ सोमो॒ विश्वा॑ रू॒पाणि॒ वेद॑ ।
ता अ॒स्मभ्यं॒ पय॑सा॒ पिन्व॑मानाः प्र॒जाव॑तीरिन्द्र गो॒ष्ठे रि॑रीहि
॥३॥yā de̱veṣu̍ ta̱nva1maira̍yanta̱ yāsā̱ṃ somo̱ viśvā̍ rū̱pāṇi̱ veda̍ |
tā a̱smabhya̱ṃ paya̍sā̱ pinva̍mānāḥ pra̱jāva̍tīrindra go̱ṣṭhe ri̍rīhi
प्र॒जाप॑ति॒र्मह्य॑मे॒ता ररा॑णो॒ विश्वै॑र्दे॒वैः पि॒तृभि॑: संविदा॒नः ।
शि॒वाः स॒तीरुप॑ नो गो॒ष्ठमाक॒स्तासां॑ व॒यं प्र॒जया॒ सं स॑देम
॥४॥pra̱jāpa̍ti̱rmahya̍me̱tā rarā̍ṇo̱ viśvai̍rde̱vaiḥ pi̱tṛbhi̍: saṃvidā̱naḥ |
śi̱vāḥ sa̱tīrupa̍ no go̱ṣṭhamāka̱stāsā̍ṃ va̱yaṃ pra̱jayā̱ saṃ sa̍dema