Study
- Anukramaṇī
- Source
12 pragātha: kāṇva:| indra: | gāyatrī |
uttvā̍ mandantu̱ stomā̍: kṛṇu̱ṣva rādho̍ adrivaḥ | ava̍ brahma̱dviṣo̍ jahi
||1||उत्त्वा॑ मन्दन्तु॒ स्तोमा॑: कृणु॒ष्व राधो॑ अद्रिवः । अव॑ ब्रह्म॒द्विषो॑ जहि
pa̱dā pa̱ṇīm̐ra̍rā̱dhaso̱ ni bā̍dhasva ma̱hām̐ a̍si | na̱hi tvā̱ kaśca̱na prati̍
||2||प॒दा प॒णीँर॑रा॒धसो॒ नि बा॑धस्व म॒हाँ अ॑सि । न॒हि त्वा॒ कश्च॒न प्रति॑
tvamī̍śiṣe su̱tānā̱mindra̱ tvamasu̍tānām | tvaṃ rājā̱ janā̍nām
||3||त्वमी॑शिषे सु॒ताना॒मिन्द्र॒ त्वमसु॑तानाम् । त्वं राजा॒ जना॑नाम्
ehi̱ prehi̱ kṣayo̍ di̱vyā̱3ghoṣa̍ñcarṣaṇī̱nām | obhe pṛ̍ṇāsi̱ roda̍sī
||4||एहि॒ प्रेहि॒ क्षयो॑ दि॒व्या॒३घोष॑ञ्चर्षणी॒नाम् । ओभे पृ॑णासि॒ रोद॑सी
tyaṃ ci̱tparva̍taṃ gi̱riṃ śa̱tava̍ntaṃ saha̱sriṇa̍m | vi sto̱tṛbhyo̍ rurojitha
||5||त्यं चि॒त्पर्व॑तं गि॒रिं श॒तव॑न्तं सह॒स्रिण॑म् । वि स्तो॒तृभ्यो॑ रुरोजिथ
va̱yamu̍ tvā̱ divā̍ su̱te va̱yaṃ nakta̍ṃ havāmahe | a̱smāka̱ṃ kāma̱mā pṛ̍ṇa
||6||व॒यमु॑ त्वा॒ दिवा॑ सु॒ते व॒यं नक्तं॑ हवामहे । अ॒स्माकं॒ काम॒मा पृ॑ण
kva1 sya vṛ̍ṣa̱bho yuvā̍ tuvi̱grīvo̱ anā̍nataḥ | bra̱hmā kastaṃ sa̍paryati
||7||क्व१ स्य वृ॑ष॒भो युवा॑ तुवि॒ग्रीवो॒ अना॑नतः । ब्र॒ह्मा कस्तं स॑पर्यति
kasya̍ svi̱tsava̍na̱ṃ vṛṣā̍ juju̱ṣvām̐ ava̍ gacchati | indra̱ṃ ka u̍ svi̱dā ca̍ke
||8||कस्य॑ स्वि॒त्सव॑नं॒ वृषा॑ जुजु॒ष्वाँ अव॑ गच्छति । इन्द्रं॒ क उ॑ स्वि॒दा च॑के
kaṃ te̍ dā̱nā a̍sakṣata̱ vṛtra̍ha̱nkaṃ su̱vīryā̍ | u̱kthe ka u̍ svi̱danta̍maḥ
||9||कं ते॑ दा॒ना अ॑सक्षत॒ वृत्र॑ह॒न्कं सु॒वीर्या॑ । उ॒क्थे क उ॑ स्वि॒दन्त॑मः
a̱yaṃ te̱ mānu̍ṣe̱ jane̱ soma̍: pū̱ruṣu̍ sūyate | tasyehi̱ pra dra̍vā̱ piba̍
||10||अ॒यं ते॒ मानु॑षे॒ जने॒ सोम॑: पू॒रुषु॑ सूयते । तस्येहि॒ प्र द्र॑वा॒ पिब॑
a̱yaṃ te̍ śarya̱ṇāva̍ti su̱ṣomā̍yā̱madhi̍ pri̱yaḥ | ā̱rjī̱kīye̍ ma̱dinta̍maḥ
||11||अ॒यं ते॑ शर्य॒णाव॑ति सु॒षोमा॑या॒मधि॑ प्रि॒यः । आ॒र्जी॒कीये॑ म॒दिन्त॑मः
tama̱dya rādha̍se ma̱he cāru̱ṃ madā̍ya̱ ghṛṣva̍ye | ehī̍mindra̱ dravā̱ piba̍
||12||तम॒द्य राध॑से म॒हे चारुं॒ मदा॑य॒ घृष्व॑ये । एही॑मिन्द्र॒ द्रवा॒ पिब॑