Study
- Anukramaṇī
- Source
(12) 1-3, 6-12 nemo bhārgava:, 4-5 indra: | indra:, 8 suparṇa:, 9 vajro vā, 10-11 vāk | triṣṭup , 6 jagatī , 7-9 anuṣṭup |
a̱yaṃ ta̍ emi ta̱nvā̍ pu̱rastā̱dviśve̍ de̱vā a̱bhi mā̍ yanti pa̱ścāt |
ya̱dā mahya̱ṃ dīdha̍ro bhā̱gami̱ndrā''dinmayā̍ kṛṇavo vī̱ryā̍ṇi
||1||अ॒यं त॑ एमि त॒न्वा॑ पु॒रस्ता॒द्विश्वे॑ दे॒वा अ॒भि मा॑ यन्ति प॒श्चात् ।
य॒दा मह्यं॒ दीध॑रो भा॒गमि॒न्द्राऽऽदिन्मया॑ कृणवो वी॒र्या॑णि
dadhā̍mi te̱ madhu̍no bha̱kṣamagre̍ hi̱taste̍ bhā̱gaḥ su̱to a̍stu̱ soma̍: |
asa̍śca̱ tvaṃ da̍kṣiṇa̱taḥ sakhā̱ me'dhā̍ vṛ̱trāṇi̍ jaṅghanāva̱ bhūri̍
||2||दधा॑मि ते॒ मधु॑नो भ॒क्षमग्रे॑ हि॒तस्ते॑ भा॒गः सु॒तो अ॑स्तु॒ सोम॑: ।
अस॑श्च॒ त्वं द॑क्षिण॒तः सखा॒ मेऽधा॑ वृ॒त्राणि॑ जङ्घनाव॒ भूरि॑
pra su stoma̍ṃ bharata vāja̱yanta̱ indrā̍ya sa̱tyaṃ yadi̍ sa̱tyamasti̍ |
nendro̍ a̱stīti̱ nema̍ u tva āha̱ ka ī̍ṃ dadarśa̱ kama̱bhi ṣṭa̍vāma
||3||प्र सु स्तोमं॑ भरत वाज॒यन्त॒ इन्द्रा॑य स॒त्यं यदि॑ स॒त्यमस्ति॑ ।
नेन्द्रो॑ अ॒स्तीति॒ नेम॑ उ त्व आह॒ क ईं॑ ददर्श॒ कम॒भि ष्ट॑वाम
a̱yama̍smi jarita̱: paśya̍ me̱ha viśvā̍ jā̱tānya̱bhya̍smi ma̱hnā |
ṛ̱tasya̍ mā pra̱diśo̍ vardhayantyādardi̱ro bhuva̍nā dardarīmi
||4||अ॒यम॑स्मि जरित॒: पश्य॑ मे॒ह विश्वा॑ जा॒तान्य॒भ्य॑स्मि म॒ह्ना ।
ऋ॒तस्य॑ मा प्र॒दिशो॑ वर्धयन्त्यादर्दि॒रो भुव॑ना दर्दरीमि
ā yanmā̍ ve̱nā aru̍hannṛ̱tasya̱m̐ eka̱māsī̍naṃ harya̱tasya̍ pṛ̱ṣṭhe |
mana̍ścinme hṛ̱da ā pratya̍voca̱daci̍krada̱ñchiśu̍manta̱: sakhā̍yaḥ
||5||आ यन्मा॑ वे॒ना अरु॑हन्नृ॒तस्यँ॒ एक॒मासी॑नं हर्य॒तस्य॑ पृ॒ष्ठे ।
मन॑श्चिन्मे हृ॒द आ प्रत्य॑वोच॒दचि॑क्रद॒ञ्छिशु॑मन्त॒: सखा॑यः
viśvettā te̱ sava̍neṣu pra̱vācyā̱ yā ca̱kartha̍ maghavannindra sunva̱te |
pārā̍vata̱ṃ yatpu̍rusambhṛ̱taṃ vasva̱pāvṛ̍ṇoḥ śara̱bhāya̱ ṛṣi̍bandhave
||6||विश्वेत्ता ते॒ सव॑नेषु प्र॒वाच्या॒ या च॒कर्थ॑ मघवन्निन्द्र सुन्व॒ते ।
पारा॑वतं॒ यत्पु॑रुसम्भृ॒तं वस्व॒पावृ॑णोः शर॒भाय॒ ऋषि॑बन्धवे
pra nū̱naṃ dhā̍vatā̱ pṛtha̱ṅneha yo vo̱ avā̍varīt | ni ṣī̍ṃ vṛ̱trasya̱ marma̍ṇi̱ vajra̱mindro̍ apīpatat
||7||प्र नू॒नं धा॑वता॒ पृथ॒ङ्नेह यो वो॒ अवा॑वरीत् । नि षीं॑ वृ॒त्रस्य॒ मर्म॑णि॒ वज्र॒मिन्द्रो॑ अपीपतत्
mano̍javā̱ aya̍māna āya̱sīma̍tara̱tpura̍m | diva̍ṃ supa̱rṇo ga̱tvāya̱ soma̍ṃ va̱jriṇa̱ ābha̍rat
||8||मनो॑जवा॒ अय॑मान आय॒सीम॑तर॒त्पुर॑म् । दिवं॑ सुप॒र्णो ग॒त्वाय॒ सोमं॑ व॒ज्रिण॒ आभ॑रत्
sa̱mu̱dre a̱ntaḥ śa̍yata u̱dnā vajro̍ a̱bhīvṛ̍taḥ | bhara̍ntyasmai sa̱ṃyata̍: pu̱raḥpra̍sravaṇā ba̱lim
||9||स॒मु॒द्रे अ॒न्तः श॑यत उ॒द्ना वज्रो॑ अ॒भीवृ॑तः । भर॑न्त्यस्मै सं॒यत॑: पु॒रःप्र॑स्रवणा ब॒लिम्
yadvāgvada̍ntyaviceta̱nāni̱ rāṣṭrī̍ de̱vānā̍ṃ niṣa̱sāda̍ ma̱ndrā |
cata̍sra̱ ūrja̍ṃ duduhe̱ payā̍ṃsi̱ kva̍ svidasyāḥ para̱maṃ ja̍gāma
||10||यद्वाग्वद॑न्त्यविचेत॒नानि॒ राष्ट्री॑ दे॒वानां॑ निष॒साद॑ म॒न्द्रा ।
चत॑स्र॒ ऊर्जं॑ दुदुहे॒ पयां॑सि॒ क्व॑ स्विदस्याः पर॒मं ज॑गाम
de̱vīṃ vāca̍majanayanta de̱vāstāṃ vi̱śvarū̍pāḥ pa̱śavo̍ vadanti |
sā no̍ ma̱ndreṣa̱mūrja̱ṃ duhā̍nā dhe̱nurvāga̱smānupa̱ suṣṭu̱taitu̍
||11||दे॒वीं वाच॑मजनयन्त दे॒वास्तां वि॒श्वरू॑पाः प॒शवो॑ वदन्ति ।
सा नो॑ म॒न्द्रेष॒मूर्जं॒ दुहा॑ना धे॒नुर्वाग॒स्मानुप॒ सुष्टु॒तैतु॑
sakhe̍ viṣṇo vita̱raṃ vi kra̍masva̱ dyaurde̱hi lo̱kaṃ vajrā̍ya vi̱ṣkabhe̍ |
hanā̍va vṛ̱traṃ ri̱ṇacā̍va̱ sindhū̱nindra̍sya yantu prasa̱ve visṛ̍ṣṭāḥ
||12||सखे॑ विष्णो वित॒रं वि क्र॑मस्व॒ द्यौर्दे॒हि लो॒कं वज्रा॑य वि॒ष्कभे॑ ।
हना॑व वृ॒त्रं रि॒णचा॑व॒ सिन्धू॒निन्द्र॑स्य यन्तु प्रस॒वे विसृ॑ष्टाः