Study
- Anukramaṇī
- Source
25 viśvamanā vaiyaśva:,vyaśvo vāṃgirasa: |aśvinau, 20-25 vāyu: |uṣṇik; 16-19,21,25 gāyatrī; 20 anuṣṭup |
yu̱voru̱ ṣū ratha̍ṃ huve sa̱dhastu̍tyāya sū̱riṣu̍ | atū̍rtadakṣā vṛṣaṇā vṛṣaṇvasū
||1||यु॒वोरु॒ षू रथं॑ हुवे स॒धस्तु॑त्याय सू॒रिषु॑ । अतू॑र्तदक्षा वृषणा वृषण्वसू
yu̱vaṃ va̍ro su̱ṣāmṇe̍ ma̱he tane̍ nāsatyā | avo̍bhiryātho vṛṣaṇā vṛṣaṇvasū
||2||यु॒वं व॑रो सु॒षाम्णे॑ म॒हे तने॑ नासत्या । अवो॑भिर्याथो वृषणा वृषण्वसू
tā vā̍ma̱dya ha̍vāmahe ha̱vyebhi̍rvājinīvasū | pū̱rvīri̱ṣa i̱ṣaya̍ntā̱vati̍ kṣa̱paḥ
||3||ता वा॑म॒द्य ह॑वामहे ह॒व्येभि॑र्वाजिनीवसू । पू॒र्वीरि॒ष इ॒षय॑न्ता॒वति॑ क्ष॒पः
ā vā̱ṃ vāhi̍ṣṭho aśvinā̱ ratho̍ yātu śru̱to na̍rā | upa̱ stomā̍ntu̱rasya̍ darśathaḥ śri̱ye
||4||आ वां॒ वाहि॑ष्ठो अश्विना॒ रथो॑ यातु श्रु॒तो न॑रा । उप॒ स्तोमा॑न्तु॒रस्य॑ दर्शथः श्रि॒ये
ju̱hu̱rā̱ṇā ci̍daśvi̱nā ''ma̍nyethāṃ vṛṣaṇvasū | yu̱vaṃ hi ru̍drā̱ parṣa̍tho̱ ati̱ dviṣa̍:
||5||जु॒हु॒रा॒णा चि॑दश्वि॒ना ऽऽम॑न्येथां वृषण्वसू । यु॒वं हि रु॑द्रा॒ पर्ष॑थो॒ अति॒ द्विष॑:
da̱srā hi viśva̍mānu̱ṣaṅma̱kṣūbhi̍: pari̱dīya̍thaḥ | dhi̱ya̱ṃji̱nvā madhu̍varṇā śu̱bhaspatī̍
||6||द॒स्रा हि विश्व॑मानु॒षङ्म॒क्षूभि॑: परि॒दीय॑थः । धि॒यं॒जि॒न्वा मधु॑वर्णा शु॒भस्पती॑
upa̍ no yātamaśvinā rā̱yā vi̍śva̱puṣā̍ sa̱ha | ma̱ghavā̍nā su̱vīrā̱vana̍pacyutā
||7||उप॑ नो यातमश्विना रा॒या वि॑श्व॒पुषा॑ स॒ह । म॒घवा॑ना सु॒वीरा॒वन॑पच्युता
ā me̍ a̱sya pra̍tī̱vya1mindra̍nāsatyā gatam | de̱vā de̱vebhi̍ra̱dya sa̱cana̍stamā
||8||आ मे॑ अ॒स्य प्र॑ती॒व्य१मिन्द्र॑नासत्या गतम् । दे॒वा दे॒वेभि॑र॒द्य स॒चन॑स्तमा
va̱yaṃ hi vā̱ṃ havā̍maha ukṣa̱ṇyanto̍ vyaśva̱vat | su̱ma̱tibhi̱rupa̍ viprāvi̱hā ga̍tam
||9||व॒यं हि वां॒ हवा॑मह उक्ष॒ण्यन्तो॑ व्यश्व॒वत् । सु॒म॒तिभि॒रुप॑ विप्रावि॒हा ग॑तम्
a̱śvinā̱ svṛ̍ṣe stuhi ku̱vitte̱ śrava̍to̱ hava̍m | nedī̍yasaḥ kūl̤ayātaḥ pa̱ṇīm̐ru̱ta
||10||अ॒श्विना॒ स्वृ॑षे स्तुहि कु॒वित्ते॒ श्रव॑तो॒ हव॑म् । नेदी॑यसः कूळयातः प॒णीँरु॒त
vai̱ya̱śvasya̍ śrutaṃ naro̱to me̍ a̱sya ve̍dathaḥ | sa̱joṣa̍sā̱ varu̍ṇo mi̱tro a̍rya̱mā
||11||वै॒य॒श्वस्य॑ श्रुतं नरो॒तो मे॑ अ॒स्य वे॑दथः । स॒जोष॑सा॒ वरु॑णो मि॒त्रो अ॑र्य॒मा
yu̱vāda̍ttasya dhiṣṇyā yu̱vānī̍tasya sū̱ribhi̍: | aha̍raharvṛṣaṇa̱ mahya̍ṃ śikṣatam
||12||यु॒वाद॑त्तस्य धिष्ण्या यु॒वानी॑तस्य सू॒रिभि॑: । अह॑रहर्वृषण॒ मह्यं॑ शिक्षतम्
yo vā̍ṃ ya̱jñebhi̱rāvṛ̱to'dhi̍vastrā va̱dhūri̍va | sa̱pa̱ryantā̍ śu̱bhe ca̍krāte a̱śvinā̍
||13||यो वां॑ य॒ज्ञेभि॒रावृ॒तोऽधि॑वस्त्रा व॒धूरि॑व । स॒प॒र्यन्ता॑ शु॒भे च॑क्राते अ॒श्विना॑
yo vā̍muru̱vyaca̍stama̱ṃ cike̍tati nṛ̱pāyya̍m | va̱rtira̍śvinā̱ pari̍ yātamasma̱yū
||14||यो वा॑मुरु॒व्यच॑स्तमं॒ चिके॑तति नृ॒पाय्य॑म् । व॒र्तिर॑श्विना॒ परि॑ यातमस्म॒यू
a̱smabhya̱ṃ su vṛ̍ṣaṇvasū yā̱taṃ va̱rtirnṛ̱pāyya̍m | vi̱ṣu̱druhe̍va ya̱jñamū̍hathurgi̱rā
||15||अ॒स्मभ्यं॒ सु वृ॑षण्वसू या॒तं व॒र्तिर्नृ॒पाय्य॑म् । वि॒षु॒द्रुहे॑व य॒ज्ञमू॑हथुर्गि॒रा
vāhi̍ṣṭho vā̱ṃ havā̍nā̱ṃ stomo̍ dū̱to hu̍vannarā | yu̱vābhyā̍ṃ bhūtvaśvinā
||16||वाहि॑ष्ठो वां॒ हवा॑नां॒ स्तोमो॑ दू॒तो हु॑वन्नरा । यु॒वाभ्यां॑ भूत्वश्विना
yada̱do di̱vo a̍rṇa̱va i̱ṣo vā̱ mada̍tho gṛ̱he | śru̱taminme̍ amartyā
||17||यद॒दो दि॒वो अ॑र्ण॒व इ॒षो वा॒ मद॑थो गृ॒हे । श्रु॒तमिन्मे॑ अमर्त्या
u̱ta syā śve̍ta̱yāva̍rī̱ vāhi̍ṣṭhā vāṃ na̱dīnā̍m | sindhu̱rhira̍ṇyavartaniḥ
||18||उ॒त स्या श्वे॑त॒याव॑री॒ वाहि॑ष्ठा वां न॒दीना॑म् । सिन्धु॒र्हिर॑ण्यवर्तनिः
smade̱tayā̍ sukī̱rtyā'śvi̍nā śve̱tayā̍ dhi̱yā | vahe̍the śubhrayāvānā
||19||स्मदे॒तया॑ सुकी॒र्त्याऽश्वि॑ना श्वे॒तया॑ धि॒या । वहे॑थे शुभ्रयावाना
yu̱kṣvā hi tvaṃ ra̍thā̱sahā̍ yu̱vasva̱ poṣyā̍ vaso | ānno̍ vāyo̱ madhu̍ pibā̱'smāka̱ṃ sava̱nā ga̍hi
||20||यु॒क्ष्वा हि त्वं र॑था॒सहा॑ यु॒वस्व॒ पोष्या॑ वसो । आन्नो॑ वायो॒ मधु॑ पिबा॒ऽस्माकं॒ सव॒ना ग॑हि
tava̍ vāyavṛtaspate̱ tvaṣṭu̍rjāmātaradbhuta | avā̱ṃsyā vṛ̍ṇīmahe
||21||तव॑ वायवृतस्पते॒ त्वष्टु॑र्जामातरद्भुत । अवां॒स्या वृ॑णीमहे
tvaṣṭu̱rjāmā̍taraṃ va̱yamīśā̍naṃ rā̱ya ī̍mahe | su̱tāva̍nto vā̱yuṃ dyu̱mnā janā̍saḥ
||22||त्वष्टु॒र्जामा॑तरं व॒यमीशा॑नं रा॒य ई॑महे । सु॒ताव॑न्तो वा॒युं द्यु॒म्ना जना॑सः
vāyo̍ yā̱hi śi̱vā di̱vo vaha̍svā̱ su svaśvya̍m | vaha̍sva ma̱haḥ pṛ̍thu̱pakṣa̍sā̱ rathe̍
||23||वायो॑ या॒हि शि॒वा दि॒वो वह॑स्वा॒ सु स्वश्व्य॑म् । वह॑स्व म॒हः पृ॑थु॒पक्ष॑सा॒ रथे॑
tvāṃ hi su̱psara̍stamaṃ nṛ̱ṣada̍neṣu hū̱mahe̍ | grāvā̍ṇa̱ṃ nāśva̍pṛṣṭhaṃ ma̱ṃhanā̍
||24||त्वां हि सु॒प्सर॑स्तमं नृ॒षद॑नेषु हू॒महे॑ । ग्रावा॑णं॒ नाश्व॑पृष्ठं मं॒हना॑
sa tvaṃ no̍ deva̱ mana̍sā̱ vāyo̍ mandā̱no a̍gri̱yaḥ | kṛ̱dhi vājā̍m̐ a̱po dhiya̍:
||25||स त्वं नो॑ देव॒ मन॑सा॒ वायो॑ मन्दा॒नो अ॑ग्रि॒यः । कृ॒धि वाजाँ॑ अ॒पो धिय॑: