Study
- Anukramaṇī
- Source
36 punarvatsa: kāṇva: | maruta: | gāyatrī |
pra yadva̍stri̱ṣṭubha̱miṣa̱ṃ maru̍to̱ vipro̱ akṣa̍rat | vi parva̍teṣu rājatha
||1||प्र यद्व॑स्त्रि॒ष्टुभ॒मिषं॒ मरु॑तो॒ विप्रो॒ अक्ष॑रत् । वि पर्व॑तेषु राजथ
yada̱ṅga ta̍viṣīyavo̱ yāma̍ṃ śubhrā̱ aci̍dhvam | ni parva̍tā ahāsata
||2||यद॒ङ्ग त॑विषीयवो॒ यामं॑ शुभ्रा॒ अचि॑ध्वम् । नि पर्व॑ता अहासत
udī̍rayanta vā̱yubhi̍rvā̱śrāsa̱: pṛśni̍mātaraḥ | dhu̱kṣanta̍ pi̱pyuṣī̱miṣa̍m
||3||उदी॑रयन्त वा॒युभि॑र्वा॒श्रास॒: पृश्नि॑मातरः । धु॒क्षन्त॑ पि॒प्युषी॒मिष॑म्
vapa̍nti ma̱ruto̱ miha̱ṃ pra ve̍payanti̱ parva̍tān | yadyāma̱ṃ yānti̍ vā̱yubhi̍:
||4||वप॑न्ति म॒रुतो॒ मिहं॒ प्र वे॑पयन्ति॒ पर्व॑तान् । यद्यामं॒ यान्ति॑ वा॒युभि॑:
ni yadyāmā̍ya vo gi̱rirni sindha̍vo̱ vidha̍rmaṇe | ma̱he śuṣmā̍ya yemi̱re
||5||नि यद्यामा॑य वो गि॒रिर्नि सिन्ध॑वो॒ विध॑र्मणे । म॒हे शुष्मा॑य येमि॒रे
yu̱ṣmām̐ u̱ nakta̍mū̱taye̍ yu̱ṣmāndivā̍ havāmahe | yu̱ṣmānpra̍ya̱tya̍dhva̱re
||6||यु॒ष्माँ उ॒ नक्त॑मू॒तये॑ यु॒ष्मान्दिवा॑ हवामहे । यु॒ष्मान्प्र॑य॒त्य॑ध्व॒रे
udu̱ tye a̍ru̱ṇapsa̍vaści̱trā yāme̍bhirīrate | vā̱śrā adhi̱ ṣṇunā̍ di̱vaḥ
||7||उदु॒ त्ये अ॑रु॒णप्स॑वश्चि॒त्रा यामे॑भिरीरते । वा॒श्रा अधि॒ ष्णुना॑ दि॒वः
sṛ̱janti̍ ra̱śmimoja̍sā̱ panthā̱ṃ sūryā̍ya̱ yāta̍ve | te bhā̱nubhi̱rvi ta̍sthire
||8||सृ॒जन्ति॑ र॒श्मिमोज॑सा॒ पन्थां॒ सूर्या॑य॒ यात॑वे । ते भा॒नुभि॒र्वि त॑स्थिरे
i̱māṃ me̍ maruto̱ gira̍mi̱maṃ stoma̍mṛbhukṣaṇaḥ | i̱maṃ me̍ vanatā̱ hava̍m
||9||इ॒मां मे॑ मरुतो॒ गिर॑मि॒मं स्तोम॑मृभुक्षणः । इ॒मं मे॑ वनता॒ हव॑म्
trīṇi̱ sarā̍ṃsi̱ pṛśna̍yo dudu̱hre va̱jriṇe̱ madhu̍ | utsa̱ṃ kava̍ndhamu̱driṇa̍m
||10||त्रीणि॒ सरां॑सि॒ पृश्न॑यो दुदु॒ह्रे व॒ज्रिणे॒ मधु॑ । उत्सं॒ कव॑न्धमु॒द्रिण॑म्
maru̍to̱ yaddha̍ vo di̱vaḥ su̍mnā̱yanto̱ havā̍mahe | ā tū na̱ upa̍ gantana
||11||मरु॑तो॒ यद्ध॑ वो दि॒वः सु॑म्ना॒यन्तो॒ हवा॑महे । आ तू न॒ उप॑ गन्तन
yū̱yaṃ hi ṣṭhā su̍dānavo̱ rudrā̍ ṛbhukṣaṇo̱ dame̍ | u̱ta prace̍taso̱ made̍
||12||यू॒यं हि ष्ठा सु॑दानवो॒ रुद्रा॑ ऋभुक्षणो॒ दमे॑ । उ॒त प्रचे॑तसो॒ मदे॑
ā no̍ ra̱yiṃ ma̍da̱cyuta̍ṃ puru̱kṣuṃ vi̱śvadhā̍yasam | iya̍rtā maruto di̱vaḥ
||13||आ नो॑ र॒यिं म॑द॒च्युतं॑ पुरु॒क्षुं वि॒श्वधा॑यसम् । इय॑र्ता मरुतो दि॒वः
adhī̍va̱ yadgi̍rī̱ṇāṃ yāma̍ṃ śubhrā̱ aci̍dhvam | su̱vā̱nairma̍ndadhva̱ indu̍bhiḥ
||14||अधी॑व॒ यद्गि॑री॒णां यामं॑ शुभ्रा॒ अचि॑ध्वम् । सु॒वा॒नैर्म॑न्दध्व॒ इन्दु॑भिः
e̱tāva̍taścideṣāṃ su̱mnaṃ bhi̍kṣeta̱ martya̍: | adā̍bhyasya̱ manma̍bhiḥ
||15||ए॒ताव॑तश्चिदेषां सु॒म्नं भि॑क्षेत॒ मर्त्य॑: । अदा॑भ्यस्य॒ मन्म॑भिः
ye dra̱psā i̍va̱ roda̍sī̱ dhama̱ntyanu̍ vṛ̱ṣṭibhi̍: | utsa̍ṃ du̱hanto̱ akṣi̍tam
||16||ये द्र॒प्सा इ॑व॒ रोद॑सी॒ धम॒न्त्यनु॑ वृ॒ष्टिभि॑: । उत्सं॑ दु॒हन्तो॒ अक्षि॑तम्
udu̍ svā̱nebhi̍rīrata̱ udrathai̱rudu̍ vā̱yubhi̍: | utstomai̱: pṛśni̍mātaraḥ
||17||उदु॑ स्वा॒नेभि॑रीरत॒ उद्रथै॒रुदु॑ वा॒युभि॑: । उत्स्तोमै॒: पृश्नि॑मातरः
yenā̱va tu̱rvaśa̱ṃ yadu̱ṃ yena̱ kaṇva̍ṃ dhana̱spṛta̍m | rā̱ye su tasya̍ dhīmahi
||18||येना॒व तु॒र्वशं॒ यदुं॒ येन॒ कण्वं॑ धन॒स्पृत॑म् । रा॒ये सु तस्य॑ धीमहि
i̱mā u̍ vaḥ sudānavo ghṛ̱taṃ na pi̱pyuṣī̱riṣa̍: | vardhā̍nkā̱ṇvasya̱ manma̍bhiḥ
||19||इ॒मा उ॑ वः सुदानवो घृ॒तं न पि॒प्युषी॒रिष॑: । वर्धा॑न्का॒ण्वस्य॒ मन्म॑भिः
kva̍ nū̱naṃ su̍dānavo̱ mada̍thā vṛktabarhiṣaḥ | bra̱hmā ko va̍: saparyati
||20||क्व॑ नू॒नं सु॑दानवो॒ मद॑था वृक्तबर्हिषः । ब्र॒ह्मा को व॑: सपर्यति
na̱hi ṣma̱ yaddha̍ vaḥ pu̱rā stome̍bhirvṛktabarhiṣaḥ | śardhā̍m̐ ṛ̱tasya̱ jinva̍tha
||21||न॒हि ष्म॒ यद्ध॑ वः पु॒रा स्तोमे॑भिर्वृक्तबर्हिषः । शर्धाँ॑ ऋ॒तस्य॒ जिन्व॑थ
samu̱ tye ma̍ha̱tīra̱paḥ saṃ kṣo̱ṇī samu̱ sūrya̍m | saṃ vajra̍ṃ parva̱śo da̍dhuḥ
||22||समु॒ त्ये म॑ह॒तीर॒पः सं क्षो॒णी समु॒ सूर्य॑म् । सं वज्रं॑ पर्व॒शो द॑धुः
vi vṛ̱traṃ pa̍rva̱śo ya̍yu̱rvi parva̍tām̐ arā̱jina̍: | ca̱krā̱ṇā vṛṣṇi̱ pauṃsya̍m
||23||वि वृ॒त्रं प॑र्व॒शो य॑यु॒र्वि पर्व॑ताँ अरा॒जिन॑: । च॒क्रा॒णा वृष्णि॒ पौंस्य॑म्
anu̍ tri̱tasya̱ yudhya̍ta̱: śuṣma̍māvannu̱ta kratu̍m | anvindra̍ṃ vṛtra̱tūrye̍
||24||अनु॑ त्रि॒तस्य॒ युध्य॑त॒: शुष्म॑मावन्नु॒त क्रतु॑म् । अन्विन्द्रं॑ वृत्र॒तूर्ये॑
vi̱dyuddha̍stā a̱bhidya̍va̱: śiprā̍: śī̱rṣanhi̍ra̱ṇyayī̍: | śu̱bhrā vya̍ñjata śri̱ye
||25||वि॒द्युद्ध॑स्ता अ॒भिद्य॑व॒: शिप्रा॑: शी॒र्षन्हि॑र॒ण्ययी॑: । शु॒भ्रा व्य॑ञ्जत श्रि॒ये
u̱śanā̱ yatpa̍rā̱vata̍ u̱kṣṇo randhra̱mayā̍tana | dyaurna ca̍kradadbhi̱yā
||26||उ॒शना॒ यत्प॑रा॒वत॑ उ॒क्ष्णो रन्ध्र॒मया॑तन । द्यौर्न च॑क्रदद्भि॒या
ā no̍ ma̱khasya̍ dā̱vane'śvai̱rhira̍ṇyapāṇibhiḥ | devā̍sa̱ upa̍ gantana
||27||आ नो॑ म॒खस्य॑ दा॒वनेऽश्वै॒र्हिर॑ण्यपाणिभिः । देवा॑स॒ उप॑ गन्तन
yade̍ṣā̱ṃ pṛṣa̍tī̱ rathe̱ praṣṭi̱rvaha̍ti̱ rohi̍taḥ | yānti̍ śu̱bhrā ri̱ṇanna̱paḥ
||28||यदे॑षां॒ पृष॑ती॒ रथे॒ प्रष्टि॒र्वह॑ति॒ रोहि॑तः । यान्ति॑ शु॒भ्रा रि॒णन्न॒पः
su̱ṣome̍ śarya̱ṇāva̍tyārjī̱ke pa̱styā̍vati | ya̱yurnica̍krayā̱ nara̍:
||29||सु॒षोमे॑ शर्य॒णाव॑त्यार्जी॒के प॒स्त्या॑वति । य॒युर्निच॑क्रया॒ नर॑:
ka̱dā ga̍cchātha maruta i̱tthā vipra̱ṃ hava̍mānam | mā̱rḍī̱kebhi̱rnādha̍mānam
||30||क॒दा ग॑च्छाथ मरुत इ॒त्था विप्रं॒ हव॑मानम् । मा॒र्डी॒केभि॒र्नाध॑मानम्
kaddha̍ nū̱naṃ ka̍dhapriyo̱ yadindra̱maja̍hātana | ko va̍: sakhi̱tva o̍hate
||31||कद्ध॑ नू॒नं क॑धप्रियो॒ यदिन्द्र॒मज॑हातन । को व॑: सखि॒त्व ओ॑हते
sa̱ho ṣu ṇo̱ vajra̍hastai̱: kaṇvā̍so a̱gniṃ ma̱rudbhi̍: | stu̱ṣe hira̍ṇyavāśībhiḥ
||32||स॒हो षु णो॒ वज्र॑हस्तै॒: कण्वा॑सो अ॒ग्निं म॒रुद्भि॑: । स्तु॒षे हिर॑ण्यवाशीभिः
o ṣu vṛṣṇa̱: praya̍jyū̱nā navya̍se suvi̱tāya̍ | va̱vṛ̱tyāṃ ci̱travā̍jān
||33||ओ षु वृष्ण॒: प्रय॑ज्यू॒ना नव्य॑से सुवि॒ताय॑ । व॒वृ॒त्यां चि॒त्रवा॑जान्
gi̱raya̍ści̱nni ji̍hate̱ parśā̍nāso̱ manya̍mānāḥ | parva̍tāści̱nni ye̍mire
||34||गि॒रय॑श्चि॒न्नि जि॑हते॒ पर्शा॑नासो॒ मन्य॑मानाः । पर्व॑ताश्चि॒न्नि ये॑मिरे
ākṣṇa̱yāvā̍no vahantya̱ntari̍kṣeṇa̱ pata̍taḥ | dhātā̍raḥ stuva̱te vaya̍:
||35||आक्ष्ण॒यावा॑नो वहन्त्य॒न्तरि॑क्षेण॒ पत॑तः । धाता॑रः स्तुव॒ते वय॑:
a̱gnirhi jāni̍ pū̱rvyaśchando̱ na sūro̍ a̱rciṣā̍ | te bhā̱nubhi̱rvi ta̍sthire
||36||अ॒ग्निर्हि जानि॑ पू॒र्व्यश्छन्दो॒ न सूरो॑ अ॒र्चिषा॑ । ते भा॒नुभि॒र्वि त॑स्थिरे