Study
- Anukramaṇī
- Source
18 bharga: prāgātha: | indra: | pragātha:= ( viṣamā bṛhatī, samā satobṛhatī, ) 17 śaṃkumatī |
u̱bhaya̍ṃ śṛ̱ṇava̍cca na̱ indro̍ a̱rvāgi̱daṃ vaca̍: | sa̱trācyā̍ ma̱ghavā̱ soma̍pītaye dhi̱yā śavi̍ṣṭha̱ ā ga̍mat
||1||उ॒भयं॑ शृ॒णव॑च्च न॒ इन्द्रो॑ अ॒र्वागि॒दं वच॑: । स॒त्राच्या॑ म॒घवा॒ सोम॑पीतये धि॒या शवि॑ष्ठ॒ आ ग॑मत्
taṃ hi sva̱rāja̍ṃ vṛṣa̱bhaṃ tamoja̍se dhi̱ṣaṇe̍ niṣṭata̱kṣatu̍: | u̱topa̱mānā̍ṃ pratha̱mo ni ṣī̍dasi̱ soma̍kāma̱ṃ hi te̱ mana̍:
||2||तं हि स्व॒राजं॑ वृष॒भं तमोज॑से धि॒षणे॑ निष्टत॒क्षतु॑: । उ॒तोप॒मानां॑ प्रथ॒मो नि षी॑दसि॒ सोम॑कामं॒ हि ते॒ मन॑:
ā vṛ̍ṣasva purūvaso su̱tasye̱ndrāndha̍saḥ | vi̱dmā hi tvā̍ harivaḥ pṛ̱tsu sā̍sa̱himadhṛ̍ṣṭaṃ ciddadhṛ̱ṣvaṇi̍m
||3||आ वृ॑षस्व पुरूवसो सु॒तस्ये॒न्द्रान्ध॑सः । वि॒द्मा हि त्वा॑ हरिवः पृ॒त्सु सा॑स॒हिमधृ॑ष्टं चिद्दधृ॒ष्वणि॑म्
aprā̍misatya maghava̱ntatheda̍sa̱dindra̱ kratvā̱ yathā̱ vaśa̍: | sa̱nema̱ vāja̱ṃ tava̍ śipri̱nnava̍sā ma̱kṣū ci̱dyanto̍ adrivaḥ
||4||अप्रा॑मिसत्य मघव॒न्तथेद॑स॒दिन्द्र॒ क्रत्वा॒ यथा॒ वश॑: । स॒नेम॒ वाजं॒ तव॑ शिप्रि॒न्नव॑सा म॒क्षू चि॒द्यन्तो॑ अद्रिवः
śa̱gdhyū̱3 ṣu śa̍cīpata̱ indra̱ viśvā̍bhirū̱tibhi̍: | bhaga̱ṃ na hi tvā̍ ya̱śasa̍ṃ vasu̱vida̱manu̍ śūra̱ carā̍masi
||5||श॒ग्ध्यू॒३ षु श॑चीपत॒ इन्द्र॒ विश्वा॑भिरू॒तिभि॑: । भगं॒ न हि त्वा॑ य॒शसं॑ वसु॒विद॒मनु॑ शूर॒ चरा॑मसि
pau̱ro aśva̍sya puru̱kṛdgavā̍ma̱syutso̍ deva hira̱ṇyaya̍: | naki̱rhi dāna̍ṃ pari̱mardhi̍ṣa̱ttve yadya̱dyāmi̱ tadā bha̍ra
||6||पौ॒रो अश्व॑स्य पुरु॒कृद्गवा॑म॒स्युत्सो॑ देव हिर॒ण्यय॑: । नकि॒र्हि दानं॑ परि॒मर्धि॑ष॒त्त्वे यद्य॒द्यामि॒ तदा भ॑र
tvaṃ hyehi̱ cera̍ve vi̱dā bhaga̱ṃ vasu̍ttaye | udvā̍vṛṣasva maghava̱ngavi̍ṣṭaya̱ udi̱ndrāśva̍miṣṭaye
||7||त्वं ह्येहि॒ चेर॑वे वि॒दा भगं॒ वसु॑त्तये । उद्वा॑वृषस्व मघव॒न्गवि॑ष्टय॒ उदि॒न्द्राश्व॑मिष्टये
tvaṃ pu̱rū sa̱hasrā̍ṇi śa̱tāni̍ ca yū̱thā dā̱nāya̍ maṃhase | ā pu̍raṃda̱raṃ ca̍kṛma̱ vipra̍vacasa̱ indra̱ṃ gāya̱nto'va̍se
||8||त्वं पु॒रू स॒हस्रा॑णि श॒तानि॑ च यू॒था दा॒नाय॑ मंहसे । आ पु॑रंद॒रं च॑कृम॒ विप्र॑वचस॒ इन्द्रं॒ गाय॒न्तोऽव॑से
a̱vi̱pro vā̱ yadavi̍dha̱dvipro̍ vendra te̱ vaca̍: | sa pra ma̍mandattvā̱yā śa̍takrato̱ prācā̍manyo̱ aha̍ṃsana
||9||अ॒वि॒प्रो वा॒ यदवि॑ध॒द्विप्रो॑ वेन्द्र ते॒ वच॑: । स प्र म॑मन्दत्त्वा॒या श॑तक्रतो॒ प्राचा॑मन्यो॒ अहं॑सन
u̱grabā̍hurmrakṣa̱kṛtvā̍ puraṃda̱ro yadi̍ me śṛ̱ṇava̱ddhava̍m | va̱sū̱yavo̱ vasu̍patiṃ śa̱takra̍tu̱ṃ stomai̱rindra̍ṃ havāmahe
||10||उ॒ग्रबा॑हुर्म्रक्ष॒कृत्वा॑ पुरंद॒रो यदि॑ मे शृ॒णव॒द्धव॑म् । व॒सू॒यवो॒ वसु॑पतिं श॒तक्र॑तुं॒ स्तोमै॒रिन्द्रं॑ हवामहे
na pā̱pāso̍ manāmahe̱ nārā̍yāso̱ na jal̤ha̍vaḥ | yadinnvindra̱ṃ vṛṣa̍ṇa̱ṃ sacā̍ su̱te sakhā̍yaṃ kṛ̱ṇavā̍mahai
||11||न पा॒पासो॑ मनामहे॒ नारा॑यासो॒ न जळ्ह॑वः । यदिन्न्विन्द्रं॒ वृष॑णं॒ सचा॑ सु॒ते सखा॑यं कृ॒णवा॑महै
u̱graṃ yu̍yujma̱ pṛta̍nāsu sāsa̱himṛ̱ṇakā̍ti̱madā̍bhyam | vedā̍ bhṛ̱maṃ ci̱tsani̍tā ra̱thīta̍mo vā̱jina̱ṃ yamidū̱ naśa̍t
||12||उ॒ग्रं यु॑युज्म॒ पृत॑नासु सास॒हिमृ॒णका॑ति॒मदा॑भ्यम् । वेदा॑ भृ॒मं चि॒त्सनि॑ता र॒थीत॑मो वा॒जिनं॒ यमिदू॒ नश॑त्
yata̍ indra̱ bhayā̍mahe̱ tato̍ no̱ abha̍yaṃ kṛdhi | magha̍vañcha̱gdhi tava̱ tanna̍ ū̱tibhi̱rvi dviṣo̱ vi mṛdho̍ jahi
||13||यत॑ इन्द्र॒ भया॑महे॒ ततो॑ नो॒ अभ॑यं कृधि । मघ॑वञ्छ॒ग्धि तव॒ तन्न॑ ऊ॒तिभि॒र्वि द्विषो॒ वि मृधो॑ जहि
tvaṃ hi rā̍dhaspate̱ rādha̍so ma̱haḥ kṣaya̱syāsi̍ vidha̱taḥ | taṃ tvā̍ va̱yaṃ ma̍ghavannindra girvaṇaḥ su̱tāva̍nto havāmahe
||14||त्वं हि रा॑धस्पते॒ राध॑सो म॒हः क्षय॒स्यासि॑ विध॒तः । तं त्वा॑ व॒यं म॑घवन्निन्द्र गिर्वणः सु॒ताव॑न्तो हवामहे
indra̱: spal̤u̱ta vṛ̍tra̱hā pa̍ra̱spā no̱ vare̍ṇyaḥ | sa no̍ rakṣiṣaccara̱maṃ sa ma̍dhya̱maṃ sa pa̱ścātpā̍tu naḥ pu̱raḥ
||15||इन्द्र॒: स्पळु॒त वृ॑त्र॒हा प॑र॒स्पा नो॒ वरे॑ण्यः । स नो॑ रक्षिषच्चर॒मं स म॑ध्य॒मं स प॒श्चात्पा॑तु नः पु॒रः
tvaṃ na̍: pa̱ścāda̍dha̱rādu̍tta̱rātpu̱ra indra̱ ni pā̍hi vi̱śvata̍: | ā̱re a̱smatkṛ̍ṇuhi̱ daivya̍ṃ bha̱yamā̱re he̱tīrade̍vīḥ
||16||त्वं न॑: प॒श्चाद॑ध॒रादु॑त्त॒रात्पु॒र इन्द्र॒ नि पा॑हि वि॒श्वत॑: । आ॒रे अ॒स्मत्कृ॑णुहि॒ दैव्यं॑ भ॒यमा॒रे हे॒तीरदे॑वीः
a̱dyādyā̱ śvaḥśva̱ indra̱ trāsva̍ pa̱re ca̍ naḥ | viśvā̍ ca no jari̱tṝntsa̍tpate̱ ahā̱ divā̱ nakta̍ṃ ca rakṣiṣaḥ
||17||अ॒द्याद्या॒ श्वःश्व॒ इन्द्र॒ त्रास्व॑ प॒रे च॑ नः । विश्वा॑ च नो जरि॒तॄन्त्स॑त्पते॒ अहा॒ दिवा॒ नक्तं॑ च रक्षिषः
pra̱bha̱ṅgī śūro̍ ma̱ghavā̍ tu̱vīma̍gha̱: sammi̍ślo vi̱ryā̍ya̱ kam |
u̱bhā te̍ bā̱hū vṛṣa̍ṇā śatakrato̱ ni yā vajra̍ṃ mimi̱kṣatu̍:
||18||प्र॒भ॒ङ्गी शूरो॑ म॒घवा॑ तु॒वीम॑घ॒: सम्मि॑श्लो वि॒र्या॑य॒ कम् ।
उ॒भा ते॑ बा॒हू वृष॑णा शतक्रतो॒ नि या वज्रं॑ मिमि॒क्षतु॑: