Study
- Anukramaṇī
- Source
22 manurvaivasvata: |viśve devā: |pragātha: = ( viṣamā bṛhatī, samā satobṛhatī ) |
a̱gniru̱kthe pu̱rohi̍to̱ grāvā̍ṇo ba̱rhira̍dhva̱re | ṛ̱cā yā̍mi ma̱ruto̱ brahma̍ṇa̱spati̍ṃ de̱vām̐ avo̱ vare̍ṇyam
||1||अ॒ग्निरु॒क्थे पु॒रोहि॑तो॒ ग्रावा॑णो ब॒र्हिर॑ध्व॒रे । ऋ॒चा या॑मि म॒रुतो॒ ब्रह्म॑ण॒स्पतिं॑ दे॒वाँ अवो॒ वरे॑ण्यम्
ā pa̱śuṃ gā̍si pṛthi̱vīṃ vana̱spatī̍nu̱ṣāsā̱ nakta̱moṣa̍dhīḥ |
viśve̍ ca no vasavo viśvavedaso dhī̱nāṃ bhū̍ta prāvi̱tāra̍:
||2||आ प॒शुं गा॑सि पृथि॒वीं वन॒स्पती॑नु॒षासा॒ नक्त॒मोष॑धीः ।
विश्वे॑ च नो वसवो विश्ववेदसो धी॒नां भू॑त प्रावि॒तार॑:
pra sū na̍ etvadhva̱ro̱3'gnā de̱veṣu̍ pū̱rvyaḥ | ā̱di̱tyeṣu̱ pra varu̍ṇe dhṛ̱tavra̍te ma̱rutsu̍ vi̱śvabhā̍nuṣu
||3||प्र सू न॑ एत्वध्व॒रो॒३ऽग्ना दे॒वेषु॑ पू॒र्व्यः । आ॒दि॒त्येषु॒ प्र वरु॑णे धृ॒तव्र॑ते म॒रुत्सु॑ वि॒श्वभा॑नुषु
viśve̱ hi ṣmā̱ mana̍ve vi̱śvave̍daso̱ bhuva̍nvṛ̱dhe ri̱śāda̍saḥ | ari̍ṣṭebhiḥ pā̱yubhi̍rviśvavedaso̱ yantā̍ no'vṛ̱kaṃ cha̱rdiḥ
||4||विश्वे॒ हि ष्मा॒ मन॑वे वि॒श्ववे॑दसो॒ भुव॑न्वृ॒धे रि॒शाद॑सः । अरि॑ष्टेभिः पा॒युभि॑र्विश्ववेदसो॒ यन्ता॑ नोऽवृ॒कं छ॒र्दिः
ā no̍ a̱dya sama̍naso̱ gantā̱ viśve̍ sa̱joṣa̍saḥ | ṛ̱cā gi̱rā maru̍to̱ devyadi̍te̱ sada̍ne̱ pastye̍ mahi
||5||आ नो॑ अ॒द्य सम॑नसो॒ गन्ता॒ विश्वे॑ स॒जोष॑सः । ऋ॒चा गि॒रा मरु॑तो॒ देव्यदि॑ते॒ सद॑ने॒ पस्त्ये॑ महि
a̱bhi pri̱yā ma̍ruto̱ yā vo̱ aśvyā̍ ha̱vyā mi̍tra prayā̱thana̍ |
ā ba̱rhirindro̱ varu̍ṇastu̱rā nara̍ ādi̱tyāsa̍: sadantu naḥ
||6||अ॒भि प्रि॒या म॑रुतो॒ या वो॒ अश्व्या॑ ह॒व्या मि॑त्र प्रया॒थन॑ ।
आ ब॒र्हिरिन्द्रो॒ वरु॑णस्तु॒रा नर॑ आदि॒त्यास॑: सदन्तु नः
va̱yaṃ vo̍ vṛ̱ktaba̍rhiṣo hi̱tapra̍yasa ānu̱ṣak | su̱taso̍māso varuṇa havāmahe manu̱ṣvadi̱ddhāgna̍yaḥ
||7||व॒यं वो॑ वृ॒क्तब॑र्हिषो हि॒तप्र॑यस आनु॒षक् । सु॒तसो॑मासो वरुण हवामहे मनु॒ष्वदि॒द्धाग्न॑यः
ā pra yā̍ta̱ maru̍to̱ viṣṇo̱ aśvi̍nā̱ pūṣa̱nmākī̍nayā dhi̱yā |
indra̱ ā yā̍tu pratha̱maḥ sa̍ni̱ṣyubhi̱rvṛṣā̱ yo vṛ̍tra̱hā gṛ̱ṇe
||8||आ प्र या॑त॒ मरु॑तो॒ विष्णो॒ अश्वि॑ना॒ पूष॒न्माकी॑नया धि॒या ।
इन्द्र॒ आ या॑तु प्रथ॒मः स॑नि॒ष्युभि॒र्वृषा॒ यो वृ॑त्र॒हा गृ॒णे
vi no̍ devāso adru̱ho'cchi̍dra̱ṃ śarma̍ yacchata | na yaddū̱rādva̍savo̱ nū ci̱danti̍to̱ varū̍thamāda̱dharṣa̍ti
||9||वि नो॑ देवासो अद्रु॒होऽच्छि॑द्रं॒ शर्म॑ यच्छत । न यद्दू॒राद्व॑सवो॒ नू चि॒दन्ति॑तो॒ वरू॑थमाद॒धर्ष॑ति
asti̱ hi va̍: sajā̱tya̍ṃ riśādaso̱ devā̍so̱ astyāpya̍m |
pra ṇa̱: pūrva̍smai suvi̱tāya̍ vocata ma̱kṣū su̱mnāya̱ navya̍se
||10||अस्ति॒ हि व॑: सजा॒त्यं॑ रिशादसो॒ देवा॑सो॒ अस्त्याप्य॑म् ।
प्र ण॒: पूर्व॑स्मै सुवि॒ताय॑ वोचत म॒क्षू सु॒म्नाय॒ नव्य॑से
i̱dā hi va̱ upa̍stutimi̱dā vā̱masya̍ bha̱ktaye̍ | upa̍ vo viśvavedaso nama̱syurām̐ asṛ̱kṣyanyā̍miva
||11||इ॒दा हि व॒ उप॑स्तुतिमि॒दा वा॒मस्य॑ भ॒क्तये॑ । उप॑ वो विश्ववेदसो नम॒स्युराँ असृ॒क्ष्यन्या॑मिव
udu̱ ṣya va̍: savi̱tā su̍praṇīta̱yo'sthā̍dū̱rdhvo vare̍ṇyaḥ | ni dvi̱pāda̱ścatu̍ṣpādo a̱rthino'vi̍śranpatayi̱ṣṇava̍:
||12||उदु॒ ष्य व॑: सवि॒ता सु॑प्रणीत॒योऽस्था॑दू॒र्ध्वो वरे॑ण्यः । नि द्वि॒पाद॒श्चतु॑ष्पादो अ॒र्थिनोऽवि॑श्रन्पतयि॒ष्णव॑:
de̱vaṃde̍va̱ṃ vo'va̍se de̱vaṃde̍vama̱bhiṣṭa̍ye | de̱vaṃde̍vaṃ huvema̱ vāja̍sātaye gṛ̱ṇanto̍ de̱vyā dhi̱yā
||13||दे॒वंदे॑वं॒ वोऽव॑से दे॒वंदे॑वम॒भिष्ट॑ये । दे॒वंदे॑वं हुवेम॒ वाज॑सातये गृ॒णन्तो॑ दे॒व्या धि॒या
de̱vāso̱ hi ṣmā̱ mana̍ve̱ sama̍nyavo̱ viśve̍ sā̱kaṃ sarā̍tayaḥ |
te no̍ a̱dya te a̍pa̱raṃ tu̱ce tu no̱ bhava̍ntu varivo̱vida̍:
||14||दे॒वासो॒ हि ष्मा॒ मन॑वे॒ सम॑न्यवो॒ विश्वे॑ सा॒कं सरा॑तयः ।
ते नो॑ अ॒द्य ते अ॑प॒रं तु॒चे तु नो॒ भव॑न्तु वरिवो॒विद॑:
pra va̍: śaṃsāmyadruhaḥ sa̱ṃstha upa̍stutīnām | na taṃ dhū̱rtirva̍ruṇa mitra̱ martya̱ṃ yo vo̱ dhāma̱bhyo'vi̍dhat
||15||प्र व॑: शंसाम्यद्रुहः सं॒स्थ उप॑स्तुतीनाम् । न तं धू॒र्तिर्व॑रुण मित्र॒ मर्त्यं॒ यो वो॒ धाम॒भ्योऽवि॑धत्
pra sa kṣaya̍ṃ tirate̱ vi ma̱hīriṣo̱ yo vo̱ varā̍ya̱ dāśa̍ti | pra pra̱jābhi̍rjāyate̱ dharma̍ṇa̱sparyari̍ṣṭa̱: sarva̍ edhate
||16||प्र स क्षयं॑ तिरते॒ वि म॒हीरिषो॒ यो वो॒ वरा॑य॒ दाश॑ति । प्र प्र॒जाभि॑र्जायते॒ धर्म॑ण॒स्पर्यरि॑ष्ट॒: सर्व॑ एधते
ṛ̱te sa vi̍ndate yu̱dhaḥ su̱gebhi̍ryā̱tyadhva̍naḥ | a̱rya̱mā mi̱tro varu̍ṇa̱: sarā̍tayo̱ yaṃ trāya̍nte sa̱joṣa̍saḥ
||17||ऋ॒ते स वि॑न्दते यु॒धः सु॒गेभि॑र्या॒त्यध्व॑नः । अ॒र्य॒मा मि॒त्रो वरु॑ण॒: सरा॑तयो॒ यं त्राय॑न्ते स॒जोष॑सः
ajre̍ cidasmai kṛṇuthā̱ nyañca̍naṃ du̱rge ci̱dā su̍sara̱ṇam | e̱ṣā ci̍dasmāda̱śani̍: pa̱ro nu sāsre̍dhantī̱ vi na̍śyatu
||18||अज्रे॑ चिदस्मै कृणुथा॒ न्यञ्च॑नं दु॒र्गे चि॒दा सु॑सर॒णम् । ए॒षा चि॑दस्माद॒शनि॑: प॒रो नु सास्रे॑धन्ती॒ वि न॑श्यतु
yada̱dya sūrya̍ udya̱ti priya̍kṣatrā ṛ̱taṃ da̱dha | yanni̱mruci̍ pra̱budhi̍ viśvavedaso̱ yadvā̍ ma̱dhyaṃdi̍ne di̱vaḥ
||19||यद॒द्य सूर्य॑ उद्य॒ति प्रिय॑क्षत्रा ऋ॒तं द॒ध । यन्नि॒म्रुचि॑ प्र॒बुधि॑ विश्ववेदसो॒ यद्वा॑ म॒ध्यंदि॑ने दि॒वः
yadvā̍bhipi̱tve a̍surā ṛ̱taṃ ya̱te cha̱rdirye̱ma vi dā̱śuṣe̍ | va̱yaṃ tadvo̍ vasavo viśvavedasa̱ upa̍ stheyāma̱ madhya̱ ā
||20||यद्वा॑भिपि॒त्वे अ॑सुरा ऋ॒तं य॒ते छ॒र्दिर्ये॒म वि दा॒शुषे॑ । व॒यं तद्वो॑ वसवो विश्ववेदस॒ उप॑ स्थेयाम॒ मध्य॒ आ
yada̱dya sūra̱ udi̍te̱ yanma̱dhyaṃdi̍na ā̱tuci̍ | vā̱maṃ dha̱ttha mana̍ve viśvavedaso̱ juhvā̍nāya̱ prace̍tase
||21||यद॒द्य सूर॒ उदि॑ते॒ यन्म॒ध्यंदि॑न आ॒तुचि॑ । वा॒मं ध॒त्थ मन॑वे विश्ववेदसो॒ जुह्वा॑नाय॒ प्रचे॑तसे
va̱yaṃ tadva̍: samrāja̱ ā vṛ̍ṇīmahe pu̱tro na ba̍hu̱pāyya̍m |
a̱śyāma̱ tadā̍dityā̱ juhva̍to ha̱viryena̱ vasyo̱'naśā̍mahai
||22||व॒यं तद्व॑: सम्राज॒ आ वृ॑णीमहे पु॒त्रो न ब॑हु॒पाय्य॑म् ।
अ॒श्याम॒ तदा॑दित्या॒ जुह्व॑तो ह॒विर्येन॒ वस्यो॒ऽनशा॑महै