Study
- Anukramaṇī
- Source
34 sukakṣa āṅgirasa: | indra:, 34 indra-ṛbhavaśca | gāyatrī |
udgheda̱bhi śru̱tāma̍ghaṃ vṛṣa̱bhaṃ naryā̍pasam | astā̍rameṣi sūrya
||1||उद्घेद॒भि श्रु॒ताम॑घं वृष॒भं नर्या॑पसम् । अस्ता॑रमेषि सूर्य
nava̱ yo na̍va̱tiṃ puro̍ bi̱bheda̍ bā̱hvo̍jasā | ahi̍ṃ ca vṛtra̱hāva̍dhīt
||2||नव॒ यो न॑व॒तिं पुरो॑ बि॒भेद॑ बा॒ह्वो॑जसा । अहिं॑ च वृत्र॒हाव॑धीत्
sa na̱ indra̍: śi̱vaḥ sakhā'śvā̍va̱dgoma̱dyava̍mat | u̱rudhā̍reva dohate
||3||स न॒ इन्द्र॑: शि॒वः सखाऽश्वा॑व॒द्गोम॒द्यव॑मत् । उ॒रुधा॑रेव दोहते
yada̱dya kacca̍ vṛtrahannu̱dagā̍ a̱bhi sū̍rya | sarva̱ṃ tadi̍ndra te̱ vaśe̍
||4||यद॒द्य कच्च॑ वृत्रहन्नु॒दगा॑ अ॒भि सू॑र्य । सर्वं॒ तदि॑न्द्र ते॒ वशे॑
yadvā̍ pravṛddha satpate̱ na ma̍rā̱ iti̱ manya̍se | u̱to tatsa̱tyamittava̍
||5||यद्वा॑ प्रवृद्ध सत्पते॒ न म॑रा॒ इति॒ मन्य॑से । उ॒तो तत्स॒त्यमित्तव॑
ye somā̍saḥ parā̱vati̱ ye a̍rvā̱vati̍ sunvi̱re | sarvā̱m̐stām̐ i̍ndra gacchasi
||6||ये सोमा॑सः परा॒वति॒ ये अ॑र्वा॒वति॑ सुन्वि॒रे । सर्वाँ॒स्ताँ इ॑न्द्र गच्छसि
tamindra̍ṃ vājayāmasi ma̱he vṛ̱trāya̱ hanta̍ve | sa vṛṣā̍ vṛṣa̱bho bhu̍vat
||7||तमिन्द्रं॑ वाजयामसि म॒हे वृ॒त्राय॒ हन्त॑वे । स वृषा॑ वृष॒भो भु॑वत्
indra̱: sa dāma̍ne kṛ̱ta oji̍ṣṭha̱: sa made̍ hi̱taḥ | dyu̱mnī ślo̱kī sa so̱myaḥ
||8||इन्द्र॒: स दाम॑ने कृ॒त ओजि॑ष्ठ॒: स मदे॑ हि॒तः । द्यु॒म्नी श्लो॒की स सो॒म्यः
gi̱rā vajro̱ na sambhṛ̍ta̱: saba̍lo̱ ana̍pacyutaḥ | va̱va̱kṣa ṛ̱ṣvo astṛ̍taḥ
||9||गि॒रा वज्रो॒ न सम्भृ॑त॒: सब॑लो॒ अन॑पच्युतः । व॒व॒क्ष ऋ॒ष्वो अस्तृ॑तः
du̱rge ci̍nnaḥ su̱gaṃ kṛ̍dhi gṛṇā̱na i̍ndra girvaṇaḥ | tvaṃ ca̍ maghava̱nvaśa̍:
||10||दु॒र्गे चि॑न्नः सु॒गं कृ॑धि गृणा॒न इ॑न्द्र गिर्वणः । त्वं च॑ मघव॒न्वश॑:
yasya̍ te̱ nū ci̍dā̱diśa̱ṃ na mi̱nanti̍ sva̱rājya̍m | na de̱vo nādhri̍gu̱rjana̍:
||11||यस्य॑ ते॒ नू चि॑दा॒दिशं॒ न मि॒नन्ति॑ स्व॒राज्य॑म् । न दे॒वो नाध्रि॑गु॒र्जन॑:
adhā̍ te̱ apra̍tiṣkutaṃ de̱vī śuṣma̍ṃ saparyataḥ | u̱bhe su̍śipra̱ roda̍sī
||12||अधा॑ ते॒ अप्र॑तिष्कुतं दे॒वी शुष्मं॑ सपर्यतः । उ॒भे सु॑शिप्र॒ रोद॑सी
tvame̱tada̍dhārayaḥ kṛ̱ṣṇāsu̱ rohi̍ṇīṣu ca | paru̍ṣṇīṣu̱ ruśa̱tpaya̍:
||13||त्वमे॒तद॑धारयः कृ॒ष्णासु॒ रोहि॑णीषु च । परु॑ष्णीषु॒ रुश॒त्पय॑:
vi yadahe̱radha̍ tvi̱ṣo viśve̍ de̱vāso̱ akra̍muḥ | vi̱danmṛ̱gasya̱ tām̐ ama̍:
||14||वि यदहे॒रध॑ त्वि॒षो विश्वे॑ दे॒वासो॒ अक्र॑मुः । वि॒दन्मृ॒गस्य॒ ताँ अम॑:
ādu̍ me niva̱ro bhu̍vadvṛtra̱hādi̍ṣṭa̱ pauṃsya̍m | ajā̍taśatru̱rastṛ̍taḥ
||15||आदु॑ मे निव॒रो भु॑वद्वृत्र॒हादि॑ष्ट॒ पौंस्य॑म् । अजा॑तशत्रु॒रस्तृ॑तः
śru̱taṃ vo̍ vṛtra̱hanta̍ma̱ṃ pra śardha̍ṃ carṣaṇī̱nām | ā śu̍ṣe̱ rādha̍se ma̱he
||16||श्रु॒तं वो॑ वृत्र॒हन्त॑मं॒ प्र शर्धं॑ चर्षणी॒नाम् । आ शु॑षे॒ राध॑से म॒हे
a̱yā dhi̱yā ca̍ gavya̱yā puru̍ṇāma̱npuru̍ṣṭuta | yatsome̍soma̱ ābha̍vaḥ
||17||अ॒या धि॒या च॑ गव्य॒या पुरु॑णाम॒न्पुरु॑ष्टुत । यत्सोमे॑सोम॒ आभ॑वः
bo̱dhinma̍nā̱ ida̍stu no vṛtra̱hā bhūryā̍sutiḥ | śṛ̱ṇotu̍ śa̱kra ā̱śiṣa̍m
||18||बो॒धिन्म॑ना॒ इद॑स्तु नो वृत्र॒हा भूर्या॑सुतिः । शृ॒णोतु॑ श॒क्र आ॒शिष॑म्
kayā̱ tvaṃ na̍ ū̱tyā'bhi pra ma̍ndase vṛṣan | kayā̍ sto̱tṛbhya̱ ā bha̍ra
||19||कया॒ त्वं न॑ ऊ॒त्याऽभि प्र म॑न्दसे वृषन् । कया॑ स्तो॒तृभ्य॒ आ भ॑र
kasya̱ vṛṣā̍ su̱te sacā̍ ni̱yutvā̍nvṛṣa̱bho ra̍ṇat | vṛ̱tra̱hā soma̍pītaye
||20||कस्य॒ वृषा॑ सु॒ते सचा॑ नि॒युत्वा॑न्वृष॒भो र॑णत् । वृ॒त्र॒हा सोम॑पीतये
a̱bhī ṣu ṇa̱stvaṃ ra̱yiṃ ma̍ndasā̱naḥ sa̍ha̱sriṇa̍m | pra̱ya̱ntā bo̍dhi dā̱śuṣe̍
||21||अ॒भी षु ण॒स्त्वं र॒यिं म॑न्दसा॒नः स॑ह॒स्रिण॑म् । प्र॒य॒न्ता बो॑धि दा॒शुषे॑
patnī̍vantaḥ su̱tā i̱ma u̱śanto̍ yanti vī̱taye̍ | a̱pāṃ jagmi̍rnicumpu̱ṇaḥ
||22||पत्नी॑वन्तः सु॒ता इ॒म उ॒शन्तो॑ यन्ति वी॒तये॑ । अ॒पां जग्मि॑र्निचुम्पु॒णः
i̱ṣṭā hotrā̍ asṛkṣa̱tendra̍ṃ vṛ̱dhāso̍ adhva̱re | acchā̍vabhṛ̱thamoja̍sā
||23||इ॒ष्टा होत्रा॑ असृक्ष॒तेन्द्रं॑ वृ॒धासो॑ अध्व॒रे । अच्छा॑वभृ॒थमोज॑सा
i̱ha tyā sa̍dha̱mādyā̱ harī̱ hira̍ṇyakeśyā | vo̱l̤hāma̱bhi prayo̍ hi̱tam
||24||इ॒ह त्या स॑ध॒माद्या॒ हरी॒ हिर॑ण्यकेश्या । वो॒ळ्हाम॒भि प्रयो॑ हि॒तम्
tubhya̱ṃ somā̍: su̱tā i̱me stī̱rṇaṃ ba̱rhirvi̍bhāvaso | sto̱tṛbhya̱ indra̱mā va̍ha
||25||तुभ्यं॒ सोमा॑: सु॒ता इ॒मे स्ती॒र्णं ब॒र्हिर्वि॑भावसो । स्तो॒तृभ्य॒ इन्द्र॒मा व॑ह
ā te̱ dakṣa̱ṃ vi ro̍ca̱nā dadha̱dratnā̱ vi dā̱śuṣe̍ | sto̱tṛbhya̱ indra̍marcata
||26||आ ते॒ दक्षं॒ वि रो॑च॒ना दध॒द्रत्ना॒ वि दा॒शुषे॑ । स्तो॒तृभ्य॒ इन्द्र॑मर्चत
ā te̍ dadhāmīndri̱yamu̱kthā viśvā̍ śatakrato | sto̱tṛbhya̍ indra mṛl̤aya
||27||आ ते॑ दधामीन्द्रि॒यमु॒क्था विश्वा॑ शतक्रतो । स्तो॒तृभ्य॑ इन्द्र मृळय
bha̱drambha̍draṃ na̱ ā bha̱reṣa̱mūrja̍ṃ śatakrato | yadi̍ndra mṛ̱l̤ayā̍si naḥ
||28||भ॒द्रम्भ॑द्रं न॒ आ भ॒रेष॒मूर्जं॑ शतक्रतो । यदि॑न्द्र मृ॒ळया॑सि नः
sa no̱ viśvā̱nyā bha̍ra suvi̱tāni̍ śatakrato | yadi̍ndra mṛ̱l̤ayā̍si naḥ
||29||स नो॒ विश्वा॒न्या भ॑र सुवि॒तानि॑ शतक्रतो । यदि॑न्द्र मृ॒ळया॑सि नः
tvāmidvṛ̍trahantama su̱tāva̍nto havāmahe | yadi̍ndra mṛ̱l̤ayā̍si naḥ
||30||त्वामिद्वृ॑त्रहन्तम सु॒ताव॑न्तो हवामहे । यदि॑न्द्र मृ॒ळया॑सि नः
upa̍ no̱ hari̍bhiḥ su̱taṃ yā̱hi ma̍dānāṃ pate | upa̍ no̱ hari̍bhiḥ su̱tam
||31||उप॑ नो॒ हरि॑भिः सु॒तं या॒हि म॑दानां पते । उप॑ नो॒ हरि॑भिः सु॒तम्
dvi̱tā yo vṛ̍tra̱hanta̍mo vi̱da indra̍: śa̱takra̍tuḥ | upa̍ no̱ hari̍bhiḥ su̱tam
||32||द्वि॒ता यो वृ॑त्र॒हन्त॑मो वि॒द इन्द्र॑: श॒तक्र॑तुः । उप॑ नो॒ हरि॑भिः सु॒तम्
tvaṃ hi vṛ̍trahanneṣāṃ pā̱tā somā̍nā̱masi̍ | upa̍ no̱ hari̍bhiḥ su̱tam
||33||त्वं हि वृ॑त्रहन्नेषां पा॒ता सोमा॑ना॒मसि॑ । उप॑ नो॒ हरि॑भिः सु॒तम्
indra̍ i̱ṣe da̍dātu na ṛbhu̱kṣaṇa̍mṛ̱bhuṃ ra̱yim | vā̱jī da̍dātu vā̱jina̍m
||34||इन्द्र॑ इ॒षे द॑दातु न ऋभु॒क्षण॑मृ॒भुं र॒यिम् । वा॒जी द॑दातु वा॒जिन॑म्