Study
- Anukramaṇī
- Source
8 madhya: kāṇva:| indra: | pragātha:= ( viṣamā bṛhatī, samā satobṛhatī ) |
u̱pa̱maṃ tvā̍ ma̱ghonā̱ṃ jyeṣṭha̍ṃ ca vṛṣa̱bhāṇā̍m | pū̱rbhitta̍maṃ maghavannindra go̱vida̱mīśā̍naṃ rā̱ya ī̍mahe
||1||उ॒प॒मं त्वा॑ म॒घोनां॒ ज्येष्ठं॑ च वृष॒भाणा॑म् । पू॒र्भित्त॑मं मघवन्निन्द्र गो॒विद॒मीशा॑नं रा॒य ई॑महे
ya ā̱yuṃ kutsa̍matithi̱gvamarda̍yo vāvṛdhā̱no di̱vedi̍ve | taṃ tvā̍ va̱yaṃ harya̍śvaṃ śa̱takra̍tuṃ vāja̱yanto̍ havāmahe
||2||य आ॒युं कुत्स॑मतिथि॒ग्वमर्द॑यो वावृधा॒नो दि॒वेदि॑वे । तं त्वा॑ व॒यं हर्य॑श्वं श॒तक्र॑तुं वाज॒यन्तो॑ हवामहे
ā no̱ viśve̍ṣā̱ṃ rasa̱ṃ madhva̍: siñca̱ntvadra̍yaḥ | ye pa̍rā̱vati̍ sunvi̱re jane̱ṣvā ye a̍rvā̱vatīnda̍vaḥ
||3||आ नो॒ विश्वे॑षां॒ रसं॒ मध्व॑: सिञ्च॒न्त्वद्र॑यः । ये प॑रा॒वति॑ सुन्वि॒रे जने॒ष्वा ये अ॑र्वा॒वतीन्द॑वः
viśvā̱ dveṣā̍ṃsi ja̱hi cāva̱ cā kṛ̍dhi̱ viśve̍ sanva̱ntvā vasu̍ |
śīṣṭe̍ṣu citte madi̱rāso̍ a̱ṃśavo̱ yatrā̱ soma̍sya tṛ̱mpasi̍
||4||विश्वा॒ द्वेषां॑सि ज॒हि चाव॒ चा कृ॑धि॒ विश्वे॑ सन्व॒न्त्वा वसु॑ ।
शीष्टे॑षु चित्ते मदि॒रासो॑ अं॒शवो॒ यत्रा॒ सोम॑स्य तृ॒म्पसि॑
indra̱ nedī̍ya̱ edi̍hi mi̱tame̍dhābhirū̱tibhi̍: | ā śa̍ṃtama̱ śaṃta̍mābhira̱bhiṣṭi̍bhi̱rā svā̍pe svā̱pibhi̍:
||5||इन्द्र॒ नेदी॑य॒ एदि॑हि मि॒तमे॑धाभिरू॒तिभि॑: । आ शं॑तम॒ शंत॑माभिर॒भिष्टि॑भि॒रा स्वा॑पे स्वा॒पिभि॑:
ā̱ji̱tura̱ṃ satpa̍tiṃ vi̱śvaca̍rṣaṇiṃ kṛ̱dhi pra̱jāsvābha̍gam |
pra sū ti̍rā̱ śacī̍bhi̱rye ta̍ u̱kthina̱: kratu̍ṃ puna̱ta ā̍nu̱ṣak
||6||आ॒जि॒तुरं॒ सत्प॑तिं वि॒श्वच॑र्षणिं कृ॒धि प्र॒जास्वाभ॑गम् ।
प्र सू ति॑रा॒ शची॑भि॒र्ये त॑ उ॒क्थिन॒: क्रतुं॑ पुन॒त आ॑नु॒षक्
yaste̱ sādhi̱ṣṭho'va̍se̱ te syā̍ma̱ bhare̍ṣu te | va̱yaṃ hotrā̍bhiru̱ta de̱vahū̍tibhiḥ sasa̱vāṃso̍ manāmahe
||7||यस्ते॒ साधि॒ष्ठोऽव॑से॒ ते स्या॑म॒ भरे॑षु ते । व॒यं होत्रा॑भिरु॒त दे॒वहू॑तिभिः सस॒वांसो॑ मनामहे
a̱haṃ hi te̍ harivo̱ brahma̍ vāja̱yurā̱jiṃ yāmi̱ sado̱tibhi̍: | tvāmide̱va tamame̱ sama̍śva̱yurga̱vyuragra̍ mathī̱nām
||8||अ॒हं हि ते॑ हरिवो॒ ब्रह्म॑ वाज॒युरा॒जिं यामि॒ सदो॒तिभि॑: । त्वामिदे॒व तममे॒ सम॑श्व॒युर्ग॒व्युरग्र॑॑ मथी॒नाम्