Study
- Anukramaṇī
- Source
15 kali: prāgātha: | indra: | pragātha:= ( viṣamā bṛhatī, samā satobṛhatī ), 15 anuṣṭup |
taro̍bhirvo vi̱dadva̍su̱mindra̍ṃ sa̱bādha̍ ū̱taye̍ | bṛ̱hadgāya̍ntaḥ su̱taso̍me adhva̱re hu̱ve bhara̱ṃ na kā̱riṇa̍m
||1||तरो॑भिर्वो वि॒दद्व॑सु॒मिन्द्रं॑ स॒बाध॑ ऊ॒तये॑ । बृ॒हद्गाय॑न्तः सु॒तसो॑मे अध्व॒रे हु॒वे भरं॒ न का॒रिण॑म्
na yaṃ du̱dhrā vara̍nte̱ na sthi̱rā muro̱ made̍ suśi̱pramandha̍saḥ |
ya ā̱dṛtyā̍ śaśamā̱nāya̍ sunva̱te dātā̍ jari̱tra u̱kthya̍m
||2||न यं दु॒ध्रा वर॑न्ते॒ न स्थि॒रा मुरो॒ मदे॑ सुशि॒प्रमन्ध॑सः ।
य आ॒दृत्या॑ शशमा॒नाय॑ सुन्व॒ते दाता॑ जरि॒त्र उ॒क्थ्य॑म्
yaḥ śa̱kro mṛ̱kṣo aśvyo̱ yo vā̱ kījo̍ hira̱ṇyaya̍: | sa ū̱rvasya̍ rejaya̱tyapā̍vṛti̱mindro̱ gavya̍sya vṛtra̱hā
||3||यः श॒क्रो मृ॒क्षो अश्व्यो॒ यो वा॒ कीजो॑ हिर॒ण्यय॑: । स ऊ॒र्वस्य॑ रेजय॒त्यपा॑वृति॒मिन्द्रो॒ गव्य॑स्य वृत्र॒हा
nikhā̍taṃ ci̱dyaḥ pu̍rusambhṛ̱taṃ vasūdidvapa̍ti dā̱śuṣe̍ | va̱jrī su̍śi̱pro harya̍śva̱ itka̍ra̱dindra̱: kratvā̱ yathā̱ vaśa̍t
||4||निखा॑तं चि॒द्यः पु॑रुसम्भृ॒तं वसूदिद्वप॑ति दा॒शुषे॑ । व॒ज्री सु॑शि॒प्रो हर्य॑श्व॒ इत्क॑र॒दिन्द्र॒: क्रत्वा॒ यथा॒ वश॑त्
yadvā̱vantha̍ puruṣṭuta pu̱rā ci̍cchūra nṛ̱ṇām | va̱yaṃ tatta̍ indra̱ saṃ bha̍rāmasi ya̱jñamu̱kthaṃ tu̱raṃ vaca̍:
||5||यद्वा॒वन्थ॑ पुरुष्टुत पु॒रा चि॑च्छूर नृ॒णाम् । व॒यं तत्त॑ इन्द्र॒ सं भ॑रामसि य॒ज्ञमु॒क्थं तु॒रं वच॑:
sacā̱ some̍ṣu puruhūta vajrivo̱ madā̍ya dyukṣa somapāḥ | tvamiddhi bra̍hma̱kṛte̱ kāmya̱ṃ vasu̱ deṣṭha̍: sunva̱te bhuva̍:
||6||सचा॒ सोमे॑षु पुरुहूत वज्रिवो॒ मदा॑य द्युक्ष सोमपाः । त्वमिद्धि ब्र॑ह्म॒कृते॒ काम्यं॒ वसु॒ देष्ठ॑: सुन्व॒ते भुव॑:
va̱yame̍nami̱dā hyo'pī̍peme̱ha va̱jriṇa̍m | tasmā̍ u a̱dya sa̍ma̱nā su̱taṃ bha̱rā ''nū̱naṃ bhū̍ṣata śru̱te
||7||व॒यमे॑नमि॒दा ह्योऽपी॑पेमे॒ह व॒ज्रिण॑म् । तस्मा॑ उ अ॒द्य स॑म॒ना सु॒तं भ॒रा ऽऽनू॒नं भू॑षत श्रु॒ते
vṛka̍ścidasya vāra̱ṇa u̍rā̱mathi̱rā va̱yune̍ṣu bhūṣati | semaṃ na̱: stoma̍ṃ jujuṣā̱ṇa ā ga̱hīndra̱ pra ci̱trayā̍ dhi̱yā
||8||वृक॑श्चिदस्य वार॒ण उ॑रा॒मथि॒रा व॒युने॑षु भूषति । सेमं न॒: स्तोमं॑ जुजुषा॒ण आ ग॒हीन्द्र॒ प्र चि॒त्रया॑ धि॒या
kadū̱ nva1syākṛ̍ta̱mindra̍syāsti̱ pauṃsya̍m | keno̱ nu ka̱ṃ śroma̍tena̱ na śu̍śruve ja̱nuṣa̱: pari̍ vṛtra̱hā
||9||कदू॒ न्व१स्याकृ॑त॒मिन्द्र॑स्यास्ति॒ पौंस्य॑म् । केनो॒ नु कं॒ श्रोम॑तेन॒ न शु॑श्रुवे ज॒नुष॒: परि॑ वृत्र॒हा
kadū̍ ma̱hīradhṛ̍ṣṭā asya̱ tavi̍ṣī̱: kadu̍ vṛtra̱ghno astṛ̍tam |
indro̱ viśvā̍nbeka̱nāṭā̍m̐ aha̱rdṛśa̍ u̱ta kratvā̍ pa̱ṇīm̐ra̱bhi
||10||कदू॑ म॒हीरधृ॑ष्टा अस्य॒ तवि॑षी॒: कदु॑ वृत्र॒घ्नो अस्तृ॑तम् ।
इन्द्रो॒ विश्वा॑न्बेक॒नाटाँ॑ अह॒र्दृश॑ उ॒त क्रत्वा॑ प॒णीँर॒भि
va̱yaṃ ghā̍ te̱ apū̱rvyendra̱ brahmā̍ṇi vṛtrahan | pu̱rū̱tamā̍saḥ puruhūta vajrivo bhṛ̱tiṃ na pra bha̍rāmasi
||11||व॒यं घा॑ ते॒ अपू॒र्व्येन्द्र॒ ब्रह्मा॑णि वृत्रहन् । पु॒रू॒तमा॑सः पुरुहूत वज्रिवो भृ॒तिं न प्र भ॑रामसि
pū̱rvīści̱ddhi tve tu̍vikūrminnā̱śaso̱ hava̍nta indro̱taya̍: | ti̱raści̍da̱ryaḥ sava̱nā va̍so gahi̱ śavi̍ṣṭha śru̱dhi me̱ hava̍m
||12||पू॒र्वीश्चि॒द्धि त्वे तु॑विकूर्मिन्ना॒शसो॒ हव॑न्त इन्द्रो॒तय॑: । ति॒रश्चि॑द॒र्यः सव॒ना व॑सो गहि॒ शवि॑ष्ठ श्रु॒धि मे॒ हव॑म्
va̱yaṃ ghā̍ te̱ tve idvindra̱ viprā̱ api̍ ṣmasi | na̱hi tvada̱nyaḥ pu̍ruhūta̱ kaśca̱na magha̍va̱nnasti̍ marḍi̱tā
||13||व॒यं घा॑ ते॒ त्वे इद्विन्द्र॒ विप्रा॒ अपि॑ ष्मसि । न॒हि त्वद॒न्यः पु॑रुहूत॒ कश्च॒न मघ॑व॒न्नस्ति॑ मर्डि॒ता
tvaṃ no̍ a̱syā ama̍teru̱ta kṣu̱dho̱3'bhiśa̍ste̱rava̍ spṛdhi |
tvaṃ na̍ ū̱tī tava̍ ci̱trayā̍ dhi̱yā śikṣā̍ śaciṣṭha gātu̱vit
||14||त्वं नो॑ अ॒स्या अम॑तेरु॒त क्षु॒धो॒३ऽभिश॑स्ते॒रव॑ स्पृधि ।
त्वं न॑ ऊ॒ती तव॑ चि॒त्रया॑ धि॒या शिक्षा॑ शचिष्ठ गातु॒वित्
soma̱ idva̍: su̱to a̍stu̱ kala̍yo̱ mā bi̍bhītana | apede̱ṣa dhva̱smāya̍ti sva̱yaṃ ghai̱ṣo apā̍yati
||15||सोम॒ इद्व॑: सु॒तो अ॑स्तु॒ कल॑यो॒ मा बि॑भीतन । अपेदे॒ष ध्व॒स्माय॑ति स्व॒यं घै॒षो अपा॑यति