Study
- Anukramaṇī
- Source
15 irimbiṣṭhiḥ kāṇva: |indra: ; 14 vāstoṣpatirvā | gāyatrī , pragātha:= (14 bṛhatī , 15 satobṛhatī ) |
ā yā̍hi suṣu̱mā hi ta̱ indra̱ soma̱ṃ pibā̍ i̱mam | edaṃ ba̱rhiḥ sa̍do̱ mama̍
||1||आ या॑हि सुषु॒मा हि त॒ इन्द्र॒ सोमं॒ पिबा॑ इ॒मम् । एदं ब॒र्हिः स॑दो॒ मम॑
ā tvā̍ brahma̱yujā̱ harī̱ vaha̍tāmindra ke̱śinā̍ | upa̱ brahmā̍ṇi naḥ śṛṇu
||2||आ त्वा॑ ब्रह्म॒युजा॒ हरी॒ वह॑तामिन्द्र के॒शिना॑ । उप॒ ब्रह्मा॑णि नः शृणु
bra̱hmāṇa̍stvā va̱yaṃ yu̱jā so̍ma̱pāmi̍ndra so̱mina̍: | su̱tāva̍nto havāmahe
||3||ब्र॒ह्माण॑स्त्वा व॒यं यु॒जा सो॑म॒पामि॑न्द्र सो॒मिन॑: । सु॒ताव॑न्तो हवामहे
ā no̍ yāhi su̱tāva̍to̱'smāka̍ṃ suṣṭu̱tīrupa̍ | pibā̱ su śi̍pri̱nnandha̍saḥ
||4||आ नो॑ याहि सु॒ताव॑तो॒ऽस्माकं॑ सुष्टु॒तीरुप॑ । पिबा॒ सु शि॑प्रि॒न्नन्ध॑सः
ā te̍ siñcāmi ku̱kṣyoranu̱ gātrā̱ vi dhā̍vatu | gṛ̱bhā̱ya ji̱hvayā̱ madhu̍
||5||आ ते॑ सिञ्चामि कु॒क्ष्योरनु॒ गात्रा॒ वि धा॑वतु । गृ॒भा॒य जि॒ह्वया॒ मधु॑
svā̱duṣṭe̍ astu sa̱ṃsude̱ madhu̍mānta̱nve̱3 tava̍ | soma̱: śama̍stu te hṛ̱de
||6||स्वा॒दुष्टे॑ अस्तु सं॒सुदे॒ मधु॑मान्त॒न्वे॒३ तव॑ । सोम॒: शम॑स्तु ते हृ॒दे
a̱yamu̍ tvā vicarṣaṇe̱ janī̍rivā̱bhi saṃvṛ̍taḥ | pra soma̍ indra sarpatu
||7||अ॒यमु॑ त्वा विचर्षणे॒ जनी॑रिवा॒भि संवृ॑तः । प्र सोम॑ इन्द्र सर्पतु
tu̱vi̱grīvo̍ va̱poda̍raḥ subā̱hurandha̍so̱ made̍ | indro̍ vṛ̱trāṇi̍ jighnate
||8||तु॒वि॒ग्रीवो॑ व॒पोद॑रः सुबा॒हुरन्ध॑सो॒ मदे॑ । इन्द्रो॑ वृ॒त्राणि॑ जिघ्नते
indra̱ prehi̍ pu̱rastvaṃ viśva̱syeśā̍na̱ oja̍sā | vṛ̱trāṇi̍ vṛtrahañjahi
||9||इन्द्र॒ प्रेहि॑ पु॒रस्त्वं विश्व॒स्येशा॑न॒ ओज॑सा । वृ॒त्राणि॑ वृत्रहञ्जहि
dī̱rghaste̍ astvaṅku̱śo yenā̱ vasu̍ pra̱yaccha̍si | yaja̍mānāya sunva̱te
||10||दी॒र्घस्ते॑ अस्त्वङ्कु॒शो येना॒ वसु॑ प्र॒यच्छ॑सि । यज॑मानाय सुन्व॒ते
a̱yaṃ ta̍ indra̱ somo̱ nipū̍to̱ adhi̍ ba̱rhiṣi̍ | ehī̍ma̱sya dravā̱ piba̍
||11||अ॒यं त॑ इन्द्र॒ सोमो॒ निपू॑तो॒ अधि॑ ब॒र्हिषि॑ । एही॑म॒स्य द्रवा॒ पिब॑
śāci̍go̱ śāci̍pūjanā̱'yaṃ raṇā̍ya te su̱taḥ | ākha̍ṇḍala̱ pra hū̍yase
||12||शाचि॑गो॒ शाचि॑पूजना॒ऽयं रणा॑य ते सु॒तः । आख॑ण्डल॒ प्र हू॑यसे
yaste̍ śṛṅgavṛṣo napā̱tpraṇa̍pātkuṇḍa̱pāyya̍: | nya̍smindadhra̱ ā mana̍:
||13||यस्ते॑ शृङ्गवृषो नपा॒त्प्रण॑पात्कुण्ड॒पाय्य॑: । न्य॑स्मिन्दध्र॒ आ मन॑:
vāsto̍ṣpate dhru̱vā sthūṇāṃ'sa̍traṃ so̱myānā̍m | dra̱pso bhe̱ttā pu̱rāṃ śaśva̍tīnā̱mindro̱ munī̍nā̱ṃ sakhā̍
||14||वास्तो॑ष्पते ध्रु॒वा स्थूणांऽस॑त्रं सो॒म्याना॑म् । द्र॒प्सो भे॒त्ता पु॒रां शश्व॑तीना॒मिन्द्रो॒ मुनी॑नां॒ सखा॑
pṛdā̍kusānuryaja̱to ga̱veṣa̍ṇa̱ eka̱: sanna̱bhi bhūya̍saḥ | bhūrṇi̱maśva̍ṃ nayattu̱jā pu̱ro gṛ̱bhendra̱ṃ soma̍sya pī̱taye̍
||15||पृदा॑कुसानुर्यज॒तो ग॒वेष॑ण॒ एक॒: सन्न॒भि भूय॑सः । भूर्णि॒मश्वं॑ नयत्तु॒जा पु॒रो गृ॒भेन्द्रं॒ सोम॑स्य पी॒तये॑