Study
- Anukramaṇī
- Source
8 nṛmedha āṅgirasa: | indra: | pragātha: = ( viṣamā bṛhatī, samā satobṛhatī ) |
tvāmi̱dā hyo naro'pī̍pyanvajri̱nbhūrṇa̍yaḥ | sa i̍ndra̱ stoma̍vāhasāmi̱ha śru̱dhyupa̱ svasa̍ra̱mā ga̍hi
||1||त्वामि॒दा ह्यो नरोऽपी॑प्यन्वज्रि॒न्भूर्ण॑यः । स इ॑न्द्र॒ स्तोम॑वाहसामि॒ह श्रु॒ध्युप॒ स्वस॑र॒मा ग॑हि
matsvā̍ suśipra hariva̱stadī̍mahe̱ tve ā bhū̍ṣanti ve̱dhasa̍: | tava̱ śravā̍ṃsyupa̱mānyu̱kthyā̍ su̱teṣvi̍ndra girvaṇaḥ
||2||मत्स्वा॑ सुशिप्र हरिव॒स्तदी॑महे॒ त्वे आ भू॑षन्ति वे॒धस॑: । तव॒ श्रवां॑स्युप॒मान्यु॒क्थ्या॑ सु॒तेष्वि॑न्द्र गिर्वणः
śrāya̍nta iva̱ sūrya̱ṃ viśvedindra̍sya bhakṣata | vasū̍ni jā̱te jana̍māna̱ oja̍sā̱ prati̍ bhā̱gaṃ na dī̍dhima
||3||श्राय॑न्त इव॒ सूर्यं॒ विश्वेदिन्द्र॑स्य भक्षत । वसू॑नि जा॒ते जन॑मान॒ ओज॑सा॒ प्रति॑ भा॒गं न दी॑धिम
ana̍rśarātiṃ vasu̱dāmupa̍ stuhi bha̱drā indra̍sya rā̱taya̍: |
so a̍sya̱ kāma̍ṃ vidha̱to na ro̍ṣati̱ mano̍ dā̱nāya̍ co̱daya̍n
||4||अन॑र्शरातिं वसु॒दामुप॑ स्तुहि भ॒द्रा इन्द्र॑स्य रा॒तय॑: ।
सो अ॑स्य॒ कामं॑ विध॒तो न रो॑षति॒ मनो॑ दा॒नाय॑ चो॒दय॑न्
tvami̍ndra̱ pratū̍rtiṣva̱bhi viśvā̍ asi̱ spṛdha̍: | a̱śa̱sti̱hā ja̍ni̱tā vi̍śva̱tūra̍si̱ tvaṃ tū̍rya taruṣya̱taḥ
||5||त्वमि॑न्द्र॒ प्रतू॑र्तिष्व॒भि विश्वा॑ असि॒ स्पृध॑: । अ॒श॒स्ति॒हा ज॑नि॒ता वि॑श्व॒तूर॑सि॒ त्वं तू॑र्य तरुष्य॒तः
anu̍ te̱ śuṣma̍ṃ tu̱raya̍ntamīyatuḥ kṣo̱ṇī śiśu̱ṃ na mā̱tarā̍ |
viśvā̍ste̱ spṛdha̍: śnathayanta ma̱nyave̍ vṛ̱traṃ yadi̍ndra̱ tūrva̍si
||6||अनु॑ ते॒ शुष्मं॑ तु॒रय॑न्तमीयतुः क्षो॒णी शिशुं॒ न मा॒तरा॑ ।
विश्वा॑स्ते॒ स्पृध॑: श्नथयन्त म॒न्यवे॑ वृ॒त्रं यदि॑न्द्र॒ तूर्व॑सि
i̱ta ū̱tī vo̍ a̱jara̍ṃ prahe̱tāra̱mapra̍hitam | ā̱śuṃ jetā̍ra̱ṃ hetā̍raṃ ra̱thīta̍ma̱matū̍rtaṃ tugryā̱vṛdha̍m
||7||इ॒त ऊ॒ती वो॑ अ॒जरं॑ प्रहे॒तार॒मप्र॑हितम् । आ॒शुं जेता॑रं॒ हेता॑रं र॒थीत॑म॒मतू॑र्तं तुग्र्या॒वृध॑म्
i̱ṣka̱rtāra̱mani̍ṣkṛta̱ṃ saha̍skṛtaṃ śa̱tamū̍tiṃ śa̱takra̍tum | sa̱mā̱namindra̱mava̍se havāmahe̱ vasa̍vānaṃ vasū̱juva̍m
||8||इ॒ष्क॒र्तार॒मनि॑ष्कृतं॒ सह॑स्कृतं श॒तमू॑तिं श॒तक्र॑तुम् । स॒मा॒नमिन्द्र॒मव॑से हवामहे॒ वस॑वानं वसू॒जुव॑म्