Study
- Anukramaṇī
- Source
19 medhyātithi : kāṇva:| indra: | bṛhatī , 16-18 gāyatrī , 19 anuṣṭup |
va̱yaṃ gha̍ tvā su̱tāva̍nta̱ āpo̱ na vṛ̱ktaba̍rhiṣaḥ | pa̱vitra̍sya pra̱srava̍ṇeṣu vṛtraha̱npari̍ sto̱tāra̍ āsate
||1||व॒यं घ॑ त्वा सु॒ताव॑न्त॒ आपो॒ न वृ॒क्तब॑र्हिषः । प॒वित्र॑स्य प्र॒स्रव॑णेषु वृत्रह॒न्परि॑ स्तो॒तार॑ आसते
svara̍nti tvā su̱te naro̱ vaso̍ nire̱ka u̱kthina̍: | ka̱dā su̱taṃ tṛ̍ṣā̱ṇa oka̱ ā ga̍ma̱ indra̍ sva̱bdīva̱ vaṃsa̍gaḥ
||2||स्वर॑न्ति त्वा सु॒ते नरो॒ वसो॑ निरे॒क उ॒क्थिन॑: । क॒दा सु॒तं तृ॑षा॒ण ओक॒ आ ग॑म॒ इन्द्र॑ स्व॒ब्दीव॒ वंस॑गः
kaṇve̍bhirdhṛṣṇa̱vā dhṛ̱ṣadvāja̍ṃ darṣi saha̱sriṇa̍m | pi̱śaṅga̍rūpaṃ maghavanvicarṣaṇe ma̱kṣū goma̍ntamīmahe
||3||कण्वे॑भिर्धृष्ण॒वा धृ॒षद्वाजं॑ दर्षि सह॒स्रिण॑म् । पि॒शङ्ग॑रूपं मघवन्विचर्षणे म॒क्षू गोम॑न्तमीमहे
pā̱hi gāyāndha̍so̱ mada̱ indrā̍ya medhyātithe | yaḥ sammi̍ślo̱ haryo̱ryaḥ su̱te sacā̍ va̱jrī ratho̍ hira̱ṇyaya̍:
||4||पा॒हि गायान्ध॑सो॒ मद॒ इन्द्रा॑य मेध्यातिथे । यः सम्मि॑श्लो॒ हर्यो॒र्यः सु॒ते सचा॑ व॒ज्री रथो॑ हिर॒ण्यय॑:
yaḥ su̍ṣa̱vyaḥ su̱dakṣi̍ṇa i̱no yaḥ su̱kratu̍rgṛ̱ṇe | ya ā̍ka̱raḥ sa̱hasrā̱ yaḥ śa̱tāma̍gha̱ indro̱ yaḥ pū̱rbhidā̍ri̱taḥ
||5||यः सु॑ष॒व्यः सु॒दक्षि॑ण इ॒नो यः सु॒क्रतु॑र्गृ॒णे । य आ॑क॒रः स॒हस्रा॒ यः श॒ताम॑घ॒ इन्द्रो॒ यः पू॒र्भिदा॑रि॒तः
yo dhṛ̍ṣi̱to yo'vṛ̍to̱ yo asti̱ śmaśru̍ṣu śri̱taḥ | vibhū̍tadyumna̱ścyava̍naḥ puruṣṭu̱taḥ kratvā̱ gauri̍va śāki̱naḥ
||6||यो धृ॑षि॒तो योऽवृ॑तो॒ यो अस्ति॒ श्मश्रु॑षु श्रि॒तः । विभू॑तद्युम्न॒श्च्यव॑नः पुरुष्टु॒तः क्रत्वा॒ गौरि॑व शाकि॒नः
ka ī̍ṃ veda su̱te sacā̱ piba̍nta̱ṃ kadvayo̍ dadhe | a̱yaṃ yaḥ puro̍ vibhi̱nattyoja̍sā mandā̱naḥ śi̱pryandha̍saḥ
||7||क ईं॑ वेद सु॒ते सचा॒ पिब॑न्तं॒ कद्वयो॑ दधे । अ॒यं यः पुरो॑ विभि॒नत्त्योज॑सा मन्दा॒नः शि॒प्र्यन्ध॑सः
dā̱nā mṛ̱go na vā̍ra̱ṇaḥ pu̍ru̱trā ca̱ratha̍ṃ dadhe | naki̍ṣṭvā̱ ni ya̍ma̱dā su̱te ga̍mo ma̱hām̐śca̍ra̱syoja̍sā
||8||दा॒ना मृ॒गो न वा॑र॒णः पु॑रु॒त्रा च॒रथं॑ दधे । नकि॑ष्ट्वा॒ नि य॑म॒दा सु॒ते ग॑मो म॒हाँश्च॑र॒स्योज॑सा
ya u̱graḥ sannani̍ṣṭṛtaḥ sthi̱ro raṇā̍ya̱ saṃskṛ̍taḥ | yadi̍ sto̱turma̱ghavā̍ śṛ̱ṇava̱ddhava̱ṃ nendro̍ yoṣa̱tyā ga̍mat
||9||य उ॒ग्रः सन्ननि॑ष्टृतः स्थि॒रो रणा॑य॒ संस्कृ॑तः । यदि॑ स्तो॒तुर्म॒घवा॑ शृ॒णव॒द्धवं॒ नेन्द्रो॑ योष॒त्या ग॑मत्
sa̱tyami̱tthā vṛṣeda̍si̱ vṛṣa̍jūti̱rno'vṛ̍taḥ | vṛṣā̱ hyu̍gra śṛṇvi̱ṣe pa̍rā̱vati̱ vṛṣo̍ arvā̱vati̍ śru̱taḥ
||10||स॒त्यमि॒त्था वृषेद॑सि॒ वृष॑जूति॒र्नोऽवृ॑तः । वृषा॒ ह्यु॑ग्र शृण्वि॒षे प॑रा॒वति॒ वृषो॑ अर्वा॒वति॑ श्रु॒तः
vṛṣa̍ṇaste a̱bhīśa̍vo̱ vṛṣā̱ kaśā̍ hira̱ṇyayī̍ | vṛṣā̱ ratho̍ maghava̱nvṛṣa̍ṇā̱ harī̱ vṛṣā̱ tvaṃ śa̍takrato
||11||वृष॑णस्ते अ॒भीश॑वो॒ वृषा॒ कशा॑ हिर॒ण्ययी॑ । वृषा॒ रथो॑ मघव॒न्वृष॑णा॒ हरी॒ वृषा॒ त्वं श॑तक्रतो
vṛṣā̱ sotā̍ sunotu te̱ vṛṣa̍nnṛjīpi̱nnā bha̍ra | vṛṣā̍ dadhanve̱ vṛṣa̍ṇaṃ na̱dīṣvā tubhya̍ṃ sthātarharīṇām
||12||वृषा॒ सोता॑ सुनोतु ते॒ वृष॑न्नृजीपि॒न्ना भ॑र । वृषा॑ दधन्वे॒ वृष॑णं न॒दीष्वा तुभ्यं॑ स्थातर्हरीणाम्
endra̍ yāhi pī̱taye̱ madhu̍ śaviṣṭha so̱myam | nāyamacchā̍ ma̱ghavā̍ śṛ̱ṇava̱dgiro̱ brahmo̱kthā ca̍ su̱kratu̍:
||13||एन्द्र॑ याहि पी॒तये॒ मधु॑ शविष्ठ सो॒म्यम् । नायमच्छा॑ म॒घवा॑ शृ॒णव॒द्गिरो॒ ब्रह्मो॒क्था च॑ सु॒क्रतु॑:
vaha̍ntu tvā rathe̱ṣṭhāmā hara̍yo ratha̱yuja̍: | ti̱raści̍da̱ryaṃ sava̍nāni vṛtrahanna̱nyeṣā̱ṃ yā śa̍takrato
||14||वह॑न्तु त्वा रथे॒ष्ठामा हर॑यो रथ॒युज॑: । ति॒रश्चि॑द॒र्यं सव॑नानि वृत्रहन्न॒न्येषां॒ या श॑तक्रतो
a̱smāka̍ma̱dyānta̍ma̱ṃ stoma̍ṃ dhiṣva mahāmaha | a̱smāka̍ṃ te̱ sava̍nā santu̱ śaṃta̍mā̱ madā̍ya dyukṣa somapāḥ
||15||अ॒स्माक॑म॒द्यान्त॑मं॒ स्तोमं॑ धिष्व महामह । अ॒स्माकं॑ ते॒ सव॑ना सन्तु॒ शंत॑मा॒ मदा॑य द्युक्ष सोमपाः
na̱hi ṣastava̱ no mama̍ śā̱stre a̱nyasya̱ raṇya̍ti | yo a̱smānvī̱ra āna̍yat
||16||न॒हि षस्तव॒ नो मम॑ शा॒स्त्रे अ॒न्यस्य॒ रण्य॑ति । यो अ॒स्मान्वी॒र आन॑यत्
indra̍ścidghā̱ tada̍bravītstri̱yā a̍śā̱syaṃ mana̍: | u̱to aha̱ kratu̍ṃ ra̱ghum
||17||इन्द्र॑श्चिद्घा॒ तद॑ब्रवीत्स्त्रि॒या अ॑शा॒स्यं मन॑: । उ॒तो अह॒ क्रतुं॑ र॒घुम्
saptī̍ cidghā mada̱cyutā̍ mithu̱nā va̍hato̱ ratha̍m | e̱veddhūrvṛṣṇa̱ utta̍rā
||18||सप्ती॑ चिद्घा मद॒च्युता॑ मिथु॒ना व॑हतो॒ रथ॑म् । ए॒वेद्धूर्वृष्ण॒ उत्त॑रा
a̱dhaḥ pa̍śyasva̱ mopari̍ saṃta̱rāṃ pā̍da̱kau ha̍ra | mā te̍ kaśapla̱kau dṛ̍śa̱ntstrī hi bra̱hmā ba̱bhūvi̍tha
||19||अ॒धः प॑श्यस्व॒ मोपरि॑ संत॒रां पा॑द॒कौ ह॑र । मा ते॑ कशप्ल॒कौ दृ॑श॒न्त्स्त्री हि ब्र॒ह्मा ब॒भूवि॑थ